Phŏ Ngế pro xiâm hnê ngăn tơnêi têa pơcháu ăm Vi ƀan hnê ngăn kong pơlê Lai Châu hbrâ rơnáu xing xoăng tơ’mô liăn ngân kong pơlê, tơrŭm rơtế ƀă kơxô̆ liăn Tơnêi têa vâ tơbleăng tơdrêng mâu tơdroăng cheăng pêi pro tơdrêng, rĕng gum kuăn pơlê tơniăn tung rêh ối ƀă ‘mâi mơnhông cheăng kâ.

Tơdrêng amê, Ngế pro xiâm hnê ngăn tơnêi têa tối nhên pơkâ thế kal pơkuâ ngăn, xúa kơxô̆ liăn ‘mot tơ’nôm athế rak tơniăn tơbleăng tơdrăng, tro pơkâ ƀă tro ngế ki châ tŏng gum; pôi tá ăm ai tơdroăng ki pro mơhrê liăn ngân tê kơtê. Kong pơlê ai hnoăng cheăng tối tơbleăng klêi kơ’nâi pêi pro mâu Khu xiâm ki ai tơdjâk troh vâ tơkŭm tối tơbleăng ăm Ngế pro xiâm hnê ngăn Chin phuh.