Veăng ƀă xông tơpui mơhno mâ, jâ Nguyễn Thị Thanh, Phŏ Kăn xiâm hnê ngăn Kuô̆k hô̆i pơkâ thế rêm kăn teăng mâ kal mơdêk tơdroăng pêi cheăng, tâi ihiâm mơno ƀă ki rơdêi tơmiât pêi rơkê vâ tơxâng pơkâ lĕm pơkâ pơhlêh nếo tung chal mơnhông mơdêk nếo dêi tơnêi têa. Phŏ Kăn xiâm hnê ngăn Kuô̆k hô̆i tối nhên, Kăn teăng mâ Kuô̆k hô̆i cho tíu xiâm tung rêm tơdroăng pêi cheăng dêi Kuô̆k hô̆i, tung mê khu pêi môi tơdroăng cheăng ai hnoăng kal ki xiâm.

Nôkố, pơkâ mơjiâng luât rế hía rế kân rế hên, pơkâ thế tơdroăng séa ngăn, tơbleăng ăm pêi pro tơdroăng tơkêa bro luât choâ kơdroh ‘nâng ‘nâi. Xua mê, mâu kăn teăng mâ kal hbrâ pêi châ tơƀrê, mơnhông tơdroăng ‘nâi klê ƀă đi đo cho tíu xiâm dêi tơdroăng pơhlêh nếo. Tiô pơkâ pêi, pakĭng tơdroăng mơjiâng luât ƀă séa ngăn, rêm hơnăm Khu kô tơkŭm po mâu tơdroăng pêi cheăng ki khât nôkố a mâu cheăm, bêng vâ ‘nâi tơdroăng nôkố, gum tung tơdroăng mơjiâng luât ƀă tơdroăng ki kuăn pơlê pói vâ, pâ thế.