Pôa Nguyễn Xuân Nghiêm, ngế ki lo ing Đà Nẵng tối tiah kố, tơkŭm pŭn tơdroăng pơkâ dêi tơnêi têa chiâng 1 cho môi tơdroăng ki pơhlêh kân ôh tá xê to kơxô̆ tơdroăng cheăng mê ối pơhlêh ta túa tơkŭm pêi pro troăng hơlâ mơnhông a mâu kong pơlê ki xơpá. Xua mê, túa pơkâ tơdrăng hlối mê cho tơkŭm athế ai pơxúa; pôi tá chiâng pro kơdroh kơlo ki kơjo gum ƀă mâu kong pơlê ki lâi, ƀă mâu ngế ối xơpá; tơdrêng amê, xoăng râ athế prôk rơtế ƀă ivá pêi cheăng, liăn ngân ƀă tơƀrê tơdroăng athế châ vê ƀă tơdroăng ki pêi pơxúa tơƀrê khât:

“Tâng hiăng mơnhên kố cho môi tơdroăng pơkâ pêi dêi tơnêi têa mê kal ai môi pơkâ pêi tơdjuôm, môi logic troăng hơlâ tŏng gum môi tuăn, môi troăng hơlâ xing xoăng liăn ngân ƀă môi túa pơkâ pơkuâ ngăn môi tuăn khât. Á tơmiât tiah kố, tơkŭm ôh tá xê ai pơxúa cho xut tah lôi mâu rơkê pêi, ngế ki pêi lơ troăng hơlâ tŏng gum xiâm dêi rêm kơvâ cheăng, tơrôu amê mâu troăng hơlâ pơkâ pêi xiâm xuân athế châ rak, la túa ki chêh pro, xing xoăng liăn ngân, khu tơrŭm pêi pro, séa ngăn ƀă mơnhên tối athế ai tơdroăng môi tuăn. Malối cho tơkŭm athế pro chiâng ivá tơrŭm mâu kơxô̆ liăn tơniăn tro tâ ôh tá xê ôh tá xê to tơkŭm môi kơxô̆ liăn”.

Tiô jâ Nguyễn Thị Yến Nhi, ngế ki lo ing Vĩnh Long, túa tơmiât dêi tơdroăng pơkâ pêi tơnêi têa athế pơhlêh rơdêi tiô troăng Tơnêi têa tŏng gum vâ kuăn pơlê mơnhông xêh. Xua kơdroh kơtiê krá ton athế châ vê ƀă tơdroăng pêi cheăng tơƀrê (klêi kơ’nâi tŏng gum, kuăn pơlê ai cheăng pêi há lơ ôh, pêi lo liăn rế tâk há lơ ôh, ai túa rêh ối tơniăn ƀă ivá pêi pro krá tơniăn xêh há lơ ôh?).

“Kal kơjo gum mâu tơdroăng tơkêa ‘na cheăng pêi, pêi lo liăn, tơrŭm pêt mơjiâng, uâ pơliê, tê roê, hnê cheăng pêi tro ƀă tơdroăng púi vâ dêi kơchơ tê mơdró, pơhlêh xúa internet, tê mơdró tung điê̆n tưh, mơjiâng pro mâu kế tơmeăm xiâm, ôm hyô pơlê pơla, ôm hyô pêi chiâk deăng, ôm hyô túa lĕm tro. Á pâ thế tung mơnhên tối tơdroăng kal pơhlêh tiô túa ki tơtro, pôi tá xo kơxô̆ liăn xing xoăng pro loăng rêk vê ngăn rơkê khât dêi ƀlêi chiâng. Môi tơdroăng tơkêa ‘no liăn 100% la klêi kơ’nâi mơgêi kuăn pơlê xuân ối kơtiê, túa pêi cheăng ki ôh tá châ tơmiât mê pôi tá ngăn cho ƀlêi chiâng. Tơrôu, môi tơdroăng tơkêa gum kuăn pơlê ai túa rêh kâ ối, pêi lo liăn hluăn ing kơtiê krá ton ƀă pêi cheăng chiâng rơkê klêi kơ’nâi tŏng gum cho tơdroăng ki tơƀrê khât”.

