Tâng pó vâ ngăn ƀai má 1 po a kố: https://vov4.vov.vn/xodang/pei-chiak-nha-nong/mau-bai-poka-pei-tham-monhong-dei-tay-nguyen-ba-poloang-monua-tung-mau-nge-pei-cheang-bai-1-kal-monge-pei-cheang-a-tiu-mojiang-tomeam-khoang-troh-pei-chiak-deang-ta-troh-cheang-a-hngei-komai-523235.vov4

Kŏng nhân Đoàn Văn Tâm, ngế nếo lo ing Pơlê kong kân Hồ Chí Minh vêh a pơlê vâ pêi cheăng a Kơpong hngêi kơmăi Becamex Bình Định (kong pơlê Gia Lai) ăm ‘nâi púi vâ châ vêh dêi a pơlê pêi cheăng ƀă tơniăn tơdroăng rêh ối kơ’nâi mâu hơnăm lối pơlê lăm tăng cheăng pêi.

“Hdrối nah, á troh a bêng Bình Tân, Sài Gòn (Pơlê kong kân Hồ Chí Minh) pêi cheăng vâ chê 10 hơnăm. Liăn khế, tá liăn mơhá tơ’nôm mê 1 khế châ 13 rơtuh, la nôkố vêh akố ối hlối pêi cheăng achê hngêi. Liăn khế ƀă liăn kâ ki pêi tơ’nôm chôu, hiăng klêi tah kơxô̆ liăn nâp ƀaoh hiêm mê ối 8 rơtuh rêm khế. Liăn khế iâ, la kơxô̆ liăn ‘no hrê iâ há xuân ối hôm tâ pêi cheăng a Sài Gòn”.

Klêi tơ’mot tơdjuôm, mâu kong pơlê a Tây Nguyên ai tơ’nôm tơdroăng tơnêi vâ mơnhông cheăng kâ, tơ’mot khu ‘no liăn pêi hên tơdroăng tơkêa bro ‘na pro kơpong hngêi kơmăi, ôm hyô, kơno têa kơxĭ  ƀă kơphô̆ tâi tâng kơxô̆ liăn ‘no lối 470.000 rơtal liăn, pơla hơnăm 2026 - 2030. Krê kong pơlê Dak Lak châ dâng 170.000 rơtal liăn. Pôa Huỳnh Lữ Tân, Ngế cheăng tung khu kăn pơkuâ hnê ngăn Đảng kong pơlê Dak Lak, Ngế pơkuâ Rak ngăn Kơpong cheăng kâ Phú Yên ăm ‘nâi, mâu tơdroăng tơkêa pro ki nếo kal troh 60.000 ngế pêi cheăng. Kố cho rôh pêi cheăng - châ tơ’mot liăn ăm kuăn pơlê, la xuân cho pơloăng mơnúa ‘na kơxô̆ pêi pro ƀă ki tơbrê lơ ôh dêi mơngế pêi cheăng:

“Ƀă tâi tâng kơlo liăn ‘no pêi hên dêi tơmeăm khoăng mâu kơpong hngêi kơmăi, tơdroăng pro tíu ôm hyô ƀă mâu tơdroăng tơkêa bro ki kŭn iâ tung kơpong hngêi kơmăi tung mâu kơpong cheăng kâ, a tơmiât  kô tơ’mot hên mơngế troh pêi cheăng. Krê Tôh hợp Hòa Phát ƀă mâu tơdroăng tơkêa bro ki ê sap nôkố troh hơnăm 2030 kô kum ăm 40.000 ngế ai cheăng pêi ăm kơpong peăng mâ Hâi lo kong pơlê Dak Lak”.

Pôa Nguyễn Quang Thuân, Phŏ Pơkuâ Tíu xiâm ngăn cheăng pêi kong pơlê Dak Lak tối, xuân môi tiah mâu kong pơlê Tây Nguyên ai ki krê xêh ‘na cheăng kâ chiâk deăng kơnôm to troh rơnó, ki kân dêi kơmăi kơmok - mơjiâng pro ối iâ; rôh vâ hriâm tâp, vâ châ to, ƀă vâ rak chêng mơngế pêi cheăng ối pá, Dak Lak trâm hên pá puât tung tơdroăng tăng tơ’mot mơngế pêi cheăng ƀă vâ rak mơngế pêi cheăng. Pôa Nguyễn Quang Thuân tối, tâng ôh tá ai luât pơkâ tŏng gum tơtro, kơxô̆ mơngế pêi cheăng kô pơtối pá nếo cho xiâm ki pro pá vâ mơnhông tơbrê dêi kong pơlê.

 “Nôkố, mâu khu mơdró ki pêi cheăng tung kong pơlê Dak Lak mơhá ăm mơngế pêi cheăng kâ liăn iâ ‘nâng tâng vâ pơchông ƀă kơpong ki ê. Xua pin cho kơpong 3, kơpong 4. Thăm nếo hên mơngế pêi cheăng lăm hriâm cheăng pêi a Pơlê kong kân Hồ Chí Minh lơ a Đồng Nai vâi khu pơkuâ cheăng mơhá ăm vâi 8,5 rơtuh liăn/khế, ki‘nâ hên tâ mê, la drêng vêh troh a Dak Lak pêi cheăng bú kâ 6 rơtuh liăn/khế. Pơtối mê nếo, tíu pêi cheăng xuân ôh tá tơ‘mô ƀă khu mơdró ki kân, ki kố xuân cho tơdroăng ki pá, mê mâu khu mơdró a Dak Lak kal thế ‘mâi hơ’lêh nếo vâ châ tơ’mot mơngế pêi cheăng, rak chêng mơngế pêi cheăng”.

