A tơdroăng tơkêa bro Hngêi trung Phôh thong Kuăn ngo ai tíu kâ ối pơlê ki tơdjuôm pơla Râ má môi ƀă Râ má péa Sa Loong, cheăm Sa Loong, ai lối hrĭng ngế kŏng nhân dế xing xoăng dêi rơpó vâ rĕng pêi pro kêi, lo adrêng pêi pro mâu tơmeăm khoăng. A mâu hngêi trung hriâm mê, kŏng nhân hiăng lêm kuâ ƀă tôl; pá kơdâm, mâu khu ki pik têa sơng xuân dế thâ rĕng pêi pro vâ rĕng teăm kêi mâu tơdroăng ki pik a mâu mơnât hngêi. Tung mâu lâm, kơbong, mâu bo, péa, on troăng kơxái lơtrik ki trâ bâ eăng, ƀă mâu tơmeăm ki dế pơkrâ ‘măn pơrá châ bro, rơnuâ lế lĕm.

Khu ki pơkuâ ngăn tơdroăng tơkêa bro tơdroăng kố dế pơkâ pêi 5 khu mơjiâng, môi khu cho ăm mâu kăn ngăn hngêi trung, môi khu cho mâu hngêi hum, hngêi ti dế. Tiô tơdroăng pơkâ, 5 khu hngêi mê kô pơrá kêi hnối pơcháu ahdrối hâi lơ 30 khế 7; khu hngêi ăm mâu kăn ngăn hngêi trung pêi pro kêi a hâi lơ 10 khế 8; hngêi ki ăm hok tro mơhriâm ivá, xah ôm hêi ƀă mâu tơmeăm ki ê kô mơjiâng klêi sap ing hâi lơ 15 troh lơ 20 khế 8.

 Kong mêi ton hâi tung pơla hdrối kố nah xuân pro tơdjâk troh tơdroăng bro hngêi trung. Vâ rĕng teăm kêi, mê khu ki ngăn ‘na mơjiâng pro hiăng hding khía mơhot ƀă kong mêi, tơdrêng amê, hnối tí tăng rah xo kuăn pơlê veăng pêi ăm i rĕng kêi. Dế pơla kố, a tíu ki mơjiâng bro mê ai dâng 220 ngế ki dế pêi cheăng rêm hâi, pêi cheăng plâ 11 chôu môi pôe rêm hâi. Pôa Nguyễn Văn Nhất, Phŏ Hnê ngăn khu cheăng 29 khế 7, ối tung Kŏng ti xiâm 319, Cheăng tung Khu xiâm ngăn lêng dêi tơnêi têa, vêh mơnhên tối, kố cho hnoăng cheăng kal kí ki kal kân, xua mê, hiăng tơkŭm tâi tâng kuăn mơngế, kế tơmeăm vâ tơniăn ăm hnoăng pêi cheăng teăm pêi pro kêi:

“Tung plâ 10 hâi hdrối kố nah, kong mêi kân ‘nâng. Khu kố hiăng pơxiâm pơkuâ pêi pro mâu troăng hơlâ ki vâ ‘mâi mơnhông ăm hnoăng cheăng, trối hding tâi tâng a mâu kơpong ki vâ mĕn mơnât, pik têa sơng. Ƀă kơpong ki mĕn xơmong a plông kân, khu kố xuân hiăng lêm ƀă ƀaih vâ lêm ăm tíu ki mĕn bro plông, rêm toăng hơkôp mê lêm rơdâ châ dâng 60 met, vâ rĕng teăm mĕn pro plông tung mâu hâi kong mêi kân. Tiô tối ahdrối, a hâi lơ 15 khế 8 kố ah, kô mơjiâng pro kêi tâi tâng kơpong mơhriâm ƀă kơbong ki ăm hok tro koi ối pơtê”.

A tơdroăng tơkêa bro Hngêi trung Phoh thông Kuăn ngo ai tíu ối pơtê râ má Nôi ƀă râ má Péa Dục Nông, Khu hngêi ki ngăn’na mơjiâng pro hiăng mơhnhôk châ ing 250 troh 270 ngế kŏng nhân ki pêi plâ kơhâi plâ kơmăng. Tiô tơdroăng pơkâ, ahdrối hâi lơ 31/7 kô pơcháu 7 khu tơmeăm khoăng ki hiăng mơjiâng pro klêi, mê cho khu kơbong mơhriâm ăm râ má 2, 3 khu kơbong mơhrâm ăm râ má môi ƀă khu ăm mâu thái cô ki pơkuâ ngăn hngêi trung; mâu tơmeăm ki mơjiâng pro mê trối, hngêi kâ hmê, hngêi ối pơtê kô pêi pro kêi a hâi lơ 15 khế 8.

