Rơpŏng ngoh Điểu Đên cho môi tung 60 rơpŏng hdrông kuăn ngo a ƀon Bu Lum, cheăm Quảng Trực, kong pơlê Lâm Đồng lăm mot ối tung hngêi ki nếo pro klêi krá kâk xua tơnêi têa pro ăm. Tơdroăng ki hơniâp ro dêi ngoh ƀă tá vâi krâ kuăn pơlê rế ro tâ drêng hngêi nếo klêi pro hlối ai troăng klông on tơhrik, hngêi trung hriâm, hngêi pơkeăng pơlât hiăng ai tŭm tâi tâng. Ngoh Điểu Đên tối, on tơhrik a hngêi ki nếo pro gá têi ƀă tơniăn, iâ trâm tơdroăng ki pâ on tơhrik mê ngoh hiăng ‘no 2 rơtuh liăn châ tơnêi têa diâp ăm vâ roê hdro pế hmê ƀă on tơhrik, hdro ki pế têa tôu xúa on tơhrik. Nôkố on veăng ngoh kô kơdĭng liăn vâ roê tơ’nôm kơtuh hngíu, karaoke vâ hơdruê hêi ro ƀă ngoh hlối rơhêng vâ mâu kơpong hdrông kuăn ngo a mâu cheăm ki ê xuân châ tŏng gum môi tiah mê há. Ngoh Điểu Đên tối:

"Á hlo Đảng, Tơnêi têa tơmâng ngăn khât troh hdrông kuăn ngo a tíu tơkăng kong. Tung pơlê kố vâi krâ nhŏng o phiu ro khât, vâi krâ nhŏng o lôi tâi hngêi ki ối a hngế vâ lăm troh ối akố xua akố gá lĕm tâ, ai on tơhrik tơ’lêi hlâu tâ. Á rơhêng vâ tơnêi têa séa ngăn, tơmâng tŏng gum troh mâu pơlê cheăm ki ê, mâu rơpŏng ki tá hâi ai on tơhrik vâ vâi xuân châ pơxúa ‘na tơdroăng rêh ối tơniăn lĕm môi tiah akố há”.

Ối a kĭng ƀon Bu Lum cho ƀon Bu Dar. Sap ing ai on tơhrik tơnêi têa, hên rơpŏng hngêi vâi hiăng krâ ‘măn xêh pul on ƀă camera séa ngi troăng, rế séa ăm bâ eăng prôk lăm tơ’lêi hlâu a kong măng drêng kong mêi khía, rế teăm tŏng gum ngế ki prôk lăm troăng drêng trâm tơdroăng xía vâ ƀă tá tơdroăng ki rĕng châ hlo khu mâu ngế ki tong hvĕang a kong măng. Cheăng pơkuâ ngăn pơlê dêi Ngế pơkuâ ƀon Bu Dar cho pôa Vũ Minh Tiến tơ’lêi hlâu, tơƀrê tâ tung tơdroăng ki châ hlo mâu tơdroăng ki ôh tá tơniăn.

"On tơhrik vêh mê pơhlêh hên ăm ngiâ méa dêi cheăm tơkăng kong, vâi krâ nhŏng o phiu ro khât. Tung pơlê kố hmâ 2, 3 rơpŏng xúa tơdjuôm môi công-tơ vâ tôh hdrê loăng pêt xua on tơhrik 3 pha tơ’lêi hlâu tâ hên tâng vâ pơchông ƀă kơmăi ki tôh ok têa châu. On tơhrik séa bâ eăng vâ pro kơdroh ‘na tơdroăng tơklâm rơxế a troăng, hên rơpŏng ối krâ camera vâ hbrâ mơdât mâu ngế ki tong hơ’vĕng”.

Tơdroăng ki troăng kơxái on tơhrik tơnêi têa châ pro troh a kơpong tíu tơkăng kong hiăng pro tơ’lêi hlâu vâ tíu pêi cheăng kố pêi pro tơƀrê tơdroăng cheăng pơkuâ ngăn, rak vế hnoăng pơkuâ, gâk kring tíu tơkăng kong tơnêi têa. Tiô Thươ̆ng tă Phan Văn Khá, Chính trĭ viên Đông Mố đô̆i gâk tơkăng kong Bo cheăng Bu Prang, troăng kơxái on tơhrik châ pro, ‘mâi mơnhông ƀă rak vế tơdroăng pêi cheăng kâ tơniăn tơƀrê tung hnoăng cheăng pơkuâ, rak vế tơbleăng tơdroăng kal tung pêi pro hnoăng cheăng. Thươ̆ng tă Phan Văn Khá ăm ‘nâi tơ’nôm.