Pêi cheăng ƀă Khu ngăn cheăng pêi ‘na mơngế pêi cheăng pơla hơnăm vâ mơnhông tơbrê. Pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn Tơnêi têa tối nhên: Tơdroăng rak tơniăn tơƀrê kơxô̆ mơngế pêi cheăng đi do rơtế ƀă tơdroăng mơdêk ki tơƀrê tung cheăng ăm mơngế pêi cheăng; tơ’mot mơngế cheăng ôh ti xê to luât pơkâ mơngế pêi cheăng mê ối rơtế ƀă luât pơkâ tŏng gum hdrông mơngế, kuăn ngo, mơnhông kuăn mơngế ƀă ’mâi mơnhông tuăn loi tung kuăn pơlê.

Mơhé ôh tá tối ‘na tơdroăng krê dêi mâu kong pơlê Tây Nguyên la troăng hnê mơhno dêi pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn Tơnêi têa tơpui tối a rôh pêi cheăng mê, hiăng tối tro tơdroăng dêi Tây Nguyên tung luât pơkâ mơnhông mơngế pêi cheăng, mê “thế rơtế ƀă tơdroăng cheăng kâ dêi tơrêm kơpong, tơrêm hdrông kuăn ngo, tơrêm kuăn pơlê”; rơtế ƀă rak vế túa lĕm tro, kring vế hyôh kong prâi, rak kong, rak tơnêi, râk kơnhŏng têa, râk ngăn tíu tơkăng kong tơnêi têa”.

Kăn xiâm pơkuâ hnê ngăn Đảng, Kăn xiâm hnê ngăn Tơnêi têa tối nhên troăng hơlâ ki nhên khât cho hnoăng pêi pro dêi Tơnêi têa ƀă mâu tơdroăng cheăng khŏm thế pêi.

“Tơnêi têa kơjo kum pro tơmeăm khoăng mung liăn, tối mâu tơdroăng ăm ‘nâi, hnê ‘na luât, khu mơdró kâ, khu pêi cheăng tơrŭm, tíu pêi cheăng kâ, tơrŭm tá khu mơdró lăm rôe tơmeăm hnê kih thuât, mơjiâng inâi, pơkâ pêi lĕm tơbrê, kong pơlê tơkŭm tơdjêp pêi cheăng tơniăn, kơdroh lăm pro pơlê nếo hmâng vâ, pêi cheăng tơƀrê, tro xúa ki tro, tro hêak pơloi. Mơnhông cheăng pêi a kơpong kuăn ngo rơtế ƀă pơtối rak túa lĕm tro, rak vế hyôh kong prâi, rak kong, râk tơnêi, rak kơnhŏng têa, rak tíu tơkăng kong pơkâ ôh ti xê to tơ’nôm cheăng pêi mê ối thế pêi cheăng tơtro ƀă tơmeăm khoăng ai hlâu, túa lĕm tro, túa tơlá pêi chiâk, kum kuăn pơlê tơniăn tung rêh ối, kơdroh klêa xăm kơtiê krá ton, khên tơnôu tơrŭm, veăng ‘no hnoăng mơnhông tơdjuôm tơnêi têa”.

Ki khât sap ing chiâk deăng troh tíu ki mơjiâng tơmeăm khoăng, mâu tơdroăng tơkêa bro kân a mâu kong pơlê Tây Nguyên, troh mâu tơdroăng hnê mơhno, troăng pêi pro dêi kăn hnê ngăn Đảng ƀă Tơnêi têa xuân ăm hlo, hnê mơngế pêi cheăng hlối vâ ai mơngế pêi cheăng tiô púi vâ pêi cheăng a ngiâ, hlối vâ hbrâ ăm kâi tơbriêt cheăng tung ton hơnăm. Mơngế pêi cheăng tŭm ‘na kơxô̆, krá ‘na pêi lĕm kô cho xiâm ki kal vâ mâu tơdroăng tơkêa bro pơtối pêi ai pơxúa, tơƀrê tiô pơkâ tâk 2 kơxô̆, hlối xo xiâm vâ mơjiâng môi Tây Nguyên ngiât lĕm, hên túa, vêa vong, môi kơpong kuăn ngo kơpong tơkăng kong dêi tơnêi têa krá kak.

Vâ ai khât tơdroăng mê, mâu kong pơlê a Tây Nguyên ôh ti xê to kal pêi pro tiô tơdroăng pơkâ tŏng gum kơjo pro tơmeăm khoăng, mung liăn vâ pro tơmeăm khoăng, tơdroăng nếo ai, hnê mơngế pêi cheăng môi tiah Kăn xiâm pơkuâ hnê ngăn Đảng, Kăn xiâm hnê ngăn tơnêi têa hiăng mơhno, mê ối thế pêi tro khât tung tơkâ luâ tơdroăng pá tung pêi cheăng vâ châ tâk môi tiah nôkố, tơniăn ‘na cheăng pêi, pêi lo liăn ƀă rêh ối tơniăn ăm mơngế ki pêi cheăng.