Vâ teăm tơdrêng mơhno mâ tung rôh Festival Têa kơxĭ, Khu pơkuâ Khôi túa lĕm tro, Tơ’noăng ivá ƀă Ôm hyô kong pơlê Khánh Hòa tơrŭm ƀă Hlá tơbeăng ƀă Rơ’jíu, Um tơvi Khánh Hòa rơtế mâu ngế ki rơkê, hiăng pêi cheăng kơtăng vâ pro tung kŏng ngê̆ măng internet lối 20 tíu mơnâ mâ ngăn, tíu chôu ‘măn tơmeăm khoăng rôh nah ƀă tíu ôm hyô ki má môi môi tiah Thôt Bà Pô Nagar, Thôt Trầm Hương, Hòn Chồng, Viê̆n Hải dương học, Hngêi rơhdruê Mê, ‘núa têa kơxĭ Nha Trang...

‘Noăng chư chêh châ quét 3D, xup um Flycam, xup um 360 đô̆ ƀă pêi pro tơdrêng akố vâ tơniăn ki tro khâp hdrối pro tơbleăng tung măng interet.

Pôa Nguyễn Xuân Duy, Phŏ Kăn pơkuâ Hlá tơbeăng ƀă Um tơvi Khánh Hòa tối ăm ‘nâi, tơdroăng tơdjêp pơla hlá tơbeăng ƀă kŏng ngê̆ kô mơjiâng troăng mơđah tơbleăng tiô rơxông nếo, gum tơmối châ ‘nâi tơdroăng tíu troh sap ing hdrối vâ prôk lăm ôm hyô:

“Ki rơdêi ‘na hlá tơbeăng chiâng pêi pro hên tơdroăng mê ngin ôh tá xê to pêi pro hnoăng cheăng pơtâng tối ƀă rơtế tung pêi pro tung kŏng ngê̆ mâu tíu troh ƀă troăng tơdjêp um méa, kŏng ngê̆ ƀă ‘noăng chư chêh. Tung rêm tơdroăng hơ’muăn, ngin gum tơmối kô tơ’lêi hlâu châ ‘nâi tơdroăng, ti tăng plĕng ƀă châ tâ châ hlo mâu tíu troh. Kŏng ngê̆ cho tơmeăm ki xiâm, ƀă hlá tơbeăng cho ngế ki hơ’muăn drêng péa tơdroăng xiâm kố tơdjêp tơtro, rêm tíu troh ôh tá xê to châ tơbleăng mê ối châ pơtâng tối tơdroăng hâk vâ, mơjiâng ivá troh rơdêi’’.

Xiâm rêi kŏng ngê̆ măng internet ‘na ôm hyô Khánh Hòa ôh tá xê to tơbleăng um méa mâu tíu troh mê ối pêi pro tour lăm ngăn 3D, lơgât măng internet, mơnhên tíu ối, pơhlêh liăn ngân, po tour mơ’no tơdrêng tung um tiô troăng hyôh măng, tối ăm ‘nâi hngêi ăm tơmối kâ koi ối pơtê, hngêi mơdró tê kế kâ, rơxế prôk lăm, mâu tơdroăng Festival Têa kơxĭ rơtế hên tơmeăm ki pơxúa tơ’lêi hlâu môi tiah tíu ‘măn rơxế, tŏng gum drêng rơxế ti tơniăn, khăm pơlât, hngêi mơdrah pơlê pơla... Ing mê, tơmối kô chiâng kô hbrâ ti tăng plĕng tơdroăng, chêh tối tơbleăng hâi khế prôk lăm ƀă tơdjêp tơdrêng ƀă mơdró ôm hyô tung phôn râng kŏng. Kố châ ngăn cho troăng pơhlêh ing mơđah tơbleăng tiô khôi vâi krâ nah chiâng mơjiâng tíu sinh thái ôm hyô rơkê, xo tơdroăng ki châ tâ châ hlo dêi tơmối pro tíu xiâm. Nâ Bùi Thị Ngọc Trâm, cheăm Khánh Vĩnh, kong pơlê Khánh Hòa pói tơnga:

“Hdrối nah mê á xuân ngăn mâu kŏng ngê̆ măng internet khôi túa lĕm tro Chăm ƀă păng ‘nâng hâk vâ xua um méa lĕm, tơdroăng ai mơhno ƀă um ƀă tơ’lêi vâ ngăn. Tơdroăng ki nếo xuân môi tiah mê, bu kal môi troăng link cho kô chiâng ti tăng tá Khánh Hòa kŭn tơ’lêi hlâu vâ tơbleăng ăm pú hmâ ối a hơhngế’’.

Tiô jâ Hoàng Thị Bích Hạnh, Tíu xiâm Tŏng gum pơhlêh xúa kŏng ngê̆ chêh hlá tơbeăng, Kơ koan xiâm Hlá tơbeăng (Khu xiâm Khôi túa lĕm tro, Tơ’noăng ivá ƀă Ôm hyô), mâu ngế ki rơkê hiăng tơkŭm tơleăng, mơnhên ngăn ‘noăng chư chêh vâ tơniăn xiâm rêi kŏng ngê̆ măng internet ‘na ôm hyô Khánh Hòa pêi cheăng tiô tro tơdroăng.

“Nôkố ai lối 20 tíu ki má môi mê cho Khánh Hòa hiăng rah xo vâ djâ tung xiâm rêi ôm hyô xúa kŏng ngê̆ măng internet. Tâi tâng khu tơkŭm hên ăm tơdroăng mơnhên, tơpui ƀă pêi pro mâu ‘noăng chư chêh, Séa ngăn, séa mơnhên mâu tơdroăng ki xiâm vâ djâ tơdroăng ôm hyô tung kơmăi tĭnh măng internet’’.

Mơhno mâ tro a rôh Festival Têa kơxĭ Khánh Hòa 2026, Xiâm rêi ôm hyô tung măng internet – Mơ-éa chêh tung măng ôm hyô Khánh Hòa ôh tá xê to gum ăm tơdah tơmối tung rơnó leh tơbleăng mê ối mơjiâng tơdroăng ki xiâm ‘noăng chư chêh tơdjuôm ăm kơvâ ôm hyô, gum mơjiâng Khánh Hòa chiâng tíu troh rơkê, tiô rơxông nếo ƀă hên tơdroăng ki rơdêi tung tơbriât cheăng.