Mê cho hai lơ 29/7, 15 ngế kăn ƀô̆, mâu lêng dêi Khu pơkuâ ngăn lêng cheăm Đăk Pék, po lăm tăng a péa kơpong cho thôn Đăk Xanh ƀă thôn 16/5. Tơdroăng lăm tăng châ pêi pro ƀă kŏng, pêi ƀă ‘nêk, kơƀên ƀă hbrâ tơmeăm xúa. Tung pơla rôu tăng, mâu khu râ hiăng châ hlo 1 kơxêng kiâ mơngế hlâ ai hnoăng, ối ai ếo mêi lŭm tâ tá châ, 2 to chêng khŏng chế quân nhu ƀă kơ xêng ối tŭm. Mâu khu chiâ hiăng rôu xo kơxêng kiâ pro tiô tơdroăng pơkâ, djâ vêh a Hngêi pơkeăng Đăk Glei vâ mơnhên ngăn ƀă mâu tơdroăng pêi pro pơtối.

Nôkố, Đô̆i K53, Khu xiâm pơkuâ ngăn lêng kong pơlê Quảng Ngãi dế pơtối tơkŭm lăm tăng a mâu kơpong nhôm ai kơxêng kiâ mơngế hlâ ai hnoăng a Đăk Pék.