Kơxê hâi lơ 18/8, Khu ngăn Ôm hyô Việt Nam ai rôh pêi cheăng ƀă Khu ngăn túa lĕm tro, Tơ’noăng Ivá ƀă Ôm hyô kong pơlê Dak Lak vâ mơjiâng troăng mơnhông tơmeăm pê lo tơtro ƀă tơrêm kơchơ mơdró, pro mâu tơmeăm krê xêh vâ mơdêk ki tơbriêt tê. Sap apoăng hơnăm kố, kong pơlê Dak Lak tơdah dâng 7 rơtuh 300 rơpâu ngế tơnối, tâk lối 36% tâng vâ pơchông ƀă hơnăm hdrối.

Tung mê, tomối lâp plâi tơnêi châ dâng 107.500 ngế, tâk vâ chê 45%; tơmối tung tơnêi têa vâ chê 7 rơtuh 200 rơpâu ngế. Tâi tâng kơ xô̆ liăn châ xo ing ôm hyô châ vâ chê 13.500 rơtal liăn, tâk lối 36%.

Pôa Nguyễn Hồng Hải, Phŏ Kăn xiâm hnê ngăn Khu Ôm hyô Việt Nam tối, ƀă tơmeăm khoăng hên hĭn, tơdroăng ki kal dêi Dak Lak nôkố thế rah xo tro túa, tro tơdroăng vâ mơnhông rơdêi, vâ pêi lo kế tơmeăm ki lĕm krê xêh.