Troăng ƀê tong troh a thôn Ka Đô, cheăm Ka Đô, kong pơlê Lâm Đồng hâi kố ôh ti xê to tơdjêp mâu hngêi ƀă klâng mê ối troh a kơpong pêi cheăng hdrối nâh prôk to trâp hliâk drêng kong mêi. Péa pâ troăng, kơpong hngêi hlo ngiât rơngiâp pro pơtối dêi rơpó, mơhno ăm hlo môi kơpong tơnêi dế pơ’lêh tơrêm hâi.

Rơpŏng hngêi pôa Ma Ren cho môi tung mâu rơpŏng ki djâ troăng ahdrối pơ’lêh kơxô̆ tiô túa lěm sap ing rah hdrê pêt rak ngăn troh krí xo, Sap 5 sao Hăng bluôk troh, kơchâi ki pêt tung hngêi hlâm. Tơkŭm ƀă păn lối 50 to chu kong lai ƀă vâ chê chât to ro lai ki păn xo hơ‘nêh, rêm hơnăm rơpŏng pôa xo dêi liăn rơkâ dâng 500 rơtuh liăn ôh tá riân kơxô̆ liăn ‘no hrê rôe tơmeăm ki kố ki mê, mơhá vâi cheăng. Tơpui hlối pêi, pôa Ma Ren chiâng ngế ki vâi ô eăng má môi a Lâm Đồng. Pôa hiăng prôk a hdrối tung hên tơdroăng cheăng dêi thôn,  sap ing pleăng tơnêi troh mơhnhôk kuăn pơlê pleăng tơnêi pro troăng, troh tơdroăng xúa ƀă po rơdâ mâu túa pêi cheăng ki rơkê. Pôa Ma Ren ăm ‘nâi.

“Á ƀă khu đi đo lăm mơhnhôk kuăn pơlê mơjiâng pro troăng pơlê, hơlâ troăng, krúa lěm. Vâ kuăn pơlê khên pơ’lêh hdrê loăng pêt mê pin thế pêi hdrối. Drêng hlo tơƀrê mê kuăn pơlê nếo loi ƀă pêi ƀối. Troh nôkố hên rơpŏng hngêi hiăng pêi ƀối tiô ki rơkê kih thuât, pêi cheăng tơƀrê tâ, pêi châ xo hên tơmeăm, kơxô̆ liăn pê lo tơniăn tâ hdrối”.

Hnoăng veăng ‘no dêi mâu ngế kuăn pơlê pâ nhoăm môi tiah pôa Ma Ren dế pơtối châ hên vâi ô eăng troh hên pơlê dêi kong pơlê Lâm Đồng. A cheăm Đam Rông 2, Kăn hnê ngăn Chi ƀô̆ thôn 2 Kon Yông K’Khiếp hiăng khên tơnôu pêt plâi krui kơxái ôh tá ai kloăng, sầu riêng ƀă măc ca tung 5 ha kơphế ki pơxúa châ lối 1 rơtal liăn rêm hơnăm. Sap ing túa ki kố, hên rơpŏng kuăn pơlê hiăng pơ’lêh túa pêi cheăng kâ xúa kơmăi ki dâi lěm. Troh nôkố, lâp tung cheăm hiăng ai lối 478 ha tơnêi pêi chiâk xúa kơmăi ki dâi lěm, pro 14 mah kơpong pêt ƀă 11 tíu tơrŭm pêi pêt, veăng ‘no hnoăng mơdêk ki pơxúa tơmeăm pêi lo ing chiâk deăng ƀă ai cheăng kâ krá ton. Ngoh Kon Yông K’Khiếp tối:

“Cho đảng viên mê pin thế pêi ahdrối, mơ-eăm hriâm mơnhông pêi chiâk, pêt kơphế pêt sầu riêng, krui kơxái ôh tá ai kloăng, măc ca, mơnhông cheăng kâ ăm rơpŏng hngêi. Drêng túa cheăng kâ pro pơxúa tơƀrê, kuăn pơlê kô lo khât ƀă pêi ƀối. Tơdroăng ki ro má môi cho rế ai hên rơpŏng xúa pêi cheăng tiô túa pêt tơvât, tơdroăng rêh ối châ ‘mâi hơ’lêh nhên”.

Tơkéa vâ tối, ngế kuăn pơlê pâ nhoăm pro tơbleăng troh lâp lu ôh tá xê to ƀă rơkong tơpui mê ƀă túa pêi cheăng vâ tơƀrê. Drêng kuăn pơlê loi ƀă pêi ƀối, mâu troăng hơlâ, luât pơkâ kơjo kum dêi tơnêi têa xuân hiăng pơtối rak ki tơƀrê. Pơla Hơnăm 2021-2026, kơxô̆ rơpŏng kơtiê hên dêi kong pơlê hiăng kơdroh sap 9,33% chu ối 3,3%, tơ‘mô kơdroh vâ chê 50.000 rơpŏng. Nôkố lâp tung kong pơlê ối 80 to cheăm châ mơnhên tối thôn pơlê nếo, 3 to cheăm châ mơnhên tối thôn pơlê pêi châ mơnhên tiô túa. Tiô pôa Bùi Ngọc Sơn, Phŏ Pơkuâ Tíu xiâm Ngăn Kuăn ngo ƀă Loi tĭng Tiô khôp kong pơlê Lâm Đồng, lâp tung kong pơlê nôkố ai dâng 880 ngế ki kuăn pơlê pâ nhoăm tung mâu kuăn ngo ƀă tơdroăng loi tĭng tiô khôp. Khu pơkuâ ngăn tơdroăng Khôp cho mâu ki xiâm rơtế ƀă mâu kăn djâ mâu troăng hơlâ, luât tŏng gum xúa tung rêh ối.

“Hnoăng pêi dêi mơngế ki kuăn pơlê pâ nhoăm tung mâu hơnăm hdrối mê hía nah tung tơdroăng veăng tơlo liăn mơnhông cheăng kâ - pơlê pơla kơpong kuăn ngo ƀă kong ngo. Vâi ôh ti xê to kông tơdjêp ki djâ mơhno troăng hơlâ, luât pơkâ dêi Đảng, Tơnêi têa troh Kuăn pơlê mê ối pro troăng lěm ahdrối, djâ troăng mơnhông pêi chiâk, mơjiâng mâu túa cheăng kâ tơbrê. Ing tơdroăng pơ-eăng mâu ngế kơhnâ pêi cheăng mê, ai hên rơpŏng kuăn pơlê a Lâm Đồng hiăng khên pêi ƀối, veăng ‘no hnoăng hên tung tơdroăng xăm kơklêa kơdroh kơtiê ăm rơpŏng kơtiê, vâ chê kơtiê a kơpong thôn pơlê, kơpong kuăn ngo ƀă kong ngo ai pơxúa”.

Troăng ƀê tong a Ka Đô hâi kố ôh ti xê to po hơlâ ki vâ mot a kơpong pêi cheăng kâ mê ối po troăng hơlâ pêi cheăng kâ nếo a pơlê. Luât pơkâ tŏng gum dêi Tơnêi têa pro xiâm, mê ối cho nhoăm pro  xiâm ki loi khât. Drêng mâu ngế prôk hdrối hiăng ai tuăn loi ƀă tơdroăng cheăng pêi hlo nhên khât, kuăn pơlê kô rơtế hvêa chêng prôk tiô. Ƀă ing mê cho xiâm vâ pơlê pơla kơpong kuăn ngo a Lâm Đồng mơnhông cheăng kâ, mơ-eăm hluăn kơtiê krá ton ƀă ivá tơná.