Tối nhên, ƀlêi chiâng dêi tơdroăng kal châ vê ngăn ƀă pái tơdroăng ki pơhlêh: Sap ing pơkuâ ngăn klâ xoăng chiâng pơkuâ ngăn tơkŭm; sap ing pơkuâ ngăn ki apoăng chiâng séa ngăn tiô tơdroăng ki pêi cheăng tơƀrê; sap ing tơnêi têa pơkâ hên tơdroăng cheăng ki nhên chiâng kong pơlê hbrâ rơnáu, pôu râng xêh ƀă châ séa ngăn ƀă tơdroăng ki ƀlêi chiâng. Pôa Bùi Văn Dũng, ngế ki lo ing Thanh Hóa tối tơdroăng tơmiât dêi tơná:

“Á môi tuăn khât ƀă tơdroăng kong pơlê pơkâ, kong pơlê tơkŭm pêi pro ƀă chiu pôu râng dêi hoăng klêi kơ’nâi pêi cheăng. Tơnêi têa pơkuâ ngăn tơdroăng pơkâ pêi, troăng hơlâ tŏng gum, tơdroăng pơkâ pêi tro ƀă lăm ngăn, séa ngăn. La xoăng râ athế ai pơxúa khât, pơcháu hnoăng athế prôk rơtế ƀă hnoăng pơkâ ƀă ivá xing xoăng kơxô̆ liăn. Kal pơhlêh sap ing tơnêi têa séa ngăn túa pêi pro chiâng tơnêi têa lăm ngăn tơdroăng pơkâ pêi. Á pâ thế chin phuh athế pơcháu ăm môi kơ koan cheăng ki xiâm pơkuâ tơdroăng tơkŭm kố”.

Jâ Lý Thị Lan, ngế ki lo ing Tuyên Quang pâ thế pêi pro nhên tâ hnoăng hbrâ rơnáu dêi kong pơlê tung tơdroăng ki rah xo túa pêi pro. Mâu kơvâ cheăng pêi, kih thuât mê râ cheăm tá hâi ai tŭm ivá pêi cheăng râ kong pơlê kal hnoăng cheăng pôu râng hnê mơhno, tŏng gum. ‘Na pơkâ dêi kong pơlê athế rak tơniăn xoăng tŭm liăn ki xo hdrối tung túa pơkâ pêi cheăng tơdjuôm krâ kơvâ hơnăm, liăn ngân tơnêi têa rêm hơnăm tiô kơxô̆ ki xoăng dâng lâi, jâ tối nhên:

“Ƀă mâu kong pơlê kong ngo, kơpong tơkăng kong, kuăn pơlê hdrông kuăn ngo liăn ngân xoăng tá hâi tơdâng. Á tối tiah kố pơkâ kố kal châ séa ngăn nhên tâ, mâu kong pơlê ki kố hmâ ai kơxô̆ ngế ki châ pơxúa hên, tơdroăng rơhêng vâ ‘no pêi cheăng xuân hên há mê kơxô̆ liăn Tơnêi têa xoăng athế hên. Tâng mơnhên pơchông ngăn tiô kơxô̆ liăn Tơnêi têa pơcháu mê mâu kong pơlê athế xing xoăng liăn rế tâk hên, tung pơla tơdroăng ki vâ pro tơdâng liăn ngân gá iâ mơni kô ai tơdroăng ki Tơnêi têa hiăng xoăng la kong pơlê xơpá vâ xúa tâi xua ôh tá rak tơniăn tŭm kơxô̆ liăn ki xo”.

Tơpui tối leăng, pêi pro nhên tơdroăng ki ngế kăn nếo tối mê âi, pôa Ngô Văn Tuấn, Ngế xiâm râng liăn ngân tơnêi têa ăm ‘nâi:

“Xuân ối rak môi tiah ton kơxô̆ liăn ki pŭn tơdroăng hiăng châ Kuô̆k hô̆i pơkâ. Liăn tơnêi têa kô tŏng gum ăm mâu kong pơlê ki ôh tá chiâng xing xoăng xêh, lơ ai xoăng la ôh tá ai ivá veăng gum ăm Tơnêi têa. Xoăng liăn ƀă tŏng gum sap ing Tơnêi têa mê túa pơkâ pêi, séa ngăn tung kơlo ki xơpá, séa ngăn tung tơdroăng ki kơtăn pơla rơkê plĕng tiô chal nôkố a mâu tơdroăng pơkâ pêi mơ’no, tung mê ai kơjo gum mơnhên tối ‘na tơdroăng ki xoăng liăn, tơƀrê tung pơkuâ xúa liăn. Ƀă malối cho tung Kơxop hlá mơ-éa Pơkâ xuân tối rơdêi, malối cho kơjo gum ăm mâu kuăn pơlê hdrông kuăn ngo peăng kong ngo”.