Ki má môi dêi Festival cho tơdroăng ngê̆ thuât châ pro inhên ƀă tơdroăng ki veăng dêi mâu ngê̆ sih tung tơnêi têa ƀă mâu khu ngê̆ thuât lâp plâi tơnêi; leh hô̆i Carnival, ăm rơxế reăng prôk a troăng kân hlối mơđah tơbleăng mô tô phân khô̆i kân ƀă ô tô ton nah mơjiâng chiâng kơdrâm phiu ro hiăng châ tơkŭm po a hên cheăm, bêng, mơhnhôk kơdrâm kuăn pơlê ƀă tơmối veăng.

Xông tơpui a leh mơgêi, pôa Nguyễn Long Biên, Phŏ Kăn xiâm hnê mơhno má môi Vi ƀan kong pơlê Khánh Hòa, Kăn pơkuâ Khu tơkŭm po Festival Têa kơxĭ Khánh Hòa hơnăm 2026 mơnhên, tơdroăng ki kal hiăng djâ troh tíu tơkŭm dêi khôi túa lĕm tro, ngê̆ thuât, tơ’noăng ivá ƀă ôm hyô; kheăn kơdeăn ki lĕm dêi khôi túa lĕm tro ƀă kuăn mơngế Khánh Hòa; mơnhông tuăn pâ ƀă tơdroăng hâk tơngăm ‘na têa kơxĭ, pơlê xiâm; troh lâp lu tơdroăng pơtâng hnê tối mơnhông têa kơxĭ ngiât, mơnhông krá tơniăn ƀă pói vâ troh a têa kơxĭ.

“Loi tơngah khât mâu tơdroăng châ tâ châ hlo lĕm a Festival Têa kơxĭ Khánh Hòa hơnăm 2026 kô pơtối djâ pú hmâ tung tơnêi têa ƀă lâp plâi tơnêi troh achê ƀă Khánh Hòa; vâ rêm rôh vêh cho môi xôh tâ trâu hơngế ki lĕm dêi kơpong tơnêi, kuăn mơngế, khôi túa lĕm tro ƀă tơdroăng pói vâ mơnhông dêi pơlê xiâm têa kơxĭ rơlố. Khánh Hòa đi đo po rơdâ kơpeăng kŏng koh tơdah pú hmâ pŭn kơpong ƀă pói vâ châ trâm pó vâi krâ nhŏng o ƀă pú hmâ mâu rơnó Festival Têa kơxĭ pơtối – Tíu têa kơxĭ ngiêt, tuăn pâ kuăn mơngế lĕm ƀă pói vâ troh têa kơxĭ kô pơtối châ chêh chiâng ƀă mâu mơngiơk nếo’’.

Ing mâu tơdroăng kơnía châ pêi pro, Festival pơtối po chiâng idrâp tơdjêp, po hên mâu rôh tơrŭm cheăng ‘na liăn pro, tê mơdró, túa lĕm tro ƀă ôm hyô pơla Khánh Hòa ƀă mâu kong pơlê, mâu ki tơrŭm cho tung tơnêi têa ƀă kong têa ê. Khu tơkŭm po tơngah rêm ngế tơmối kô chiâng môi ngế “teăng”  tơbleăng um méa kơpong tơnêi, kuăn mơngế Khánh Hòa ăm vâi pú ki ê ‘nâi. Pơtối po klêi Festival têa kơxĭ Khánh Hòa kô pơtối chêh inâi po hên rôh tơ’noăng râ kân lâp plâi tơnêi, tung mê, ai rôh tơ’noăng mơgêi vâi droh lĕm Lâp plâi tơnêi má 73 (Miss World)  ƀă tơ’noăng Vâi droh kĕm Hoàn Vũ Miss Cosmo.

Kong pơlê Khánh xuân pơkâ pơtối hơ’lêh nếo tơdroăng, túa tơkŭm Festival têa kơxĭ chiâng inâi túa lĕm tro têa kơxĭ râ lâp plâi tơnêi, ƀă cho tơdroăng mơnhôk cheăng kâ, ôm hyô, tơ’mot khu ‘no liăn pêi cheăng ƀă pêi pro tiô tơdroăng púi vâ mơnhông rĕng, tơniăn ton tung chal nếo.