Rêm kơxo má, mô đô̆i hneăng hdrối nah Hán Vinh Hà, ối a thôn Sơ Trà, cheăm Krông Ana, kong pơlê Dak Lak a mâ a kơpong tíu kơ’nâm kơtâ í ing kơxo má. Séa ngăn rêm hdoăng ‘măn kơtâ í, pôa chơ dêi kơdrâi lăm a kơchơ nếo lăm ngăn dêi klâng chiâk. Tơdroăng cheăng ki hmâ tung hên hơnăm hiăng gum pôa ai hngêi trăng kân lĕm rơdâ. 5 ha báu, 3 ha loăng plâi kâ rơtế tíu uâ bro tơmeăm pêi lo ing chiâk deăng ƀă môi kơdrum păn peâp ai kuăn, pêi lo liăn ăm mô đô̆i hneăng hdrối nah châ rơtal liăn rêm hơnăm. Pôa Hán Vinh Hà hơ’muăn, vâ châ môi tiah hâi kố, pôa tơkâ hluâ hên tơdroăng pá puât xua kong prâi pro ƀă pơreăng. Tơdroăng ki gum pôa ôh tá tot pơtê pêi cheăng, tiô pôa, cho tơdroăng ki krâu kơhnâ ƀă tơdroăng ki mơ-eăm châ pơtâp tung mô đô̆i.

“Tơdroăng ki vâ pro mơ-eăm cho pin thế tơkâ hluâ pá puât, ôh tá hêng vâ kơtiê, pin thế mơ-eăm. Pin hriâm ing tung đông mô đô̆i cho tơdroăng ki mơnhên khât, tơdroăng ki mơ-eăm dêi pin vâ pin rế pêi, rế pleăng ăm rơpŏng, ăm pơlê pơla’’.

Xuân môi tiah mô đô̆i hneăng hdrối nah Hán Vinh Hà, hên ngế mô đô̆i hneăng hdrối nah a Krông Ana xuân djâ ihiâm tuăn mơno tung tơdroăng rêh ối tiah hmâ rêm hâi. Ngế ‘na pro kơdroăng păn mơnăn mơnôa, ngế ‘na po tíu tê mơdró. Drêng tơdroăng rêh ối hiăng tơniăn, vâi pơtối gum khu pú ƀă kuăn pơlê rơtế mơnhông tơtêk.

Mô đô̆i hneăng hdrối nah Hoàng Văn Cư, ối a ƀuôn Trấp, nôkố pro châ tíu tê mơdró tơmeăm pêi lo ing chiâk deăng ƀă rôe tơmeăm pêi lo ing chiâk deăng tơniăn. Drêng cheăng kâ rơpŏng hiăng xông tơtêk, pôa pơtối rơtế ƀă kuăn pơlê ƀă khu mô đô̆i hneăng hdrối nah pá puât. Rêm hơnăm, péa tíu tê mơdró dêi pôa tŏng gum hên kuăn pơlê pêi chiâk deăng rôe phon rơvât mơdrếo hrá, ôh tá xo liăn rơkâ. Pôa xuân đi đo tŏng gum mâu ngế ai tơdroăng rêh ối pá puât, lăm pôu mơhnhôk mô đô̆i hneăng hdrối nah châi tamo, hiăng krâ. Mô đô̆i rong râ Lê Đắc Đạm, ối a ƀuôn Trấp, cheăm Krông Ana hơ’muăn ‘na tơdroăng cheăng pêi dêi pôa Hoàng Văn Cư:

“Tung thôn ối hên mô đô̆i hneăng hdrối nah xuân dế trâm pá puât, ôh á tŭm kơxô̆ liăn rôe phon mê châ pôa Cư tŏng gum ăm kơlo yă ki rơpâ, ôh tá xo liăn rơkâ. Tung mâu tơdroăng pêi, pơtih môi tiah rêm hơnăm cho mô đô̆i hneăng hdrối nah tơkŭm po hâi mơjiâng dêi chi hô̆i, mâu tơdroăng tơ’noăng ivá lơ pôa tŏng gum tâi tâng’’.

