Kố cho tơdroăng tơkŭm po ki kân ô eăng kơvâ pêi chiâk deăng ki xiâm, tơdrêng amê hlối mơđah tơbleăng inâi, túa lĕm tro ƀă um méa kong pơlê. Pôa Đào Mỹ, Phŏ kăn hnê ngăn Vi ƀan kong pơlê Dak Lak ăm ‘nâi, po mơđah tơbleăng cho tơdroăng ki kal tơdjêp kăn pơkuâ, ngế ki pêt, khu mơdró kâ ƀă mâu khu ki tơrŭm tung tơnêi têa, kong têa ê. Ing mê, tơdroăng kố kô mơdêk po rơdâ kơchơ tê plâi ngi kong têa ê ƀă tơ’mot ‘no liăn cheăng tung kong pơlê.

Tiô Khu tơkŭm po, po mơđah hơnăm kố ai 17 tơdroăng ki xiâm môi tiah: rôh po kơchơ mơđah tơbleăng tơmeăm OCOP, rôh hôp tơdjêp tê, po mơdĭng kế kâ, tơdroăng livestream tê plâi ƀă mâu tour ôm hyô troh a kơpong pêt. Tíu nếo dêi hneăng mơđah tơbleăng kố cho thăm mơnhông tơdjêp ôm hyô pêi chiâk ƀă túa lĕm tro kong pơlê Tây Nguyên, tơhrâ kô pro chiâng rôh ki hơniâp ro ƀă djâ vế hên tơdroăng ro ăm tơmối ki lăm ngăn.