Hơnăm hriâm nếo 2026 - 2027, kơvâ ngăn hnê hriâm ƀă hnê mơjiâng tuăn ngoâ rơkê kong pơlê Lâm Đồng tiô tối hdrối kô ăm xúa 250 lâm hriâm, tung mê ai 200 to lâm hriâm ƀô̆ môn ƀă 50 lâm hriâm ki ai tơdjâk troh ki ê hía. Rơtế amê cho mâu tíu ki xah hêi, tíu ki pơtâp ivá ƀă kơbong ki lăm ti dế, veăng pro ăm rế hía rế pro klêi hngêi trung lâm hriâm, pêi châ tơdroăng ki vâ hriâm tâp ăm vâi o hok tro.

Rơtế ƀă tơdroăng ki roê mâu kế tơmeăm xúa tung mâu hngêi trung lâm hriâm, tơdroăng ki khŏm mơeăm ai tŭm hlá mơ-éa hriâm ăm hok tro, malối cho hok tro a kơpong xơpá xuân châ mơnhên cho hnoăng cheăng ki kal hdrối vâ mot hơnăm hriâm nếo. Ki hdrối tâ Khu ngăn hnê hriâm ƀă hnê mơjiâng tuăn ngoâ rơkê Lâm Đồng hiăng pơkâ thế xoăng lối 49,7 rơtal liăn vâ roê hlá mơ-éa hriâm rôh má 1 ăm hok tro a mâu hngêi trung phôh thong kuăn ngo ai tíu kâ koi ối pơtê; hok tro a 5 to cheăm tơkăng kong, Kơpong tíu rêh ối Phú Quý ƀă mâu cheăm ki malối xơpá.

A mâu hngêi trung hriâm, tơdroăng ki pro kơtuh ‘măn mâu hlá mơ-éa xúa tơdjuôm, tíu ‘măn rak mơ-éa hriâm, mơhnhôk tơdroăng ki diâp mơ-éa ƀă ăm mung mâu hlá mơ-éa pơla mâu hneăng hriâm pơtối châ mơdêk rơdêi. Mâu hngêi châ kơjo tŏng gum hok tro hdrông kuăn ngo, hok tro ối tung rơpŏng kơtiê, vâ chê kơtiê, hok tro chó chêng tơvê kŏng, kuăn tê, ing mê veăng rak tơniăn ăm tâi tâng mâu hok tro pơrá ai tŭm hlá mơ-éa hriâm vâ hriâm tâp, pôi tá ăm tơdroăng ki xơpá ‘na liăn ngân chiâng tơdroăng ki mơdât vâi o vâ troh hngêi trung.

Pôa Nguyễn Văn Quang, Phŏ hnê ngăn Vi ƀan cheăm Dam Rông 4, kong pơlê Lâm Đồng ăm ‘nâi, tơdroăng ki hbrâ rơnáu ăm hơnăm hriâm nếo dêi cheăm hiăng klêi, hbrâ rơnáu tơdah lối 4.300 ngế hok tro troh hngêi trung:

“Kơƀăng tăng hngêi trung lâm hriâm tâng hiăng ton, tro tơ’nhiê ngin hiăng xoăng liăn vâ ‘mêng rơnêu. Mâu kế tơmeăm xúa tung hnê hriâm, kế tơmeăm xúa tung hriâm tâp tâng ôh tá bê mê ngin hiăng séa ngăn ƀă ăm liăn roê tơdrêng hlối. Troh nôkố mâu kơƀăng tăng, hngêi trung lâm hriâm ƀă tá hlá mơ-éa hriâm mâu hngêi trung dêi Dam Rông 4 hiăng ai tŭm. Cheăng rah xo tâi tâng mâu vâi muăn tung hơnăm hriâm pơrá châ troh hngêi trung hriâm. Ngin kô mơ-eăm tơmâng ngăn tro má môi ƀă mâu vâi muăn cho hok tro ối tung rơpŏng kơtiê, rơpŏng xơpá ƀă kuăn pơlê hdrông kuăn ngo”.