A tíu pêi cheăng chêh pro hlá mơ-éa cheăm Ia Hrung, kong pơlê Gia Lai, rêm hâi, nâ Phạm Thị Thủy, chuyên viên Ƀơrô cheăng kâ tơdah xo lối 10 khu hồ sơ tơnêi. Hdrối nah, ki hên chôu dêi nâ cho pơchuât rêm túa mơ-éa, pơchông ngăn ƀă pơkâ dêi luât. Sap ing rôh ki ai tuăn ngoâ rơkê xua kuăn mơngế pro AI gum, nâ bu kal quet hồ sơ a hê̆ thống, ing tơmeăm kố kô tăng ngăn, tơkŭm ƀă mơhno tơdrêng hlối mâu tơdroăng ki kal vâ ‘nâi lơ mâu mơ-éa ki tá ai tŭm. Xua mê, ki tơƀrê dêi tơdroăng cheăng dêi nâ tâk hên xôh:

 “Drêng tá hâi ai AI gum, môi hâi á bu pơchuât châ dâng 4 troh 5 khu hồ sơ. Klêi kơ’nâi xúa AI séa ngăn hồ sơ, kơxô̆ ki kố hiăng tâk dâng 15 troh 20 ƀô̆. Cheăm gá kân rơdâ mê tơdroăng rah xo hồ sơ vâ pơchuât chêh pro kĭ gá kal khât. Drêng mê á tơkŭm tung tơdroăng cheăng séa ngăn, tăng xiâm rêi ƀă hâi khế hơnăm xúa tơnêi”.

Ia Hrung cho môi tung mâu cheăm ki ai hên hồ sơ kal châ chêh pro klêi hên dêi kong pơlê Gia Lai. Bu tung pơla 6 khế apoăng hơnăm 2026, Tíu pêi cheăng chêh pro hlá mơ-éa cheăm hiăng tơdah xo vâ chê 4.800 hồ sơ. Ai drêng ‘nâ, cheăm Ia Hrung tro hnê khê̆n xua kơxô̆ hồ sơ kal châ tơleăng klêi hrá hên luâ râ. Laga, klêi kơ’nâi 2 khế ứng dụng AI, tơdroăng mê hiăng pơhlêh hên.

Kơxô̆ hồ sơ ki hrá chêh pro klêi hiăng kơdroh lối 62% - kơlo ki hên má môi tung lâp kong pơlê. Cheăm Ia Hrung cho môi tung 10 to cheăm, bêng châ Vi ƀan hnê ngăn kong pơlê Gia Lai khĕn kơdeăn xúa tơƀrê kong kŭ AI tung cheăng séa ngăn tơnêi. Jâ Huỳnh Ngô Tùng Điệp, Phŏ hnê ngăn Vi ƀan cheăm Ia Hrung ăm ‘nâi:

“Tơƀrê dêi tơdroăng xúa ứng dụng AI gá pơxúa hên tung tíu chêh ‘măn tơdroăng kal ƀă hâi khế pêi cheăng. Vi ƀan hnê ngăn cheăm hiăng pơkâ thế kăn ƀô̆, kong chưk tí tăng pêi pro tơƀrê tung tơdroăng ki xúa kong ngê̆ kố. Laga, tâi tâng pơrá athế châ séa ngăn, vêh pơkâ séa ngăn; tơdroăng ki má mơ’nui cho dêi mâu kăn ƀô̆ tí tăng ‘nâi plĕng ƀă ngế ki ai hnoăng pơkuâ tơleăng mơnhên hlá mơ-éa ki mê”.

Klêi kơ’nâi pêi pro ‘mot tơkŭm tíu pêi cheăng, hồ sơ tơnêi têa ki pơtroh râ cheăm a Gia Lai tâk hên tung pơla mâu ngế cheăng iâ. Sap ing tơdroăng pơkâ thế dêi Kăn hnê ngăn Vi ƀan kong pơlê Gia Lai, Tíu pêi cheăng chêh pro hlá mơ-éa kong pơlê hiăng tơrŭm ƀă Ƀơrô cheăng Chêh inâi tơnêi chêh pro kong kŭ AI tơnêi. Tung hên khế, khu kong ngê̆ thong tin ƀă kăn ƀô̆ ki pêi dêi hnoăng cheăng rơtế ƀă hnê hriâm AI tung tíu ChatGPT ƀă hê̆ thống hlá mơ-éa luât, tơdroăng cheăng ƀă lối chât rơpâu hồ sơ tơnêi hiăng châ chêh pro tiô tơdroăng ki ai khât.

Apoăng khế 6/2026, kong kŭ pơxiâm châ xúa ƀă nôkố hiăng tơbleăng xúa a 135 to cheăm, bêng tung lâp kong pơlê, gum chêh pro klêi dâng 80% mâu hlá mơ-éa tơdjâk troh tơnêi. Mâu tơdroăng ki tơƀrê apoăng a Gia Lai ăm hlo, tuăn ngoâ kuăn mơngế pro AI ôh tá pơhlêh teăng kăn ƀô̆, mê ối cho kông kŭ vâ kăn ƀô̆ pêi cheăng tơƀrê tâ. Sap ing môi kông kŭ xúa tung chêh pro hồ sơ tơnêi, AI xua Gia Lai mơjiâng dế po troăng pêi ki nếo tung pơhlêh chêh pro hlá mơ-éa, veăng gum mơdêk ki rơkê plĕng tung tơdroăng cheăng pro mơ-éa ăm kuăn pơlê ƀă khu mơdró kâ a kong pơlê.