Kơmăng pơxiâm po djâ troh tơdroăng ngê̆ thuât ai 3 tơdroăng pêi pro: ‘’Rơpâu reăng riu koi’’, ‘’Têa rơlêa krếo rơpâu reăng’’ ƀă ‘’Rơpâu reăng kơneăng’’. Ing kơmăng rêi nhak, kơhnhon xuăng, on bâ eăng ƀă mơđah tơbleăng a tíu mơđah, tơdroăng vêh mơhno troăng prôk dêi mâu mơngiơk reăng ing kơpong kân rơdâ Tây Nguyên vêh kơphô̆ têa kơxĭ Quy Nhơn, mơjiâng chiâng tíu tơkoh pơla ngi kong ƀă têa kơxĭ.

Leh tơbleăng tơkŭm po troh hâi lơ 30/11, lôu péa tê kơtê sap ing 7 chôu troh 21 chôu rêm hâi. Tơmối kô châ ngăn rơpâu loăng, khu reăng ki phá tơ-ê dêi Tây Nguyên ƀă hên kơpong; châ tâ châ hlo mâu tơdroăng mơhno khôi túa lĕm tro, ngê̆ thuât, xah hêi, kế kâ. Kơmăng hâi Tơdrốu ƀă hâi Tĭng rêm măng tĭng ai tơdroăng trâm mâ mơhno khôi túa lĕm tro chêng koăng Tây Nguyên.