Ngoh Vũ Thanh Khương - Thươ̆ng tă, Kăn pơkuâ hnê ngăn Đảng ủi, Kăn hnê ngăn Kŏng ti Tơlo liăn cheăng 319 Miền Trung (cheăng tung Kŏng ti xiâm 319, Khu xiâm ngăn lêng tơnêi têa) tối ăm ngin ‘nâi, mâu trăng, mơnât, kuâ, kơbong pơrá hiăng pêi pro kêi. Dế nôkố, mâu tôh ki mĕn pro dế tơkŭm mĕn, pik têa sơng, krâ péa, bo, mâu tơmeăm, hang lơng, hang pơklêp meăm, krâ gât hmốu ƀă mâu tơmeăm ki pro tiô kih thuât. Ngoh Vũ Thanh Khương, Thươ̆ng tă tơkêa tối, rak tơniăn ăm tơdroăng ki mơjiâng pro ƀă ki dâi lĕm mâu tơmeăm khoăng kố.

“Khŏm mơ-eăm pơcháu hnoăng cheăng tâi tâng mâu tơmeăm khoăng ăm kăn ngăn ‘na mơ’no liăn cheăng vâ xúa ahdrối hơnăm mơhriâm nếo. Dế nôkố, a tíu ki mơjiâng pro hngêi trung mê, khu ki xo mơ’no liăn mê đi đo mơhnhôk thế ai sap ing 250 troh 270 ngế kŏng nhân ki pêi plâ hâi plâ măng, đi đo ăm ai tŭm mơngế ki pêi cheăng. Krê a peăng kơmăng, rêm xoh ai sap ing 50 troh a 80 ngế kŏng nhân ki pêi, vâ kơdo mơ-eăm bro tơmeăm khoăng ki mơjiâng mê tro tiô hnoăng hiăng pơcháu”.

Tiô Khu hnê mơhno ‘na pơkuâ ngăn Tơkêa bro Tây Quảng Ngãi 4, 4 toăng hngêi trung ki châ mơjiâng bro a tíu tơkăng kong, tung mê, ai cheăm Rờ Kơi, Sa Loong, Dục Nông ƀă Mô Rai pơrá hiăng châ mơnhên ngăn rêm hâi ‘na tơdroăng pêi cheăng, Khu hnê ngăn hiăng ăm thế mâu kăn ƀô̆ kih thuât gak ngăn plâ hâi plâ măng a tíu ki mơjiâng pro mê vâ rĕng teăm lêi tah lôi ki xahpá má môi, malối tung roh kong prâi, hyôh tô hngíu ôh tá tơniăn, ah lơ pro ôh tá tơ’lêi hlâu tung tơdroăng cheăng.

Troh nôkố, tíu ki mơjiâng a hngêi trung Rờ Kơi mê ai dâng 90% kơxô̆ mơngế, Dục Nông châ 87%, Sa Loong châ 82%, tâi tâng mâu tơdroăng cheăng mê dế thâ vâ mơjiâng pro klêi. Pôa Võ Đại Tân, Kăn hnê ngăn ‘na Pơkuâ ngăn tơdroăng tơkêa bro ahdrối hâi leh mot hơnăm mơhriâm nếo 2026-2027, tơveăng gum rak vế, pêi pro ƀlêi chiâng Tơdroăng pơkâ kơxô̆ 71 dêi Khu xiâm ngăn cheăng Kal kí ƀă tơdroăng ki mơnhông tơƀrê khât tung mơhông cheăng hnê mơhriâm ƀă hnê mơjiâng cheăng pêi, ing mê, khô khối kơdroh ki kơtăn ‘na tơdroăng ki mơhriâm pơla kơpong tơnêi dêi pơlê cheăm a kơpong ki kơtiê xahpá ƀă kơpong ki ê.

“Kố cho tơmeăm khoăng ôh tá xê to kơdo mơ-eăm khŏm chiâng vâ pêi pro mê athế pơklât thế khŏm klêi chiâng, ai tŭm kế tơmeăm hnê ƀă kế tơmeăm mơhriâm ăm mâu vâi o vâi muăn mơhriâm. Xua ti mê, tơdroăng cheăng mê tôu tá tuăn tá mơno vâ rĕng teăm klêi tiô chôu phut, hâi khế pơkâ, malối tung pơla kong prâi tôu hngíu ôh tá tro tơdroăng, trâm hên xahpá. Khu hnê ngăn tơdroăng cheăng xuân athế kơdo mơ-eăm troh hâi lơ 31/7 kô pêi pro klêi mâu tơmeăm khoăng ki mơjiâng, trối lêm tôl. Klêi mê, kô pơtối thăm mơdêk rĕng tơdroăng ki vâ ăm mâu hngêi trung mê châ klêi ahdrối hâi lơ 15/8. Tâi tâng mâu hngêi trung mê athế hbrâ tŭm mâu kế tơmeăm, tơniăn ăm tơdroăng ki tŏng gum ăm hơnăm mơhriâm nếo tro tiô tơdroăng hnê tối dêi Tíu xiâm Đảng hiăng pơkâ thế ƀă pơcháu ăm”.