Tiô tối tơbleăng ‘na hnê mơhnhôk kuăn pơlê, Kăn pơkuâ Vi ƀan Hnê mơhnhôk ƀă séa ngăn pâ thế Chin phuh tơkŭm hnê mơhno hên hnoăng cheăng ki kal pêi pro tơdrêng séa ngăn, pêi pro nhên tơdroăng ki tơ’noăng môn Toán hlo ôh tá tơdrăng a Tuyên Quang; thăm plâ mơdât tơdroăng ki mơjiâng pro, tê mơdró kế tơmeăm ôh tá xê khât, kế kâ ôh tá xê khât, pơkeăng ôh tá xê khât; mơdêk rơdêi tơdroăng ki hbrâ mơdât pơreăng tơngê lo mơheăm; pơxâu phâk mâu ngế ki pro xôi tung tơdroăng cheăng mơjiâng pro; rak vế tơniăn hbrâ mơdât on chếo, trếo pơtôu, tơniăn tung troăng têa kơxĭ ƀă pơkâ tơleăng klêi mâu tơdroăng ki pơsăm tối hên ngế, ton hâi khế.

Hlo tiah kố, mâu rơkong pâ thế sap ing mâu tơdroăng ki dế tơdjâk tơdrêng troh hnoăng pơxúa ƀă tơdroăng rêh ối dêi kuăn pơlê. Tung mê, tơdroăng ki tê mơdró kế tơmeăm ôh tá xê khât, kế kâ ôh tá xê khât ƀă pơkeăng ôh tá xê khât dế pro kuăn pơlê tôu tuăn xua ôh tá xê to tơdjâk troh ivá mê ối pro tơdjâk troh tuăn mơno loi tơngah dêi kuăn pơlê, pro tơ’nhiê ăm khu mơdró kâ ki pêi cheăng tơdrăng. Ki rơhêng vâ tối, tơdroăng pơkuâ ngăn yă tê tơmeăm tung kơchơ tê mơdró xuân châ hên mâu kăn tơpui tối. Pôa Nguyễn Thanh Hải, Ngế pơkuâ Vi ƀan Khoa hok, Kong ngê̆ ƀă Hyôh kong prâi tối tiah kố, kal tối tơbleăng nhên tâ mâu tơdroăng ki tôu tuăn dêi kuăn pơlê ‘na ki ôh tá tơniăn dêi yă tê mâu kế tơmeăm tung pơla hdrối kố nah.

“Kuăn pơlê xuân ai rơkong tối tơbleăng môi tiah mê. Drêng yă têa châu têa kơxăng tung lâp plâi tơnêi to kơnâ, yă tê mâu kế tơmeăm tung kơchô tê mơdró xuân hlo tâk tiô há ƀă hên ki ê. La drêng yă têa châu têa kơxăng kơdroh yă tung kơchơ tê mơdró ôh tá kơdroh lơ chu la hrá. Xiâm kối ulâi? Pơkuâ ngăn ‘na yă tê, pơkuâ ngăn tơnêi têa tung kơvâ cheăng kố ki nhên gá môi tiah lâi ƀă hnoăng pôu râng gá tiah lâi?”.

Kố xuân cho tơdroăng ki ai khât ki hên kuăn pơlê hlo nhên tung tơdroăng rêh ối rêm hâi. Yă têa châu têa kơxăng hmâ châ ngăn cho tơdroăng ki kal dêi hên kơvâ cheăng mơjiâng pro pơto chơ tơmeăm. Laga, drêng yă têa châu têa kơxăng chu kơdroh, hên mâu kế tơmeăm xuân ối rak vế a kơlo hên ki kơnâ, pro kơxô̆ liăn ‘no hrê roê xúa dêi kuăn pơlê tá hâi châ pơhlêh tơ’mô. Tơdroăng kố pơkâ thế ƀă mâu kơ koan pơkuâ ngăn tung tơdroăng ki thăm lăm séa ngăn kơchơ tê mơdró, mơdât tơdroăng ki gô̆m tơmeăm, rak vế tơniăn tơdroăng ki tơxup tơbriât ó tung tơdroăng ki pơkâ pro yă.

Môi tơdroăng ki kal châ ‘nâi plĕng dêi kuăn pơlê cho tơdroăng ki ôh tá tơdrăng tung rôh tơ’noăng môn Toán a Hneăng tơ’noăng mơgêi râ má pái Trung hok phôh thong hơnăm 2026 a Tuyên Quang. Tung pơla hneăng tơ’noăng kố gá ai pơxúa khât ƀă lối rơtuh ngế hok tro ƀă rơpŏng hngêi vâi, mâu tơdroăng ki hlo ôh tá tơdrăng mê pơrá kal châ séa ngăn kơtăng vâ rak vế tơdroăng ki tơdâng tơ’mô. Pôa Nguyễn Văn Thắng, Phŏ Ngế pro xiâm hnê ngăn Chin phuh ăm ‘nâi:

“Ƀă mâu tơdroăng ki kuăn pơlê kal vâ ‘nâi plĕng môi tiah tơdroăng ki tơkŭm po hneăng tơ’noăng râ má pái trung hok phôh thong hơnăm 2026, tơdjâk troh rôh tơ’noăng môn Toán a Tuyên Quang, Chin phuh hiăng pơkâ hnê mơhno kơtăng Khu xiâm ngăn hnê hriâm ƀă hnê mơjiâng tuăn ngoâ rơkê rơtế ƀă mâu kơ koan ki ai tơdjâk rĕng lăm ngăn, mơnhên tơdrăng, tŭm. Tâng hlo pro xôi athế phâk kơtăng tiô luât pơkâ, rak vế tơdroăng ki tơdâng tơ’mô ăm mâu hok tro ki ê ƀă rak vế tơdroăng loi khât dêi kuăn pơlê ƀă kơvâ hnê hriâm”.

Hnê mơhno dêi Chin phuh mơhno túa tơmiât cho pôi tá ví, pôi tá kơtoâ ăm ngế ki pro xôi mâu tơdroăng ki châ pơlê pơla kal vâ ‘nâi. Xua rơtế ƀă tơdroăng ki pơxâu tro mơngế, tro ngế ki xôi, tơdroăng ki kal tâ cho ‘mâi mơnhông tơdroăng loi dêi kuăn pơlê tung tơdroăng pêi pro kơtăng dêi luât ƀă tơdroăng ki tơdâng tơ’mô tung hnê hriâm.

Sap ing tơdroăng ki châ tơpui tơno a Rôh hôp má 4 dêi Vi ƀan pơkuâ Kuô̆k hô̆i mê pin hlo, cheăng hnê mơhnhôk rế hía rế pêi pro tro ƀă tơdroăng ki ai khât tung rêh ối. Rêm tơdroăng pâ thế dêi kuăn pơlê ôh tá xê tối tơbleăng tuăn mơno púi rơhêng vâ dêi kuăn pơlê mê ối cho “loăng rêk vê” ki tơƀrê pơkuâ ngăn tơnêi têa a rêm kơvâ cheăng.