Kơxo lơ 21/7, a Hà Nội, Vi ƀan Măt trâ̆n Tơnêi têa Việt Nam pơlê kong kân Hà Nội tơkŭm po trâm mâ, pâ mơnê mô đô̆i hneăng hdrối nah, mô đô̆i châi rong ki kơhnâ rơkê ƀă khu ngế ai tơdroăng rêh ối pá puât klăng leh tơbâ 79 hơnăm Hâi mô đô̆i Rong râ – Hlâ hiá (27/7).

Veăng rôh leh ai pôa Nguyễn Văn Phong, Phŏ Kăn pơkuâ hnê ngăn cheăng Đảng pơlê kong kân Hà Nội rơtế mâu Nôu Việt Nam khên tơnôu ƀă 130 mô đô̆i hneăng hdrối nah ki kơhnâ rơkê. Cho pơlê kong kân ai kơxô̆ rơpŏng ai hnoăng tơnêi têa kân má môi lâp tơnêi têa ƀă lối 800.000 ngế, Hà Nội đi đo nhuô̆m tơdroăng pêi cheăng “Khíu mơnê ngế ai hnoăng” cho hnoăng cheăng kal kí ki kal ƀă pôu râng hnoăng krip krih.

Hơnăm 2025, pơlê kong kân hiăng mơhnhôk kơxô̆ liăn kơdĭng “Khíu mơnê mâu ngế ai hnoăng” châ lối 26 rơtal liăn, diâp hrĭng rơpâu kơxuô tơmeăm, rơnêu bro hên tơmeăm mơnhên hnoăng ƀă tŏng gum rơnêu hngêi ối ăm mâu ngế ai hnoăng tơnêi têa. Roh leh tơbâ hơnăm kố, kăn pơkuâ pơlê kong kân pơtối tơkŭm po kơ-êng, diâp lối 114.500 kơxuô tơmeăm ƀă tâi tâng kơxô̆ liăn lối 273 rơtal liăn, mơhno tuăn ihiâm mơno pâ mơnê trâu hơngế ƀă mâu ngế ai hnoăng kăch măng.