A tôh kuăn pơlê kơphô̆ Bon Đưng 1, bêng Lang Biang - Đà Lạt, pôa Păng Ting Son, mơngế K’Ho hdrông Lạch, hên hơnăm kố xuân kơhnâ hnê tô̆ng chêng, hnê tơdroăng rơngêi ting ting, hnê mâu tơdrá prôa ton nah. Cho Kăn hnê ngăn Chi ƀô̆, hlối cho ngế pơkuâ khu tô̆ng chêng Bon Đưng ai 15 ngế, đi đo ngăn tơdroăng pơtối rak túa lĕm tro chal krâ nah cho hnoăng pêi pro dêi tơná ƀă kuăn pơlê:

“Tâng pin ôh tá râk vế tơdroăng ki lĕm ton nah mê kô hía tâi túa lĕm tro pin. Ƀă mâu ngế kuăn ngo a chêng ngo Langbiang vâ tơdroăng ki lĕm ton nah châ pơtối hnê ăm kuăn cháu, málối túa lĕm tro tŏn chêng, klêi mê rơngêi ting ting. Pơtối rak túa lĕm tro ton nah dêi kuăn ngo tơná hlối hnê ăm mâu vâi o rơxông kơ'nâi”.

Ing mâu ngê̆ nhân hiăng krâ a mâu thôn, pơlê dêi kong pơlê Lâm Đồng, tơdroăng vâ bă túa lĕm tro ton nah dế châ hnê ăm mâu rơxông kơ’nâi. Tơmâng xo ing mâu ngê̆ nhân hơnăm hiăng krâ hnê ăm, mâu hơnăm ối nếo nôkố xuân dế pơtối rak vế túa lĕm tro dêi kuăn ngo. Ngoh Kră Jăn Jun Guy, mơngế K'Ho hdrông Lạch ối a tôh kuăn pơlê kơphô̆ Dang Ja, bêng Lang Biang - Đà Lạt cho ngế ối tung khu ngê̆ nhân ki 22 ngế. Ƀă ngoh, rêm rôh lăm mơđah tŏn chêng ôh ti xê to vâ tơbleăng túa lĕm tro mê ối cho túa vâ mơhno ăm rơxông ối nếo hlê tơ’nôm hâk tơngăm dêi xiâm rêi tơná. Ngoh Kră Jăn Jun Guy tối:

 “Tŭm tơdroăng ki lâi jâ pôa pin ‘măn ăm môi tiah hơdruê rơngêi ting ting, hlŭm rơvŏng, xuân môi tiah túa kơ’nhon xuăng tiô chal krâ nah… kal thế pơtối rak vế ƀă hnê ăm mâu rơxông kơ’nâi hlê. Pin ôh tá chiâng ăm hía lôi mâu tơdroăng ki lĕm vêa dêi kuăn ngo tơná”.

A tơdế kong ngo Lang Biang, idrâp chêng xuân ối chuât xơtó rêm rôh pơlê po mơdĭng. A mâu loăng teăn dêi vâi jâ vâi nâ, tơrêm kơxái prế xuân ối teăn rơneăm mâu um reăng um kuăn mơngế lĕm tiô tuăn tơmiât hriĕn rơneăm pro dêi mâu rơxông. Jâ Bon Jô Liên, Phŏ Kăn hnê ngăn Vi ƀan Măt trâ̆n Tơnêi têa Việt Nam, Kăn hnê ngăn Khu ngăn vâi kơdrâi bêng Lang Biang - Đà Lạt, tối:

"Mâu ngế kuăn pơlê pâ nhoăm a bêng Langbiang - Đà Lạt rak tơdroăng ki kal. Vâi cho kông tơdjêp pơla Đảng ƀă Kuăn pơlê ‘na  troăng hơlâ, luât pơkâ dêi Đảng, Tơnêi têa vâ ing mê kô achê kuăn pơlê ƀă Đảng tâ, achê Tơnêi têa tâ. Ki hdrối vâi cho mơngế djâ troăng lĕm prôk hdrối, klêi mê hnê ăm rơpŏng hngêi ƀă kuăn pơlê rơtế pêi pro mâu troăng hơlâ  dêi Đảng, Luât dêi Tơnêi têa ăm itro tâ”.

A cheăm Đơn Dương tíu kuăn pơlê kuăn ngo ai hên vâ chê 40% pơ’leăng mâ mơngế, hên pơlê pêi cheăng tiô hmâ ing nah ƀă mâu kâu lăk ƀô̆ toăng chêng pêi cheăng tơƀrê kơnôm rơtế ƀă mâu khu ki mê. Jâ Lê Thị Hồng Nhung, Phŏ Ƀơrô ngăn Túa lĕm tro - Pơlê pơla cheăm Đơn Đương ăm ‘nâi:

“Cheăm Đơn Dương ai mâu pơlê pêi cheăng pro hnâng ƀă hâu a thôn Ha Wai, klêi mê teăn pong a thôn Dà Hoa, klêi mê nếo mâu Kâu lak ƀô̆ tŏn chêng. Mâu ngế kuăn pơlê pâ nhoăm tơrŭm hnê troăng hơlâ dêi Đảng xuân môi tiah hnê, hlối pơtối rak ki kơnía dêi tơdroăng cheăng pêi tiô túa ton nah a pơlê cheăm. Vâi tơrŭm ƀă Kăn thôn, kăn hnê ngăn Chi ƀô̆ xuân môi tiah mâu khu râ, kơvâ cheăng, mâu grup, mâu tíu ngăn ‘na tơdroăng khôp rơtế ƀă pơlê cheăm tung tơdroăng pơtối rak túa tơlá ton nah ki lĕm tro”.

Ing mâu loăng teăn a Dà Huoai, Cát Tiên troh idrâp chêng chuât xơtó lâp lu kong ngo Langbiang, kô mơhno ăm hlo túa lĕm tro dế châ tơbâ pơtối rak vế ƀă kơpeăng kŏng dêi kuăn pơlê. Tơmeăm lĕm tro ton nah châ râk vế, pơtối hnê ƀă mơnhông ôm hyô xuân môi túa ki vâ pơ’lêh pơxúa lĕm tro chiâng tơdroăng ki xiâm mơnhông cheăng kâ, mơjiâng Lâm Đồng mơnhông tơƀrê rĕng, krá ton.