Tơmeăm nhôm pŭm apoăng châ ki lĕm 99,71% ôh tá tơvât ƀă ki ê; pêi cheăng hneăng 1 dêi hngêi kơmăi ai ivá 150.000 tâ̆n/hơnăm ƀă kô tâk 300.000 tâ̆n a mơ’nui hơnăm kố, hdrối vâ châ ki hên 450.000 tâ̆n rêm hơnăm a pái khế apoăng hơnăm 2027. Xông tơpui a rôh leh, Đăi tươ̆ng Phan Văn Giang, Phŏ Ngế pro xiâm hnê ngăn Chin phuh, Ngế xiâm pơkuâ mô đô̆i tối rơdêi, tơdroăng mơjiâng chiâng nhôm pŭm cho tơdroăng ki hdró mơnhông tơtêk dêi kơvâ mơjiâng pro mơ-eăm Việt Nam, pêi pro mâu troăng hơlâ dêi Đảng ƀă Tơnêi têa ‘na mơnhông kơmăi kơmok uâ bro trâu tơmeăm khoăng tung kơdâm tơnêi.

Đăi tươ̆ng Phan Văn Giang pơkâ thế mâu khu xiâm, kơvâ cheăng pơtối kêi đeăng pơkâ pêi, troăng hơlâ mơnhông kơvâ kơmăi kơmok pro nhôm; kong pơlê Lâm Đồng mơdêk mơ’no liăn cheăng hngêi trăng troăng klông, on tơhrik, logistics ƀă mơhnhôk mâu tơdroăng tơkêa bro uâ bro trâu hơngế ‘na nhôm.