A rôh hôp tiâ mơnhên, jâ Phan Thị Hà Phước, Ngế xiâm pơkuâ Khu Cheăng kâ - Liăn ngân Hô̆i đong hnê ngăn kong pơlê Dak Lak, tối tiah kố hên tơdroăng pơkâ pêi môi tiah pêi cheăng xúa kơmăi kơmok, tê tơmeăm ngi kong têa ê, ôm hyô ƀă mâu khu mơdró kâ mơjiâng nếo pơrá tâk tâng vâ pơchông ƀă khế kố hơnăm nah, la kơxô̆ mâu khu mơdró kâ pơtê khât, pơtê pơtân pêi cheăng xuân ối hlo hên. Tiâ rơkong kơ-êng dêi jâ ‘na mâu kơvâ cheăng ki chiu hên xơpá ƀă troăng hơlâ vâ pơhlêh tơdroăng ‘no liăn cheăng, tê mơdró, gum cheăng pơkâ mơdêk tâk 2 kơxô̆, pôa Cao Đình Huy, Kăn pơkuâ Khu ngăn liăn ngân kong pơlê Dak Lak ăm ‘nâi, 6 khế apoăng hơnăm lâp tung kong pơlê ai lối 420 khu mơdró kâ pơtê pêi cheăng ƀă lối 1.200 khu mơdró kâ pơtê pơtân pêi cheăng, ki hên cho khu mơdró kâ kŭn ƀă krâ kơvâ tung mâu kơvâ cheăng tê mơdró, mơjiâng pro, hngêi trăng tơnêi tíu, pơto chơ tơmeăm, ối pơtê ƀă ôu kâ. Vâ lêi tah xơpá kố, pôa Cao Đình Huy ăm ‘nâi:

“Khu ngăn liăn ngân tơhrâ tung la ngiâ mê pơtối séa ngăn tơdroăng cheăng dêi khu mơdró kâ a kong pơlê vâ teăm tí tăng ‘nâi plĕng ăm Vi ƀan kong pơlê mâu troăng hơlâ lêi tah xơpá ăm khu mơdró kâ; Mâu khu mơdró kâ lo ing kơchơ tê mơdró, rế pro rế hên khu mơdró kâ vêh pêi cheăng ƀă mơdêk ki rơkê plĕng dêi khu mơdró kâ châ mơjiâng pro nếo. Ôh tá xê to veăng gum po rơdâ túa mơjiâng pro, mê ối tăng tơ’nôm cheăng pêi lo liăn, mê ối pro ivá thăm mơnhông ăm kơvâ cheăng kâ dêi kong pơlê”.

Môi tung mâu tơdroăng ki pro pá a Dak Lak cho khu mơdró kâ châ xúa kơxô̆ liăn tơ’lêi hlâu. Pôa Nguyễn Kim Cương, Kăn pơkuâ Hngêi rak liăn Tơnêi têa tíu pêi cheăng Kơpong 11 ăm ‘nâi, troh mơ’nui khế 6, kơxô̆ liăn chĕn ing hngêi rak liăn a kong pơlê Dak Lak châ dâng 281.700 rơtal liăn, tâk lối 21.000 rơtal liăn tâng vâ pơchông ƀă apoăng hơnăm. Laga, kơxô̆ liăn mung ƀă khu mơdró kâ kŭn ƀă krâ kơvâ bu nếo dâng 13% tâi tâng kơxô̆ liăn chĕn. Tiô pôa, tơdroăng khu mơdró kâ châ xúa liăn ngân ki kal sap ing tơdroăng tơdrăng ƀă ivá pêi cheăng pơkuâ ngăn tơniăn.

“Pâ thế klâ xoăng tơdrăng liăn ngân dêi khu mơdró kâ ƀă liăn ngân dêi rơpŏng hngêi, dêi ngế krê pro ngế ki pơkuâ khu mơdró kâ vâ mơnhên châ tơdroăng ki pêi cheăng dêi tơná mơhno tâi tâng tung hlá mơ-éa chêh ‘măn. Malối cho tung pơla tơdroăng ki pro tơdrăng mâu hlá mơ-éa chêh ‘măn tơdroăng cheăng, liăn ngân xuân môi tiah tối tơbleăng nâp hnoăng liăn mơhá rế hía rế pơkâ thế nhên, tơdrăng tâ. Kố cho tơdroăng pêi pro ki ngin rơhêng vâ pơtroh ăm mâu khu mơdró kâ kŭn ƀă krâ kơvâ drêng veăng tung tơdroăng cheăng mơjiâng pro tê mơdró xuân môi tiah tơrŭm cheăng mung liăn ngân ƀă mâu hngêi rak liăn”.

Tâng kơxô̆ liăn cho tơdroăng ki vâ rak vế tơdroăng cheăng mê kơchơ tê mơdró cho tơdroăng ki tơ’lêi hlâu vâ khu mơdró kâ thăm mơnhông. Xua mê, a rôh hôp tiâ mơnhên, tơdroăng ki pơkâ mơdêk ‘no liăn cheăng tê mơdró, po rơdâ kơchơ tê mơdró xuân châ lo tơniăn. ‘Na tơdroăng cheăng kố, jâ Nguyễn Thị Thu An, Kăn pơkuâ Khu ngăn kơmăi kơmok ƀă tê mơdró kong pơlê Dak Lak ăm ‘nâi, 6 khế apoăng hơnăm kơvâ cheăng tê mơdró điê̆n tưh ƀă chêh ‘măn tơdroăng kal tung internet. Tung la ngiâ ah, cheăng pơkâ mơdêk ‘no liăn tê mơdró kô pơtối châ pơhlêh nếo tiô tơdroăng púi vâ ki ai khât dêi khu mơdró kâ, malối cho mâu kơchơ tê mơdró kong têa ê.

“ ‘Na kơchơ tê mơdró kong têa ê, ngin kô châ ‘nâi tơdroăng kal vâ dêi khu mơdró kâ. Tơkéa vâ tối cho khu mơdró kâ kal klâi a kong têa ki ê, tŏng gum tơmeăm klâi, tơdjêp môi tiah lâi ƀă ngin kô chêh pro tơdroăng pơkâ pêi châ tơdroăng pơkâ thế mê rơtế khu mơdró kâ”.

Rôh hôp tiâ mơnhên ăm hlo ivá khŏm mơ-eăm dêi kong pơlê Dak Lak tung tơdroăng ngăn tơdrăng tung mâu tơdroăng ki tá hâi teăm pro klêi tung tơdroăng ki ‘no liăn cheăng, tê mơdró. Mâu troăng hơlâ châ mơ’no tối pơrá troh tơdroăng pơkâ pêi thế pro tơ’lêi hlâu mâu kơxô̆ liăn, ‘mâi mơnhông khu mơdró kâ, pro chiâng tơdroăng vâ Dak Lak pêi pro pơkâ pêi thăm mơnhông tâk péa kơxô̆ tung hneăng ki nếo.