Hâi leh, kong pơlê Gia Lai tơbleăng tơmeăm hên túa, ing ôm hyô Quy Nhơn, kong ngo Pleiku, túa lĕm tro tŏn chêng, ôm hyô ngăn kong kế, kế kâ kong pơlê, pơtê ối ƀă mâu tơmeăm tơdjêp ƀă mâu kong kế. Ki xiâm cho tíu hdró Gia Lai chiâng tíu troh hên tíu vâ ngăn. Malối, tơdroăng pêi cheăng tơdjêp ƀă mâu khu mơdró lo ing Hàn Quốc, Nhuk, Sinuâ, Ấn Độ, Rusi, Australia… châ tơngah po tơ’nôm kơchơ ƀă mơngế tơmối nếo troh ăm Gia Lai ƀă mâu tíu troh dêi Việt Nam.

Pôa Hà Văn Siêu, Phŏ ngế xiâm pơkuâ ôm hyô Việt Nam tối nhên, tung pơla kal vâ ƀă tơdroăng ôm hyô tơmối pơ‘lêh rĕng, ki tơ’lêi hlâu tơmeăm khoăng ai tŭm. Kơvâ ngăn ôm hyô kal pơ‘lêh ing hriăn pro tơmeăm khoăng chiâng mơjiâng ki kơnía; ing tơmeăm tê krê troh mâu tơmeăm mơjiâng pro lĕm vâ ngăn, vâ ‘nâi; ing tơdroăng tơbriât tê mơdró tơ’mô yă troh tơbriât ki lĕm krá ƀă ki lĕm krê xêh.

“Ngin hlo Gia Lai ai rôh ki mơhúa, sap hơnăm ôm hyô tơnêi têa 2026 kô tơdjêp ƀă mâu khu mơdró vâ tơdjêp ƀă kơpong hlối pơtối rak vế khôi túa, vêa vong Gia Lai. Ngin krếo thế mâu khu mơdró,  cheăm bêng tung kong pơlê, khu tơrŭm tơhrâ pêi pro; rêm cheăm bêng pêi 1 tơmeăm lĕm krê xêh, djâ túa lĕm tro ƀă ki rơdêi krê dế kơpong, dêi cheăm bêng. Rêm khu mơdró 1 tơdroăng hriăn pơ’lêh nếo pro ki pơxúa krê xêh, mơdêk ki tơbrê tê mơdró, rêm tíu troh cho môi tơdroăng hơ’muăn ‘na túa lĕm tro tơviah pro chiâng rơrêk, tơdjêp ki rơrêk ƀă tơmối ôm hyô”.

Pôa Phạm Anh Tuấn, Kăn hnê ngăn Vi ƀan kong pơlê Gia Lai tối, klêi Hơnăm ôm hyô Tơnêi têa 2026, mâu tơdroăng ki tơdjêp ôm hyô  kô mơjiâng pro, tơmeăm khoăng kô pơtối pro nếo ƀă mâu tơmối kô pơtối troh hên. Pôa púi vâ kuăn pơlê khu mơdró ôh ti xê to hvái ngăn Gia Lai cho môi tíu troh ki nếo, mê rơtế ƀă vê hdró mâu tơdroăng ki nếo:

“Tơngah hâi lăm troh a Việt Nam rôh má 2 a Gia Lai kô ai tơ’nôm hên tơdroăng tơrŭm cheăng, tơmeăm mơjiâng pro ki nếo, hên tơmối ki nếo troh a Gia Lai xuân môi tiah mâu tíu vâ lăm troh ngăn tíu ki ê dêi Việt Nam. Ngin púi vâ tơmối lăm troh ngăn “Kong ngo troh a têa kơxĭ ngiât” ing mê tơdroăng tơbleăng chiâng môi rôh lăm hyô ngăn hlo khât, ing môi rôh po leh dêi hơnăm 2026 chiâng môi tơmeăm ki kơnía ai pơxúa mơnhông ôm hyô ton ta ah”.