A Ratanakiri, ing tơdroăng tối tơbleăng dêi pôa Sêu Than, ối a pơlê Lâm, cheăm Bọ Nhầy, tơring Oyadav, khu ki ti tăng mơnhên, séa ngăn kơpong kong Mung Tum, kơtăn dâng 9km vêh ngiâ Peăng mâ hâi lo, ƀă ti tăng chiâ rôu xo châ 2 kơxêng kiâ mô đô̆i. A Stung Treng, ing tơdroăng tối tơbleăng dêi pôa Đeng Keo, 67 hơnăm, ối a Phum Pha Bang, cheăm Thmor Keo, tơring Siêm Pang, Đô̆i K52 ti tăng peăng parôu pơlê Nhang Sum ƀă chiâ rôu xo châ 1 kơxêng kiâ mô đô̆i.

Mâu kơxêng kiâ mô đô̆i tá hâi ‘nâi inâi, châ mơnhên hlâ tung tơplâ xâ Mih. Khu cheăng ti tăng xuân hiăng châ hlo hên tơmeăm môi tiah kơdjiê̆n ếo, yep kơxu, ka-mel, mơngeăn ƀă vŏng (ning nong). Pêi pro tơdroăng pêi cheăng ‘’500 hâi măng’’, sap ing hâi lơ 13/8 troh nôkố, Đô̆i K52, kong pơlê Gia Lai hiăng ti tăng chiâ rôu xo châ 5 kơxêng kiâ mô đô̆i.