Pôa Trần Thanh Mẫn, Kăn xiâm hnê ngăn Kuô̆k hô̆i ƀă jâ Nguyễn Thị Thanh Nga kơdrâi pôa veăng leh Tơdroăng mơđah ngê̆ thuâ̆t tơbâ mâu tơdroăng ton nah sap ing Rơnó Hngê Kăch măng hơnăm 1945, pơxiâm ai Kuô̆k hô̆i hneăng má 1 troh 80 hơnăm Kuô̆k hô̆i rơtế ƀă mâu hdrông mơngế, pơxiâm mơjiâng tơnêi têa tung rơxông nếo. A rôh pro leh tơbâ, mơngế ki ngăn môi tiah mâ tơná hlo tơdroăng rêh ối tung mâu hơnăm tơplâ tơplong mê hía nah ing mâu ƀai hơdruê, mê cho ƀai “Lá cờ Đảng”, “Mười chín tháng Tám”, “Ca ngợi Hồ Chủ tịch”, “Lời Bác dặn trước lúc đi xa”, “Giải phóng miền Nam”, “Tự nguyện”... Pơla mơđah mâu ƀai hơdruê ai mơđah mâu phim po rơdâ pro mơngế ki ngăn chiâng rơrêk tung hiâm mơno hlối ai tơpui tơno ƀă mâu ngế ki hmâ hlo hlối veăng tơplâ nah.

Ing bâ hơtôu Ba Đình dêi Rơnó Hngê Kăch măng hơnăm 1945, Tơdroăng mơđah mê vâ pơtroh ăm ‘nâi tơdroăng pơtối ai tuăn loi, chân tuăn khên tơnôu hlối pói vâ Việt Nam, tơ’nôm ivá kơdo mơ-eăm vâ tâi tâng Đảng, tâi tâng kuăn pơlê ƀă tâi tâng mâu lêng rơtế tơdjuôm ivá mơjiâng môi tơnêi têa rơdêi, hơniâp ro tung chal nếo ki mơnhông tơƀrê hôm tâ.