Xua tơdroăng pơkuâ dêi pôa Trần Thanh Mẫn, Kăn xiâm hnê ngăn Kuô̆k hô̆i, hâi lơ 27/7, Vi ƀan pơkuâ Kuô̆k hô̆i pơtối hôp rôh hôp má 4, ăm rơkong veăng tơpui tối ‘na tơdroăng Pơkâ dêi Kuô̆k hô̆i ‘na cheăng hbrâ mơdât mâu ngế pro xôi ƀă pro xôi luât, cheăng dêi Viê̆n séa ngăn arak luât kuăn pơlê, dêi Hngêi tơleăng kuăn pơlê ƀă cheăng pêi pro tơdroăng xôi ƀă hên tơdroăng ki ê. Xuân a rôh hôp, Vi ƀan pơkuâ Kuô̆k hô̆i ăm rơkong veăng tơpui tối ƀă Hlá mơ-éa pơtroh dêi Chin phuh ‘na kơxop hlá mơ-éa mơjiâng pơkâ troăng hơlâ, tŏng gum krê ƀă tơdroăng mơjiâng hdi têa kơxĭ a pơlê kong kân Đà Nẵng.

Tiah mê, tơdroăng tơkêa kố ƀă ƀăng tơnêi dâng 1500ha, kơxô̆ liăn pro lối 400 rơpâu rơtal, châ pơkâ mơjiâng pro kơphô̆ hdi têa kơxĭ rơkê tiô chal nôkố, tơxâng ƀă kong têa ê, tơnêi tơkŭm tuăn ngoâ rơkê, kơxô̆ liăn ‘no pêi cheăng, kong ngê̆ ƀă tơmiât pêi rơkê. Veăng gum po rơdâ tơnêi tơníu mơnhông, mơjiâng ivá thăm mơnhông nếo dêi cheăng kâ tuăn ngoâ rơkê, tơtro ƀă pơkâ thế pơhlêh túa mơnhông tơnêi têa tung chal nếo.