ƀă Ngế khên tơnôu hlâ tung tơplâ xâ nah Trần Văn Kiều; tơdrêng amê kơ-êng, mơhnhôk mâu khu ki veăng ti tăng, tơkŭm kơxêng kiâ mô đô̆i a Kơdrum reăng Lê Thị Riêng.

Tung tơdroăng po kân krip ƀă rơrêk, pôa Trần Thanh Mẫn, Kăn xiâm hnê ngăn Kuô̆k hô̆i ƀă Khu râ kăn pêi cheăng hiăng tu koh kôh chôu nhang, mơhno ihiâm mơno pâ mơnê trâu hơngế kô pôa Trần Phú, Kăn xiâm pơkuâ hnê ngăn Đảng ƀă mâu Ngế khên tơnôu hiăng tơplâ, pleăng mơheăm chhá xua tơniăn krê, tơniăn lĕm ƀă tâi tâng tơnêi tơníu dêi Tơnêi têa, xua hơniâp lĕm dêi kuăn pơlê.

Vâ mơhnhôk mâu khu dế pêi pro hnoăng cheăng ti tăng, tơkŭm kơxêng kiâ mô đô̆i ƀă mơnhên inâi kơxêng kiâ mô đô̆i a Kơdrum reăng Lê Thị Riêng, pôa Trần Thanh Mẫn, Kăn xiâm hnê ngăn Kuô̆k hô̆i; pôa Trần Cẩm Tú, Kăn pơkuâ Khu hnê mơhno má môi ƀă jâ Bùi Thị Minh Hoài, Kăn hnê ngăn Vi ƀan xiâm Măt trâ̆n Tơnêi têa Việt Nam hiăng diâp mâu kơxuô tơmeăm ki kơnâ ăm mâu khu dế pêi hnoăng cheăng akố.