A Hngêi Trung Phôh thong hdrông kuăn ngo ai tíu kâ koi ối pơtê péa râ Râ má môi - Râ má péa Dục Nông, hngêi trung dế hiăng vâ pro klêi mâu kế tơmeăm pro ki má mơ’nui. La ƀă tơdroăng ki pro mê, hngêi trung hiăng rah xo hok tro vâ rak tơniăn tŭm kơxô̆ ngế hok tro mot hriâm tung hơnăm hriâm nếo 2026-2027. Tiô pơcháu, Hngêi trung Phôh thong hdrông kuăn ngo ai tíu kâ koi ối pơtê péa râ Râ má môi - Râ má péa Dục Nông rah xo dâng 1.680 ngế hok tro. Tung mê, lối 1.140 ngế hok tro châ rah xo sap ing Hngêi trung râ má môi ƀă Hngêi trung râ má péa Đăk Dục; dâng 550 ngế hok tro rah xo mâu ngế ki nếo a cheăm vâ hriâm tiô túa ối pơtê a hngêi trung.

Klêi kơ’nâi châ pơcháu kơxô̆ ngế hok tro, hngêi trung hiăng mơjiâng Khu Hnê mơhno, Hô̆i đong rah xo; tơrŭm ƀă kăn pơkuâ, mâu khu râ ƀă Khu cheăng ‘na Măt trâ̆n a rêm thôn, pơlê troh rêm rơpŏng kuăn pơlê hnê tối, tơbleăng tŭm mâu troăng hơlâ tŏng gum ăm hok tro ki ối pơtê a hngêi trung. Pôa Trần Đức Thư, Ngế pơkuâ hngêi trung Phôh thong hdrông kuăn ngo ai tíu kâ koi ối pơtê péa râ Râ má môi – Râ má péa Dục Nông ăm ‘nâi, troh nôkố, hngêi trung hiăng xo tơ’nôm lối 360 ngế hok tro nếo, châ lối 65% tơdroăng pơkâ rah xo. Laga, xua kố cho rôh apoăng tơbleăng a cheăm mê cheăng rah xo hok tro mot hriâm xuân ối trâm xơpá xua hên ngế tôu tuăn ‘na tơdroăng ki păn rak ƀă pơkuâ ngăn kuăn ‘nĕng.

“Hdrối nah tá hâi ai hngêi trung hdrông kuăn ngo ai tíu kâ koi ối pơtê mê hên nôu pâ mâu hok tro ối tôu tuăn. Hngêi trung dế tơrŭm ƀă râ Đảng, kăn pơkuâ cheăm bêng pơtối hnê tối, mơhnhôk vâ mâu nôu pâ dêi mâu hok tro hlê, loi ƀă hmiân tuăn djâ dêi kuăn ‘nĕng lăm troh a hngêi trung hriâm”.

Rơtế ƀă tơdroăng ki rah xo, cheăm dế chêh pro túa pơkâ xing xoăng mâu thái cô vâ rak vế tơniăn tơdroăng ki hnê sap ing apoăng hơnăm hriâm ki apoăng. Ki hdrối tâ, hngêi trung ối xo mâu thái cô dêi Hngêi trung râ má Môi ƀă Râ má péa a Đăk Dục; tơdrêng amê hlối pơtối séa ngăn, xing xoăng ƀă kĭ tơkêa thái cô tiô tơdroăng ki kal thái cô hnê tiô tơdroăng ki ai khât.

Tiô pôa Trần Cao Bảo Việt, Kăn hnê ngăn Vi ƀan cheăm Dục Nông, tơdroăng ki ‘no liăn pro hngêi trung hdrông kuăn ngo ai tíu kâ koi ối pơtê péa râ châ tơdroăng ki môi tuăn khât dêi kuăn pơlê. Kơxô̆ ngế hok tro chêh inâi hriâm hlối ối pơtê a hngêi trung hiăng luâ tơdroăng pơcháu apoăng, mơhno tơdroăng loi tơngah dêi mâu nôu pâ hok tro ƀă hngêi trung hriâm tâp nếo. Cheăm hiăng pâ thế mâu kơ koan ki ai tơdjâk troh ‘mot tơ’nôm thái cô hnê tung hơnăm hriâm 2026 vâ pêi châ tơdroăng ki ai tŭm thái cô hnê drêng hngêi trung păng ‘nâng châ xúa.

Ƀă kơpong tíu kâ koi ối pơtê, mâu veăng ối châ pro kân rơdâ, ai tŭm tơdroăng ki vâ xúa. Tung tơdroăng ki kơxô̆ ngế hok tro chêh inâi ki vâ ối khât, cheăm kô tơbleăng ăm râ ki ai hnoăng pơkuâ séa ngăn túa pơkâ xing xoăng tơ’nôm hok tro ối pơtê tâng pêi châ tơdroăng púi rơhêng vâ mâu tơdroăng pơkâ thế. Pôa Trần Cao Bảo Việt, Kăn hnê ngăn Vi ƀan cheăm Dục Nông ăm ‘nâi:

“Klêi kơ’nâi rah xo kô séa ngăn tung mâu kơxô̆ ngế hok tro tung rêm to lâm hriâm vâ tơbleăng ăm Vi ƀan hnê ngăn kong pơlê Quảng Ngãi ƀă pâ tơdroăng hnê mơhno dêi Khu ngăn kong pơlê, cheăm bêng ƀă hnoăng cheăng mâu kăn ƀô̆ kong pơlê Quảng Ngãi vâ pơtroh mâu thái cô hnê ăm tơtro tung mâu môn hriâm. Tơdrêng amê ngin xuân pâ rơkong hnê mơhno dêi Khu ngăn kong pơlê, cheăm bêng ƀă hnoăng cheăng mâu kăn ƀô̆ ƀă Khu ngăn hnê hriâm kong pơlê Quảng Ngãi ‘na rah xo tơ’nôm thái cô tung hơnăm 2026 tơ’nôm ăm cheăm Dục Nông”.

