Troh nôkố, Gia Lai hiăng tơbleăng pro rôh 91/110 tơdroăng tơkêa on tơhrik ƀă tâi tâng ki têi vâ chê 5.000 MW, tơ’mô vâ chê 90% ki têi châ pơkâ. A rôh pêi cheăng, Vi ƀan hnê ngăn kong pơlê Gia Lai pâ thế Khu xiâm ngăn kơmăi kơmok ƀă tê mơdró séa ngăn mơdêk tíu bro on tơhrik kơtâu ƀă khía ƀă on tơhrik kơtâu ƀă tôu mâ hâi tơtro ƀă ki ai hlâu dêi kong pơlê; rĕng pơkâ túa pơkâ yă mơ’no tơhrik hơnăm 2026; mơdêk rĕng ‘no liăn pro mâu trăng kơxái on tơhrik; lêi tah mâu tơdroăng ki xơpá tơvâ vâ péa tơdroăng tơkêa bro on tơhrik kơtâu ƀă khía Chơ Long ƀă Yang Trung rĕng châ mơnhên xúa, tơdrêng amê hlối ai troăng hơlâ kơdroh iâ ‘na tơdroăng ki kơdroh ivá mơ’no on tơhrik dêi mâu hngêi kơmăi on tơhrik vêh pro.

Tơpui a rôh pêi cheăng, kăn pơkuâ Khu xiâm ngăn kơmăi kơmok ƀă tê mơdró mơnhên tối khât klêi kơ’nâi pơtối séa ngăn mâu tơdroăng tơkêa bro, mơdêk rĕng chêh pro klêi mâu hlá mơ-éa ‘no liăn pêi cheăng, xo tơnêi, tơrŭm ƀă mâu tíu pêi cheăng dêi Khu xiâm ƀă kơvâ on tơhrik vâ teăm lêi tah ki xơpá, rak tơniăn tơdroăng pro mâu tơdroăng tơkêa bro on tơhrik tiô pơlâ, mơdêk rak tơniăn on tơhrik tơnêi têa.