Kơ’nâi lối 2 măng tĭng tí tăng ngăn tung măng xúa ư̆ng yŭng kơtâu tơdrêng tung măng internet (Web App) xua Khu Tơkŭm po, hneăng tơ’noăng mê hiăng ai hên ngế kăn ƀô̆, mâu vâi kơdrâi ƀă mâu khu râ kuăn pơlê kong pơlê Dak Lak veăng pêi pro, ƀă lối 52.000 ƀai tơ’noăng tro. Mâu ƀai tơ’noăng châ khĕn tối tro, rơkê hôm, hên ngế châ 200 điêm ƀă mơdoh chôu phut tơ’noăng iâ tê.  

Jâ Nguyễn Thị Hồng Thái, Kăn hnê ngăn Khu ngăn vâi kơdrâi kong pơlê Dak Lak, Ngế pơkuâ Khu tơkŭm po tơ’noăng ăm ‘nâi, hneăng tơ’noăng châ tối cho môi rôh tơkŭm hôp kal kí rơdâ lâp lu, veăng mơhno djâ tơdroăng kal dêi mâu Hlá mơ-éa luât pơkâ dêi hneăng  2025 - 2030 troh achê tâ ƀă kăn ƀô̆, mơngế tung khu ƀă kuăn pơlê. A Rôh hôp, Khu ngăn vâi kơdrâi kong pơlê Dak Lak diâp 9 to pri tơdjuôm khu ƀă 24 pri krê mơngế chêh rơkê hôm.