Tiô pôa Hoàng Văn Cư, mâu hơnăm khế tung mô đô̆i ôh tá xê to pơtâp tơdroăng ki mơ-eăm pêi cheăng kâ, mê ối pơchân rêm ngế lêng thế rêh ai hnoăng ƀă pơlê pơla, tá drêng tơplâ hiăng ôh tá ai xếo.

“Drêng mot rêh ối tung mô đô̆i, ngin châ pơtâp ‘na tơpui kâ, rêh ối, ihiâm tuăn mơno gum tung pêi cheăng. Drêng rôh tơplâ nah lơ a rơxông hơniâp lĕm xuân tiah mê, mơngế lêng thế rêh djâ troăng ahdrối vâ kuăn cháu tiô ƀối. veăng Khu mô đô̆i hneăng hdrối nah thế mơhnhôk nhŏng o rak ivá, thăm veăng hôp ƀă rơtế dêi pó veăng gum ăm pơlê’’.

Khu pơkuâ Mô đô̆i hneăng hdrối nah cheăm Krông Ana nôkố ai vâ chê 1.000 ngế. Sap hơnăm 2025, Khu mô đô̆i ôh tá ai ngế ki ối tung rơpŏng kơtiê, vâ chê môi kơpêng pái khu mô đô̆i ai tơdroăng rêh ối hiăng kro mơdrŏng. Pôa Đỗ Xuân Đản, Kăn hnê ngăn Khu mô đô̆i hneăng hdrối nah cheăm Krông Ana tối, châ tơƀrê mê cho ing tơdroăng djâ tơdroăng xiâm hriâm tâp ƀă pêi tiô Pôa Hồ a mâu tơdroăng păng ‘nâng môi tiah gum dêi pó mơnhông cheăng kâ, kơdroh kơtiê, mơjiâng thôn pơlê nếo ƀă tŏng gum khu.

Mâu tơdroăng pêi ôh tá xê to gum troh lâp lu ihiâm mơno Tơdroăng pơkâ 05 dêi Khu xiâm kal kí mê ối mơhno hnoăng, pôu râng hnoăng mô đô̆i hneăng hdrối tung rơxông hơniâp lĕm, troh lâp lu um méa ‘na ngế lêng “mô đô̆i Pôa Hồ’’, gum pơhlêh ngiâ méa thôn pơlê.

‘’Mâu kăn ƀô̆, ngế tung Khu mô đô̆i hneăng hdrối nah cheăm Krông Ana hiăng thăm tah lôi mâu pá puât vâ xông mơ-eăm tung tơdroăng rêh ối, drêng klêi pro mô đô̆i xuân hiăng rak ƀă mơnhông khôi túa lĕm tro mô đô̆i Pôa Hồ, cho ki má môi tung mâu tơdroăng mơjiâng thôn pơlê nếo môi tiah pleăng tơnêi têa, pro troăng kân, mơhnhôk tŏng gum mơngế pá puât, thăm pêi pro mâu tơdroăng cheăng gum a pơlê pơla xông tơtêk’’.

Tơplâ tơplong ôh tá ai xếo, laga mâu klâng chiâk ƀă kơdroăng păn mơnăn mơnôa hâi kố hiăng teăng ăm tíu ki ối hmuâ tung tơplâ xâ rôh ton nah. Tíu tơplâ dêi mâu ngế lêng hơnăm mê nah xuân pơhlêh tơ-ê, laga mâu tơdroăng ki khŏm mơ-eăm, tuăn ihiâm mơno kăch măng ƀă tơdroăng ki veăng gum xuân u ối. Mê xuân cho troăng pêi mâu mô đô̆i hneăng hdrối nah a Krông Ana pơtối hriâm tâp ƀă pêi tiô Pôa Hồ ƀă mâu tơdroăng pêi ki tiah kuăn pơlê rêm hâi.