Apoăng khế 7 pơla hdrối kố nah, roh Po tơ’noăng Tơdroăng Voh tiô chal krâ, cho Võ đường Bình Định tơbriât Cup Hoàng Đế Quang Trung roh má VIII hơnăm 2026 hiăng châ tơkŭm po kâ krip, tâi tâng ai 700 ngế voh sư ki veăng tơ’noăng, mâu ki mơhriâm voh lo ing 75 toăng hngêi trung ƀă kâu lăk ƀô̆ tung kong pơlê, ƀă kong pơlê ki ê. Pôa Bùi Trọng Hiếu-Phŏ Ngăn ‘na Túa lĕm tro, Tơ’noăng Ivá ƀă Ôm hyô kong pơlê Gia Lai ai hâk tơngăm tối, voh tiô chal krâ Bình Định cho tơdroăng ki hiăng châ hnê mơjiâng ing chal vâi krâ tung mơjiâng, mơnhông tơnêi têa dêi hdrông mơngế.

“Hâi lơ 31/3/2025, Ngế pro xiâm hnê ngăn Chin phuh hiăng ăm phep pơtroh hô sơ vâ pơtroh ăm UNESCO séa mơnhên ngăn chêh inâi Voh chal krâ Bình Định mot tung Inâi Tơdroăng ki lĕm tro ki kơnía dêi kuăn mơngế tung lâp plâi tơnêi. Kố cho vâ mơhno tối tơdroăng ki ‘lo hơniâp ro păng ‘nâng ƀă tơdroăng Voh chal krâ dêi Bình Định, ôh tá xê to tuăn mơno ki hâk tơngăm dêi tơmeăm khoăng, tơdroăng ki kơnía dêi lâp tơnêi têa châ mơnhông troh a lâp plâi tơnêi, mê ối tơveăng gum thăm mơdêk tuăn i hiâm, pôu râng hnoăng cheăng dêi pơlê pơla tung tơdroăng ki veăng rak vế, pơtối mơdêk mâu tơdroăng ki kơnía git túa lĕm tro dêi hdrông kuăn mơngế”.

Ing hâi lơ 26/7 troh hâi lơ 2 khế 8 la ngiâ, kô po Hneăng ki tơbriât Pro Voh chal krâ pơla mâu Kâu lăk ƀô̆ lâp plâi tơnêi kô po a Qui Nhơn-Gia Lai, ai dâng 650 ngế ki tơ’noăng, tung mê ai tá mâu voh sih, kô tơ’noăng dêi pó ‘na túa ki prôk, tơdúa ƀă tơvoh tơchok dêi pó ngăn kơbố ki rơkê ƀă ai ivá ó rơdêi tâ. Pakĭng tơdroăng tơ’noăng, Khu hnê mơhno mê ối ăm mâu khu voh sih dêi lâp plâi tơnêi châ lăm pôu ngăn a tíu krip tơdrŏm An Khê Trường, Chuô Long Phước ƀă thôt Bánh Ít vâ tí tăng hlê plĕng ‘na túa lĕm tro, tơdroăng chal krâ nah ƀă mâu tơmeăm dêi kơpong tơnêi a Gia Lai.

Pơtối mê, ing hâi lơ 2 troh lơ 5/8, Hneăng tơ’noăng Voh chal krâ nah Việt Nam ki po kân Lâp plâi tơnêi roh má IX  – Gia Lai hơnăm 2026 kô po a bêng Quy Nhơn ƀă mâu bêng ki ê ki ối tâ tá achê, dó inâi “Voh chal krâ nah Việt Nam-Tơdroăng kơnía ki bâ eăng”. Tơdroăng kố kô tơkŭm 16 khu ki voh dêi lâp plâi tơnêi vâi lo ing 9 to kong têa, rơtế ƀă 43 khu voh tung tơnêi têa ƀă 11 Kâu lăk ƀô̆ voh thuât dêi kong pơlê kố.

