Show mơđah “Hngêi trá xŏn” mê cho 2 tơdroăng, apoăng ƀă “Tơdroăng pôu tơngah” ƀă pái tơdroăng ki kal “Dring gah”, “Gah” ƀă “Ốk”. Tơmối ngăn châ hlo hên tơdroăng, dêi tung tơdroăng rêh ối dêi Rơđế, ing tơdroăng rêh ối hmâ ƀă kong kế, lăm lúa, pêi chiâk deăng troh tơdroăng rêh ối ‘na túa lĕm tro, ki hmâ ƀă hngêi trá xŏn.

Mâu tơdrá hơdruê rơngêi, idrâp chêng, idrâp prôa kơlá, prôa hmốu dêi vâi krâ nah, troh tơdroăng hdrôu, rơngê rơngối, tơdroăng pro mơdĭng xối xeăng ƀă tơdroăng rêh ối dêi kuăn pơlê châ tơkŭm ƀă ngê̆ thuât pro, ai on trâ eăng ƀă kŏng ngê̆ mơhno mơđah. Tíu ki tơviah krê dêi tơdroăng mê cho tơmối ôh ti xê to ngăn mê ối lăm ngăn vâ ‘nâi, tâ, hlo mâu tơdroăng pêi pro ki mơhno tơbâ mê, ing mê châ achê tâ ƀă tơdroăng rêh ối túa lĕm tro ton ing nah dêi mơngế Rơđế.

Mâu ngế veăng mơđah mê cho mâu ngê̆ nhân ƀă mâu kuăn pơlê mơngế Rơđế. Tâi tâng tơdroăng mơđah tơpui ƀă nâl Rơđế, veăng pro ăm mơngiơk ki mơđah mê môi tiah túa lĕm tro ton rôh nah khât châ pơtối tơbâ vế.

Ngăn tơdroăng mơđah, jâ Lê Thị Lý, ối a bêng Buôn Ma Thuột, kong pơlê Dak Lak ăm ‘nâi, tơdroăng mơđah mê ga pro ăm pin tâ môi tiah hên tơdroăng ki vâ tơbâ tung tơdroăng rêh ối, tơdroăng mơdĭng pơkoăng ŏng mê, túa tơlá ton nah, ếo pơtâk ƀă mâu priê pâ rơnŏng mâ xâng kŏng dêi mơngế Rơđế rôh nah.

“Drêng á ngăn mê á tâ rơrêk. A hlo tơdroăng rêh ối dêi mơngế kuăn ngo nah hên túa tơlá ƀă hlo tro khât ‘nâng cho môi túa lĕm tro ton nah tơxâng rak vế. Ôh tá ƀĕng ê Dak Lak pơtối tơbâ môi tơdroăng ki lĕm tro tiah mê”.

Pôa Trần Hồng Tiến, Ngế pơkuâ xiâm Túa lĕm tro, Tơ’noăng Ivá ƀă Ôm hyô Dak Lak ăm ‘nâi, tơdroăng djâ kŏng ngê̆ tung mơđah túa lĕm tro cho troăng prôk tơtro ƀă tơdroăng kal vâ mơnhông cheăng ƀă kơmăi tiô túa nếo ‘na mơhno ki lĕm tro, hlối po troăng mơjiâng mâu tơmeăm ôm hyô ki nếo, troh mơjiâng tơmeăm ôm hyô ‘na túa lĕm tro ki kâi châ tơ’mot hên tơmối vâ ngăn ƀă thăm pro kơnía tâ ‘na cheăng kâ ing túa lĕm tro dêi kong pơlê.

“Ngin Tơngah kố cho môi tung mâu tơmeăm ôm hyô vâ kum kơvâ ngăn ôm hyô mơnhông tơƀrê. Drêng tơmối troh a Dak Lak, pro ti lâi púi vâ châ ngăn, châ hlo mâu show ki mơđah tiah mê”.