Tung dế khế 7, toăng hngêi nếo dêi jâ Nguyễn Thị Nhường, ối a bêng Ea Kao hiăng teăm kêi đeăng, tro a rôh leh tơbâ 79 hơnăm hâi Mô đô̆i Rong râ Hlâ hía. Djâ tung châ tơdroăng tro trếo ‘mêi da cam ing ngế pâ nah veăng tung tơplâ xâ, tơdroăng rêh ối jâ Nhường tơvâ tơvân, bu púi vâ châ ai môi toăng hngêi krá kâk.

“Châ Đảng, Tơnêi têa rơtế mâu kơ koan kơvâ đoân theh tŏng gum rơpŏng mơjiâng toăng hngêi nếo, rơpŏng sôk ro ‘nâng. Tơdroăng pói vâ hên hơnăm kố hiăng chiâng khât. Kố cho tơdroăng ki vâ rơpŏng mơ-eăm, rêh ối lĕm ƀă kơnâ tâ’’.

Tơdroăng phiu ro mê rế tŭm tâ drêng mâu ngế ki tơdrêng gum veăng mơjiâng hngêi ăm jâ cho mâu ngế mô đô̆i Pôa Hồ. Mâu hâi hiăng hluâ, 10 kăn ƀô̆, mô đô̆i Tiêuh đoân Đăk kŏng 20, Lưh đoân Đăk kŏng ƀô̆ ƀinh 198, Ƀinh Chủng Đăk kŏng mê cho ai mâ đi đo a tíu mơjiâng pro tơmeăm. Ing pơto tơmeăm, chiâ mŏng troh tŏng gum mơjiâng pro, khu đăk kŏng hiăng gum rơpŏng jâ Nhường kơdroh tơdroăng pro ƀă kơdroh hên kơxô̆ liăn. Thiê̆u tă Nguyễn Văn Duẩn, Cheăng kal kí Phŏ Tiêuh đoân Đăk kŏng 20 tối:

‘’Klêi kơ’nâi tơdah hnoăng cheăng, ngin hiăng hlê plĕng pêi pro tâi tâng mâu nhŏng o mơnhên inhên khŏm mơ-eăm kêi đeăng tro pơkâ pêi, gum xăng tăm ai toăng hngêi krá kâk, kân lĕm rơdâ. Klêi kơ’nâi kêi đeăng, tíu cheăng po văng tâi tâng kơpong vâ rơpŏng mot ối hlâu lĕm má môi’’.

Tâng ƀă jâ Nhường cho tơdroăng phiu ro ‘na môi toăng hngêi nếo, mê ƀă jâ Phạm Thị Ngân ối a bêng Tân An, bu kal kơbong ối ôh tá xi kơchoh rêm rôh kong mêi hiăng cho tơdroăng hơniâp kân. Kơnốu jâ nah veăng tơplâ xâ, péa ngế kuăn kơnốu pơrá tro tơdjâk xua trếo ‘mêi da cam. Môi ngế hiăng hlâ, ngế kuăn ki ê hiăng lối 40 hơnăm laga ôh tá chiâng vâ prôk lăm xêh, rêm tơdroăng rêh ối rêm hâi kơnôm tâi tâng a nôu pâ hiăng krâ.

Toăng hngêi tíu kuăn rêh ối hên hơnăm hiăng hluâ tro xi kơchoh, pơtâ thăch cao tơ’nhê, mơnât hŭn nhâ. Klêi môi khế, ƀă tơdroăng ki mot pêi dêi khu mô đô̆i, khu gâk kring pơlê pơla, Khu pơkuâ kuăn pơlê pêi chiâk deăng ƀă Đoân Droh rơtăm, toăng hngêi hiăng châ rơnêu tơdâng tơ’mô ing hbrâ mơdât têa hngiâm kuâ, pro pơtâ, sơng mơnât troh rơnêu tung hngêi. Jâ Phạm Thị Ngân rơrêk tung ihiâm mơno tối:

“Châ ‘nâi peăng khu mô đô̆i rơnêu hngêi ối gum mê cho ôh tá ƀĕng ê, xua rơpŏng ai tơmiât thế kuăn krếo vâi pro, laga dôh pêi cheăng hơngế tá hâi vêh a hngêi, mơhúa châ tơnêi têa tŏng gum, cho sôk ro ‘nâng’’.