A cheăm Sa Loong, cheăng hbrâ rơnáu ăm hngêi trung hriâm ai tíu kâ koi ối pơtê péa râ xuân dế châ tơbleăng tơdâng tơ’mô. Hngêi trung ai tâi tâng kơlo liăn ‘no pêi cheăng vâ chê 209 rơtal liăn, tiô tối hdrối kô pro klêi mơ’nui khế 7 hơnăm kố vâ xúa ăm hơnăm hriâm nếo.

Cheăm Sa Loong hiăng pơtroh khu tơrŭm ƀă hngêi trung troh a rêm thôn hnê tối, tiâ mơnhên ăm nôu pâ dêi mâu hok tro ‘na tơdroăng ki hriâm tâp, kâ koi ối pơtê xuân môi tiah mâu troăng hơlâ tŏng gum ăm hok tro. Pôa Xiêng Thanh Phú, Kăn hnê ngăn Vi ƀan cheăm Sa Loong, kong pơlê Quảng Ngãi tối rơdêi, troh nôkố, cheăng rah xo hok tro hiăng klêi tiô pơkâ.

“Tung tơdroăng Pơkâ kơxô̆ 71 dêi Khu xiâm pơkuâ cheăng kal kí, Đảng ủi ƀă Vi ƀan hnê ngăn cheăm Sa Loong mơnhên mơdêk ki rơkê plĕng tung hnê hriâm, malối cho ki rơkê plĕng dêi mâu thái cô, cho môi tung mâu tơdroăng cheăng ki mơnhông dêi pơla hơnăm 2025 - 2030. Cheăm kô pơtối mơdêk rơdêi cheăng hnê hriâm, hnê tơ’nôm ăm thái cô ‘na mâu môn hriâm ki ối kal, hlối pêi pro tơdroăng ki rah xo mâu thái cô rơkê plĕng châ tiô pơkâ dêi tơdroăng cheăng, pêi châ tơdroăng pơkâ thế pơhlêh nếo hnê hriâm ƀă tơtro ƀă tơdroăng ki ai khât dêi cheăm”.

Vâ hbrâ rơnáu ăm hơnăm hriâm nếo 2026-2027, Vi ƀan hnê ngăn kong pơlê Quảng Ngãi hiăng kĭ pơkâ túa ki rah xo hok tro ăm 4 to hngêi trung phôh thong hdrông kuăn ngo ai tíu kâ koi ối pơtê péa râ râ má môi ƀă râ má péa a mâu cheăm tơkăng kong tơnêi ‘lâng. Hok tro sap ing lâm 1 troh lâm 9 châ pêi pro tiô túa ki rah xo, ôh tá xê tơkŭm po tơ’noăng. Ƀă mâu ngế ki châ rah xo cho hok tro rêh ối a mâu cheăm tơkăng kong ƀă mâu cheăm tơkăng kong ki ối achê tiô pơkâ.

Pŭn toăng hngêi trung châ pơcháu ăm kơxô̆ ngế hok tro rah xo mot hriâm cho a Dục Nông, Mô Rai, Rờ Kơi ƀă Sa Loong ƀă tâi tâng lối 5.600 ngế hok tro, tung mê vâ chê 1.250 ngế hok tro ối pơtê a hngêi trung. Pôa Nguyễn Ngọc Thái, Kăn pơkuâ Khu ngăn hnê hriâm ƀă hnê mơjiâng tuăn ngoâ rơkê kong pơlê Quảng Ngãi ăm ‘nâi, rơtế ƀă tơdroăng ki mơdêk rĕng mơjiâng pro mâu hngêi trung hriâm hdrông kuăn ngo ai tíu kâ koi ối pơtê péa râ, kơvâ hnê hriâm dế tơrŭm ƀă mâu cheăm pêi klêi cheăng hnê tối rah xo hok tro hriâm, hbrâ rơnáu mâu kơƀăng tăng vâ mâu hngêi trung teăm tơdah hok tro mot hriâm tung hơnăm hriâm nếo.

“Ngin hiăng tí tăng ‘nâi plĕng vâ tơbleăng tối ăm Vi ƀan hnê ngăn kong pơlê Quảng Ngãi hnê mơhno, mơhnhôk mâu khu pêi cheăng vâ pêi cheăng tơ’nôm ngế pêi cheăng, tơ’nôm chôu pêi cheăng, pêi a kong măng, mơ-eăm rĕng pro klêi. Mơ-eăm tung khế 8/2026 kô pêi pro mâu rôh séa ngăn, hlá mơ-éa, gô̆m văng mâu xok ƀă mot hriâm tung hơnăm hriâm nếo tro pơkâ dêi kong pơlê”.