On veăng nâ Lâm Thị Ngọc Hoa, rơpŏng kuăn ngo Khmer kơtiê a kơtâu Xẻo Cóc, cheăm Lai Hòa, Pơlê kong kân Cần Thơ nếo châ rah xo vâ tŏng gum ăm túa păn pu pái trối môi “tơdroăng tŏng gum ăm túa rêh kâ ối”, po troăng ăm rôh tơ’lêi hlâu, kơdo mơ-eăm vâ châ tơniăn tung rêh ối. Nâ Lâm Thị Ngọc Hoa ăm ‘nâi:

“Á mơnê khât yoh, hơnăm kố châ gum ăm péa to pu pái hdrê vâ păn. Nôkố bu ‘nâi to mơeăm păn roăng vâ xo ah hmôi gá rế ai kuăn hên, ai liăn ngân tơniăn, ‘măn kơdĭng liăn vâ pro hngêi. Nôkố, rêm hâi á lăm poê nhâ chĕm pu pái, kơnốu á ngăn long ki păn xi xŏng ăm vâi, drêng ối a hngêi mê gum gá păn roăng pu pái”.

Pôa Diệp Phước Nghĩa, bêng Mỹ Xuyên, kơnôm châ mung liăn kơjo gum 50 rơtuh liăn ing 2 rôh mung, hiăng pêt prá alâi plâi pôm a ƀăng tơnêi 4 tíu. Pôa ối roê krâ kơmăi tôh têa lo i iâ ki kơdĭng têa, ư̆ng yŭng khoa hok kih thuât ƀă kơmăi kơmok tung pêt mâu hdrê pêt, mê liăn tơkâ châ lối 50 rơtuh rêm hơnăm. Sap ing tơdroăng tŏng gum dêi Tơnêi têa rơtế ƀă hiâm mơno mơ-eăm, pôa hiăng châ pro hngêi ối lĕm ƀă hiăng hluăn ing kơtiê a hơnăm 2024.

“Nôkố pêt mâu prá alâi, plâi pôm ôh tá mơhrê hên ivá drêng xúa kơmăi tôh têa lo i iâ, xúa mô-tơr hrik tôh têa, châ kơdĭng liăn. Pakĭng mê, troăng prôk châ pro troh a chiâk mê khu ki roê tơmeăm pêt mot troh a chiâk roê mâu tơmeăm pêt tơ’lêi hlâu. Vâi krâ kuăn pơlê ai tơnêi achê dêi rơpó xuân mơhnhôk dêi rơpó rơtế rak ngăn dêi kế tơmeăm pêt vâ ăm dâi lĕm, plâi kơtóu châ xo hên”.

Pơlê kong kân Cần Thơ klêi kơ’nâi ‘mot tơkŭm ai vâ chê 495.000  ngế hdrông kuăn ngo, tung mê, hên má môi cho kuăn pơlê Khmer ƀă lối  11.000 ngế. Tung hơnăm hdrối nah, pơlê kong kân hiăng tơbleăng pêi tơƀrê Tơdroăng pơkâ dêi tơnêi têa mơnhông cheăng kâ rêh ối pơlê pơla kơpong hdrông kuăn ngo, ƀă tâi tâng kơxô̆ liăn lối 305 rơtal. Ing mê, hên mâu troăng prôk, hngêi trung hriâm, hngêi pơkeăng pơlât châ pro lĕm kâk; hngêi ối ƀă kơxô̆ liăn ăm mung châ tŏng gum, ăm kuăn pơlê mung pêi chiâk deăng, rế hía rế mơdêk tơdroăng rêh ối, pêi lo liăn ngân ƀă mơnhông hlê plĕng tung hiâm mơno.

Troh nôkố, kơxô̆ rơpŏng kơtiê tung kuăn pơlê Khmer dêi pơlê kong kân hiăng kơdroh ối vâ chê 1.900 rơpŏng. Pôa Lê Trung Tuấn, Phŏ hnê ngăn Vi ƀan cheăm Thạnh Thới An, Pơlê kong kân Cần Thơ ăm ‘nâi:

“Pakĭng cheăng tối tơbleăng mâu troăng hơlâ tŏng gum mâu kuăn pơlê hdrông kuăn ngo iâ mơngế, cheăm ối tơtrŏng troh cheăng hnê pêi cheăng ing mâu lâm hnê hriâm kih thuât păn roăng mơnăn, hnê pêi chiâk, hnê cheăng pêi ƀă hên ki ê. Ing mê, gum kuăn pơlê mơdêk ki rơkê tung tơdroăng cheăng pêi, gum mơnhông cheăng kâ lơ veăng pêi cheăng a mâu kŏng ti vâ pêi lo tơ’nôm liăn ăm rơpŏng hngêi”.

Tung la ngiâ ah, Pơlê kong kân Cần Thơ kô pêi pro tơdâng tơ’mô mâu hnoăng cheăng, troăng hơlâ mơnhông cheăng kâ rêh ối pơlê pơla; mơdêk rĕng tơdroăng ki pro mâu tơmeăm khoăng, tơdroăng tơkêa ối tung mâu tơdroăng pơkâ dêi tơnêi têa; rak tơniăn ăm kuăn pơlê châ pơxúa tŭm, tâi tâng mâu troăng hơlâ tŏng gum tiô pơkâ, ing mê, rế mơdêk tơdroăng rêh ối.