Tiô pôa Nguyễn Công Thảo, Phŏ Kăn hnê ngăn Vi ƀan bêng Tân An, bêng nôkố ai vâ chê 480 ngế ai hnoăng. Rôh 27/7 hơnăm kố, rơtế ƀă mâu tơdroăng pêi “Pâ mơnê mâu ngế ai hnoăng”, bêng hiăng séa ngăn ƀă pơkâ tŏng gum rơnêu hngêi ối ăm mâu ngế ki chiâng vâ gum. Krê ƀă rơpŏng jâ Ngân, bêng pơtối mơhnhôk mâu ngế ki tŏng gum đi đo.

“Vi ƀan bêng hiăng séa ngăn tâi tâng tơbleăng ƀă châ kong pơlê, Tíu xiâm tơnêi têa kĭ ăm 2 ngế, rêm ngế 30 rơtuh liăn vâ vêh rơnêu péa toăng hngêi hngêi vâ tơniăn rêh ối ăm péa rơpŏng, tơdroăng rêh ối dêi vâi tơniăn tâ, lĕm tro tâ. Pakĭng mê, Đảng ủi, Vi ƀan veăng lăm pôu mâu ngế ai hnoăng tơnêi têa, pakĭng kơxô̆ liăn dêi Tơnêi têa ƀă kong pơlê mê bêng xuân tơdâng tơ’mô kơxô̆ liăn diâp kơxuô tơmeăm rêm rơpŏng 200 rơpâu liăn’’.

Lâp kong pơlê Dak Lak nôkố ai 42 rơpŏng cho kuăn xiâm dêi mâu ngế veăng tơplâ xâ nah tro trếo ‘mêi châ tŏng gum hngêi ối, mê cho 22 toăng hngêi mơjiâng nếo ƀă 20 toăng hngêi rơnêu. Vâ kêi đeăng hdrối hâi lơ 27/7, mâu đông lêng hiăng rơtế lo lăm pêi cheăng sap ing mơ’nui khế 5. Tiô pôa Đào Mỹ, Phŏ Kăn hnê ngăn Vi ƀan kong pơlê Dak Lak, tơdroăng kêi đeăng tơdroăng hdrối hâi lơ 27/7 ôh tá xê tơniăn to tơdroăng pơkâ mê ối cho kơxuô tơmeăm pâ mơnê păng ‘nâng ăm mâu rơpŏng ai kuăn xiâm dêi mơngế veăng tơplâ xâ tro trếo ‘mêi hoă hok.

“Ngin mơ-eăm kêi đeăng tơdroăng mơjiâng mâu toăng hngêi kố ƀă kố xuân cho vâ mơhnhôk, hơlêm môi iâ tơdroăng ki hía dêi nhŏng o vâi ƀă mơhno ihiâm tuăn mơno dêi Đảng ƀă Tơnêi têa đi đo tŏng gum ăm mâu ngế ai hnoăng ƀă tơnêi têa’’.

Rêm toăng hngêi kêi đeăng hdrối hâi lơ 27/7 ôh tá xê to gum mâu rơpŏng ai tíu ối krá tâ, mê ối cho mơnhên ăm tơdroăng ki pâ mơnê châ mơhno ƀă mâu tơdroăng pêi cheăng inhên. Drêng mâu toăng hngêi châ mơdâng, mâu tơdroăng ki hía xua tơplâ xuân môi iâ kơdroh tơdroăng châ khéa, vâ mâu rơpŏng djâ tơdroăng châi tơplâ thăm loi tơngah ƀă ai ivá pơtối mơ-eăm tung tơdroăng rêh ối.