Ki vâ tối hên tung tơdroăng mơđah Túa lĕm tro tŏn chêng ƀă pơxá inâi “Idrâp chuât ro hâi tơdjuôm dêi rơpó” cho pơtối tơbâ tơdroăng pơchâi dêi dôh tung hâi pơkoăng tiô chal krâ nah dêi mơngế Rơđế. Ngăn rơtâ tá kong drêh lĕm pá kơdâm tơkâng loăng kân ki hiăng ton hơnăm, mâu ngê̆ nhân buôn Tơng Jŭ, bêng Ea Kao hiăng pơtối pêi pro tŭm túa tơlá pơchâi dêi dôh, nâl Rơđế tối dêi (Iêo wĭt sang mniê) pin tối (Djâ vêh peăng hngêi mế) dêi mơngế Rơđế.

Pơla prôk drô troăng prôk pơchâi dôh, ngế dôh thế tơkâ luâ mâu pơloăng mơnúa ki tro tơdroăng pro mơdĭng. Ngế dôh diâp mâ xâng kŏng ƀă hlái ƀă mâu tơmeăm ăm nôu pâ nhŏng o xiâm, pú hmâ péa pâ hdrối peăng hngêi kơdrâi vâ tơdah xo pơchâi mot a hngêi kơdrâi pro mơdĭng. Ƀă mơngế Rơđế, mâ ƀă hlái mê cho vâ pơtih tơdroăng ki vâ dêi rơpó khât, ‘na tơdroăng pơloăng mơnúa drô troăng prôk pơchâi dôh mơhno tơdroăng púi vâ dêi prế on veăng nếo kô môi tuăn dêi rơpó kâi prôk tơkâ luâ tŭm tơdroăng pá, pơloăng mơnúa vâ châ rêh ối hơniâp ro ƀă dêi rơpó.

Ngê̆ nhân Y Djing Adrơng, buôn Tơng Jŭ, ăm ‘nâi, tơdroăng pro mơdĭng xúa tung tơdroăng mơhno ăm tơmối ngăn hlối vâ pơtối rak túa vêa vong lĕm tro ing nah, hlối po tơ’nôm ‘na cheăng kâ ing tơdroăng ôm hyô tung kuăn pơlê

“A hâk tơngăm ‘nâng châ veăng pơtối tơbâ tơdroăng pro mơdĭng pơchâi dôh, tơbâ tơdroăng ki lĕm ton nah, túa vêa vong ki lĕm dêi mơngế Rơđế. Buôn Tơng Jú nôkố pro ôm hyô tung kuăn pơlê, kô cho troăng pêi pro ki lĕm tro tăng cheăng pêi ăm kuăn pơlê, hlối rak túa lĕm tro ton nah dêi kuăn ngo mê cho teăn hmôu, jiâ, toăng chêng lơ pơtối pro tơdroăng môi tiah pro hâi kố. A púi vâ ki kơnía túa lĕm tro dêi mơngế Rơđế châ tơbleăng lâp lu vâ hên ngế tung lâp plâi tơnêi ‘nâi troh ƀă rak vế troh tá ah”.

Peăng tơdroăng tơbâ pro mơdĭng, mơngế ki ngăn pơtối châ ngăn, hmâng mâu idrâp chêng, idrâp chêng kơlá, idrâp prôa hmốu, mâu tơdroăng hơdruê rơngêi tiô tơdrá Tây Nguyên ƀă hlối châ ôu drôu xiâm. Mâu tơdroăng pro mê hiăng chôu pâ tung ngôa dêi tơmối tung tơnêi têa ƀă lâp plâi tơnêi. Pôa Steve, lo ing Scotland, ăm ‘nâi, mâu idrâp chêng ƀă túa kuăn pơlê a kố pơtối rak vế ki lĕm tro mê pro pôa rơhêng vâ hmâng, vâ ngăn.

“Kố cho rôh apoăng á châ ngăn tơdroăng pro mơdĭng a rơhêng vâ ngăn. A rơhêng vâ hmâng tơdrá chêng, tơdrá prôa dêi mơngế Rơđế. Tiô á, mâu tơdroăng ki kơnía túa lĕm tro môi tiah kố kal thế pơtối tơbleăng hên tâ tung rơ’jíu, tung hyôh măng vâ hên ngế ‘nâi. A mơni dêi tơná kô ối vêh troh ah nếo”.

Tiô pơkâ, tơdroăng mơđah túa lĕm tro toăng chêng kô pơtối tơkŭm po tiô rơnó pơkâ a Tíu mơđah tơbleăng um tơmeăm ton nah Dak Lak. Rêm khế kong pơlê kô tơbleăng môi túa pro mơdĭng tiô khôi hmâ ton nah dêi mâu hdrông kuăn ngo tung kong pơlê, veăng pơtối rak tơmeăm khoăng kơnía ton nah ƀă mơjiâng tơ‘nôm tơmeăm ôm hyô túa lĕm tro vâ mơđah ăm kuăn pơlê ƀă tơmối ngăn.