Ing tơdroăng tâng tối ing kuăn pơlê, mâu khu râ pơkuâ cheăng tơkŭm tí tăng ngăn, po rơdâ tăng ƀă châ hlo môi kơxêng kiâ ngế hlâ ai hnoăng ƀă hên tơmeăm khoăng. Mê cho kơxêng ko, kơxêng keăng, kơxêng kơveăng chêng, kơxêng pâng kŏng ƀă 8 to hơnĕng. Mâu tơmeăm ki hlo mê ai vŏng, pơrá xut, kơto tâ hlá mơ-éa, kơxái on tơhrik vâ hrik ăm ‘nâi mâu tơdroăng, tuýp pơkeăng xêa hơ’nĕng.

Đô̆i K51 hiăng xo túa vâ mơnhên ngăn ADN, ‘nâi nhên inâi hơnăm ngế hlâ ai hnoăng tro tiô pơkâ. Kơxêng mê châ ‘măn rak, xối pleăng a ilâng kiâ ‘mé mâu ngế hlâ ai hnoăng cheăm Krông Bông, kong pơlê Dak Lak, tơkôm po leh tơbâ hnoăng ƀă leh ‘mé. Kô cho kơxêng kiâ ngế ki hlâ ai hnoăng hlo rôh má 13 châ Đô̆i K51 tơkŭm xo tung kong pơlê Dak Lak sap apoăng khế 6 troh nôkố, tung mê, ai kơxêng má 5 tăng hlo a kơpong tơring Krông Bông ton.