Ki kal má môi dêi roh tơ’noăng kố, mê cho roh ki mơđah dêi lối 1.000 ngế voh sư, mâu ngế ki hriâm voh, mê cho vâi kô mơđah dêi túa ki hvêa prôk, tơdúa ƀă tơdroăng ki mơhno tối ki rơkê ’na chêng kŏng-vâi hmâ tối dêi ƀai quyền, ki hiăng ai sap ing nah dêi kơpong tơnêi Tây Sơn, mơhno tối hiâm mơno ki khên tơnôu ƀă túa lĕm tro ‘na voh, ‘na túa tơchok tiô chal vâi krâ nah dêi Bình Định. Ki nếo dêi roh tơ’noăng a hơnăm kố, mê cho tơdroăng ki veăng rơtế mơđah kơdrâm mơngế, vâ ing mê, tơveăng ăm hnoăng ki vâ chêh bro hô sơ vâ ăm thế Voh chal krâ Bình Định pơtroh ăm UNESCO chêh inâi cho Tơdroăng, tơmeăm khoăng ki kơnía git, lĕm tro teăng mâ tơdroăng ki lĕm tro dêi lâp plâi tơnêi.

Tiô jâ Nguyễn Thị Thanh Lịch-Phŏ kăn hnê ngăn Vi ƀan kong pơlê Gia Lai tối, kong pơlê kố dế chôa ‘lâng mơnhông túa “cheăng kâ ‘na tơdroăng, ‘na tơmeăm khoăng ki kơnía git”, tung mê, voh tiô chal krâ nah châ vêh mơnhên tối cho môi tung mâu túa ki lĕm tro, ki xiâm vâ mơnhông kơvâ ôm hyô, túa lĕm tro ƀă thăm mơdêk tung tơrŭm tơpui kâ ƀă mâu kong têa vâi ê tung lâp plâi tơnêi. Klêi kơ’nâi rêm roh tơ’noăng kố, mâu túa ki tơchok, tơvoh tung tơnêi têa ƀă kong têa ê thăm ai tơ’nôm roh ki trâma mâ, tơpui tơno, mơhriâm dêi pó, hlê plĕng dêi pó hên tâ nếo ing tơdroăng ki lĕm tro dêi túa voh, ing mê, hnối vâ thăm mơnhông ki tơrŭm ƀă po lân rơdâ hiâm mơno ki lĕm tro, ‘nâi rak vế dêi châ chăn, hiâm mơno tơná, khên tơnôu cheăng dêi mơngế Việt Nam.

“Ki xiâm dêi hnoăng cheăng ki tơ’noăng kố, mâu khu ki ngăn ‘na tơdroăng voh, túa tơchok kố hiăng châ tơpui tơno ƀă dêi pó, ki rơhêng vâ tối châ tơlôm, châ trâm pơla mâu kong têa, mơngế ki rơkê dêi kong têa vâi ê, tơdrêng amê, hnối tối tơbleăng, mơhno tơdjâ ki rơkê kơnía dêi túa voh chal vâi krâ nah dêi kong pơlê tơná troh hên mâu kong têa ê ‘nâi, hlê plĕng. Mơni xuân u ối ‘na túa lĕm tro vâi ga phá tơ-ê iâ, phá ‘na nâl tơpui, la ga, klêi kơ’nâi ing mâu tơdroăng ki trâm hlo dêi pó ‘na mâu túa ki voh, ki tơchok kố ga thăm pro rế ai tơdroăng ki tơrŭm cheăng. Ƀă hiăng hên hơnăm hdrối mê hía nah, voh tiô chal krâ dêi kong pơlê kố hiăng châ hên tơdroăng ki veăng vâ môi tuăn ing mâu túa voh dêi lâp plâi tơnêi. Klêi kơ’nâi 9 hneăng po roh tơ’noăng, hiăng mơjiâng, djâ troăng ăm hiâm mơno, tơdroăng ki tơveăng gum kân khât dêi mâu kong têa ê tung lâp plâi tơnêi”.

Ing mâu roh ki tơ’noăng tơchok, tơvoh dêi pó ki ó kân khât troh a mâu tơdroăng ki mơđah prôk, tơdúa kơdrâm kơdrĕng châ troh a rơpâu kuăn mơngế, ing mâu roh ki trâm tơpui tơno mơhno tối ‘na túa lĕm tro ing hiâm mơno púi rơhêng vâ mơnhông tơdroăng, kế tơmeăm Việt Nam châ mơnhông troh lâp plâi tơnêi, ing mê, khu tơdroăng voh, túa tơchok tiô chal krâ nah dêi Gia Lai dế ăm hlo, ivá ki rêh ối ó rơdêi dêi tơdroăng ki ôh tá xê to rak vế to tung troăng ki têk dêi chêng kŏng, mê ối châ vâ pơtối tơdjêp ƀă tuăn i hiâm mơno pâ, tuăn mơno hâk git, ƀă pôu râng hnoăng dêi hên rơxông a hâi kố.