Khu ki lăm ngăn hiăng pêi cheăng a ƀuôn Kli A (bêng Buôn Hồ), ƀuôn Tuôr (cheăm Hòa Phú), ƀuôn Tơng Jú (cheăm Ea Kao) ƀă ƀuôn Akŏ Dhông (bêng Buôn Ma Thuột). Klêi kơ’nâi lăm ngăn ăm hlo, kơ’nâi châ Tơnêi têa gum, hên rơpŏng kuăn pơlê hiăng hbrâ rơnáu hdrối kơxô̆ liăn, po rơdâ pro mâu kế tơmeăm, mơjiâng pro mâu tơmeăm lăm ngăn tro ƀă túa lĕm tro chal krâ, cheăng pêi ƀă kŏng ƀă pêt kế tơmeăm tung chiâk deăng, rế hía rế ai cheăng pêi ăm kuăn pơlê a cheăm bêng.

Mâu cheăm xuân pâ thế pơtối chêh pro klêi troăng hơlâ tŏng gum tiô troăng thăm po lâm hnê, tŏng mơđah tơbleăng, mơjiâng kế tơmeăm krê, mơdêk hnê túa ki pro ôm hyô, tơpui nâl kong têa ê ƀă ki rơkê tung mơdêk tơrŭm cheăng pơla mâu rơpŏng kuăn pơlê veăng pro ôm hyô pơlê pơla. Pôa Y Kle Knul, Phŏ ƀơrô ngăn túa lĕm tro cheăm Hòa Phú tối ‘na tơdroăng tơmiât dêi tơná:

“Kal pơtối tơmâng ngăn tŏng gum liăn ngân vâ rak vế hngêi trá xŏn tiô chal krâ, cheăng tĕn ếo pơtâk hdrông kuăn ngo, tơdroăng tôu chêng koăng, mâu rôh po mơdĭng khôi hmâ ƀă mơjiâng pro tơmeăm chôu vế ‘na túa lĕm tro cheăm bêng. Thăm mơdêk cheăng pơkâ mơdêk, mơđah tơbleăng, mơjiâng pro tour tơdjêp Ƀuôn Tuôr ƀă mâu tíu ôm hyô a kong pơlê vâ po rơdâ mâu kong pơlê tơmối troh ôm hyô ƀă mơdêk tơƀrê cheăng mơjiâng pro mâu tơmeăm ôm hyô pơlê pơla”.

Tiô jâ Đỗ Thị Như Tình, Ngế pơkuâ Hdrông kuăn ngo Hô̆i đong hnê ngăn kong pơlê Dak Lak, ôm hyô pơlê pơla bu châ mơnhông krá ton drêng kuăn pơlê cho ngế ki veăng pêi pro, rơtế ai pơxúa sap ing tơdroăng ki pro ôm hyô. Cheăng pro tro troăng prôk mâu ki kơnía túa lĕm tro chal krâ ôh tá xê to veăng rak vế tơmeăm kơnía mê ối pro ivá ki hơniâp ro, mơdêk ki kơnâ dêi mâu troh dêi Dak Lak. Klêi lăm ngăn kô cho tơdroăng ki kal vâ kơ koan ai tơdjâk mơnhên tối tơƀrê troăng hơlâ pêi pro ƀă mơ’no pâ thế mâu troăng hơlâ ki tơtro tung hneăng ki nếo.

“Khu ki lăm ngăn xuân chêh xo mâu tơdroăng ki tối tơbleăng ‘na tơdroăng ki ai khât tung pơla tơbleăng pêi pro pơkâ ƀă mâu troăng tŏng gum a pơlê cheăm, bêng. Tung tơdroăng mê kô hriăn ngăn vâ tơbleăng pêi môi pơkâ nếo ‘na mơjiâng pro ôm hyô pơlê pơla tro ƀă rak vế ƀă mơnhông túa lĕm tro tung hneăng nếo mê kô pro pơxúa tơƀrê tâ”.