"Cheăng tâp trăng ‘nhâng kơxái on tơhrik troh a kơpong hngế hngo hiăng pro mơnhông cheăng kâ ƀă rak vế gâk kring cheăm bêng. Ƀă vâi krâ kuăn pơlê, drêng ai on tơhrik mê chiâng tơ’lêi hlâu vâ xúa mâu rơxế, khoa hok kih thuât vâ mơnhông cheăng kâ, tơniăn tung tơdroăng rêh kâ ối. Ƀă mâu kăn ƀô̆ mố đô̆i tíu pêi cheăng, on tơhrik gum vâi pêi pro tro hnoăng cheăng lêng gâk kring, tíu tơkăng kong, mơdêk rơdêi pơhlêh xúa mâu tơdroăng ki chêh ‘măn tơdroăng kal tung internet”.

Pôa Trần Minh Huy, Ngế xiâm Ngăn on tơhrik Tuy Đức, Kŏng ti On tơhrik Lâm Đồng (Kŏng ti xiâm On tơhrik peăng Hdroh), ăm ‘nâi a cheăm tíu tơkăng kong, cheăng ki rak tơniăn ‘no on tơhrik ƀă ‘no pơtối hlối ôh tá xê gum to ăm cheăng mơnhông cheăng kâ rêh ối pơlê pơla mê ối veăng gum kăn pơkuâ ƀă khu ki ai tơdjâk troh rak vế krá tơniăn pơlê pơla cheăm bêng, mơjiâng kơpong tíu tơkăng kong tơniăn.

"Tuy Đức cho cheăm tơkăng kong mê troăng prôk on tơhrik xơpá la kơnôm châ tơmâng ngăn tŏng gum pro ăm mê troh nôkố on tơhrik a pơlê hiăng ai tơniăn, 99% cheăm pơlê ai on tơhrik. Mâu tơdroăng tơkêa pro on tơhrik tơniăn a tíu tơkăng kong ăm kuăn pơlê ối, rak tơniăn mơ’no on tơhrik ăm gâk kring tơniăn pơlê pơla cheăm bêng”.

Xuân môi tiah mê, on tơhrik cho tơdroăng ki hiăng gum tung mơnhông cheăng kâ, tơniăn tơdroăng rêh kâ ối, kring vế gâk kring kơpong hngế hngo, kơpong tơkăng kong cheăm Dak Wil, kong pơlê Lâm Đồng. Mâu hơnăm hdrối nah, on tơhrik tơnêi têa hiăng chiâng ivá ki kal mơdêk cheăng kâ a kong pơlê. On tơhrik ‘no tơniăn gum kuăn pơlê khên tơnôu ‘no liăn roê kơmăi kơmok tôh têa kơdĭng, ư̆ng yŭng khoa hok kih thuât tung cheăng kâ, mơdêk ki dâi lĕm mâu hdrê loăng pêt môi tiah kơphế, tiu, sầu riêng ƀă hên hdrê loăng pêt ki ê. Pôa Hoàng Văn Tám, kăn hnê ngăn Vi ƀan cheăm Dak Wil mơnhên tối:

“Cheăm mơnhên tối khât tơdroăng ki veăng gum dêi kơvâ cheăng on tơhrik tung tơdroăng ki ‘mêng rơnêu troăng kơxái on tơhrik a cheăm tơkăng kong Dak Wil, pro kơdroh kơtăn pơla thôn pơlê cheăm ƀă mâu cheăm bêng ki ê. On tơhrik châ ‘no tơniăn ăm tơdroăng cheăng kâ, pơhlêh ngiâ méa thôn pơlê, pro tơ’lêi hlâu ăm cheăm ai on tơhrik bâ eăng, kuăn pơlê prôk lăm tơ’lêi hlâu, tơniăn a troăng prôk, rak vế gâk kring tơniăn, hbrâ mơdât mâu ngế pro xôi”.

Troăng kơxái on tơhrik ôh tá xê xúa tung tơdroăng pêi cheăng ăm kuăn pơlê, mê ối rak tơniăn tơdroăng ki ‘no on tơhrik ăm mâu tíu ối tơkŭm, mâu đông mố đô̆i gâk tơkăng kong ƀă khu ki ai tơdjâk troh dế hâi măng pêi dêi hnoăng rak vế tơkăng kong. Malối, mâu tơdroăng tơkêa bro tơniăn tíu kuăn pơlê ối kơpong tơkăng kong cho troăng hơlâ pêi ki kân dêi Tơnêi têa; tung mê, on tơhrik châ mơnhên cho môi tung mâu tơdroăng ki kal vâ kuăn pơlê tơniăn rêh ối pêi cheăng.