Tơbleăng a rôh hôp, pôa Trần Thanh Mẫn, Kăn xiâm hnê ngăn Kuô̆k hô̆i ăm ‘nâi, tung hneăng hdrối, Kuô̆k hô̆i hiăng mơ-eăm pê klêi tơdroăng ‘na luât, troh nôkố hiăng mơjiâng pro 122  luât, Hlá mơ-éa chêh troăng hơlâ luât pơkâ. Mâu tơdroăng hiăng châ pêi pro tung hơnăm kố nah cho xiâm ki kal, la pơkâ thế mơnhông tơƀrê nếo dêi Tơnêi têa dế pơkâ mâu tơdroăng kal thế pêi kân tâ ƀă tơdroăng séa ngăn.

Kuô̆k hô̆i hneăng 16 kal thế pro nếo môi troăng séa ngăn ki nếo: ai mâ ngăn nhên tơdroăng vâ pêi, hbrâ tung tơdroăng tối tơbleăng hdrối, ngăn a tơdroăng chêh ‘măn tung kơmăi ƀă ki ăm hlo ƀă mâ, tơmâng khât tâ, prôk rơtế ƀă hnoăng cheăng ƀă ăm hlo ki hiăng klêi pêi. Séa ngăn ôh ti xê to séa ngăn tơdroăng hiăng pêi pro, mê thế veăng ‘mâi hơ’lêh tơdroăng kal pêi; ôh ti xê to châ hlo ki kơdroh, mê thế tah tíu ki pá, tối tơbleăng ăm ‘nâi hdrối ki ôh tá mơhuá ki xía vâ, mơdêk pêi pro ƀă pơxiâm pro nếo vâ mơnhông tơbrê.

Ki pơxúa mơ‘nui dêi tơdroăng séa ngăn cho pro pơ’lêh khât tung pê klêi luât, tơkŭm pêi pro tro luât, mơdêk ki tơƀrê rak ngăn Tơnêi têa; ƀă kân má môi cho pêi cheăng ăm Kuăn pơlê, xua vâ mơnhông rĕng, krá dêi tơnêi têa.