Rôh hôp kố, Khu pơkuâ ngăn xiâm Đảng kô séa ngăn, pơkâ mâu tơdroăng ki kal tơbleăng Pơkâ Hneăng hôp XIV dêi Đảng, tơdroăng kal ‘na mơjiâng Đảng, khu pơkuâ cheăng kal kí ƀă mơnhông tơnêi têa tung hneăng nếo. Tơpui a rôh po hôp, pôa Tô Lâm, Kăn xiâm pơkuâ hnê ngăn cheăng Đảng, Kăn xiâm hnê ngăn tơnêi têa tối nhên, Hneăng hôp XIV hiăng mơnhên troăng hơlâ, pơkâ pêi ƀă mâu troăng tơmiât pêi tung la ngiâ kân; Rôh hôp Tơnêi têa rôh má 2 pơkâ ivá tơkŭm ƀă pơkâ xúa ăm hneăng cheăng.

Rôh hôp Tơnêi têa rôh má 3 athế pơtroh mâu troăng tơmiât pêi mê chiâng pơkâ pêi lêi tah xơpá, tíu ối kreăng, pro tơ’lêi hlâu mâu liăn ngân ƀă pro ivá mơnhông nếo. 13 tơdroăng kal tơmiât troh pơkâ pêi a’ngêi tâ, pro chiâng ivá pơkuâ, râng ko, pơkuâ ngăn, pêi pro, mơnhông ƀă rak vế tơnêi têa tung hneăng nếo. Kăn xiâm pơkuâ hnê ngăn cheăng Đảng, Kăn xiâm hnê ngăn tơnêi têa pơkâ thế, Tơnêi têa tơkŭm tơpui tơno trâu a tôh, mơhno nhên túa tơmiât a kơbong hôp, veăng tơpui tối tơdrêng ƀă kơxop hlá mơ-éa Pơkâ, túa pơkâ pêi pro; tơpui kal ‘nâng ‘nâi, mot tơdrăng tung tơdroăng ki kal, tơpui hleăng nhên, pâ thế nhên, nhên túa pơkâ rah xo; veăng gum vâ chêh pro klêi tơdroăng pơkâ dêi Tơnêi têa.