Tung mâu hâi ki kố, mâu rôh kong mêi rêm hâi a tíu mơjiâng pro Hngêi trung ai Tíu kâ koi ối pơtê râ má môi ƀă má péa kơpong tíu tơkăng kong dêi kong pơlê Gia Lai. A cheăm Ia Chia, tơdroăng pêi cheăng pá kong thế pơtê tung hên hâi. Rêm rôh kong prăng mêi, hrĭng ngế kŏng nhân mơdoh pêi cheăng tơrêm chôu vâ pro thế rĕng kêi. Pôa Vũ Phúc Tuân - Ngế pơkuâ pro hngêi trung a cheăm Ia Chia, kong pơlê Gia Lai ăm ‘nâi:

“Ƀă tơdroăng cheăng ối hên ‘nâng, Khu xiâm pơkuâ kŏng ti ngin dế mơhnhôk tăng mâu ngế ing peăng Kơnhŏng tơnêi têa troh. Vâ tơkŭm rĕng pê, ngin rôe ăm vĕ tơƀai vâ mâu kong nhân troh pêi cheăng a tíu ki dế mơjiâng pro. Nôkố, tơdroăng mơjiâng pro hiăng vâ klêi, ngin dế lăm tăng ing 40 troh 50 ngế peăng Kơnhŏng tơnêi têa troh pêi cheăng. Pakĭng mê, ngin ối xúa kŏng ngê̆ plong, pêi, tơkŭm ƀă mơngế ki hmâ pêi rơkê vâ rĕng klêi, pêi tơ’nôm chôu, pêi pơla chôu ki pơtê, kô ai mơhá tơ’nôm ăm mâu ngế kŏng nhân ki pêi mê”.

Hngêi trung hnê ai tíu kâ koi ối pơtê péa râ mơhriâm, má môi ƀă má péa a tíu tơkăng kong Ia O xuân dế tá hâi tơniăn, hrá pro klêi. Pôa Nguyễn Dũng Anh, Phŏ pơkuâ tíu mơjiâng pro ăm ‘nâi, mâu tíu ki hâi klêi kal thế ai mơngế pêi cheăng rơkê, pá vâ tăng mơngế ki pêi cheăng iâ khế. Khu pơkuâ mơjiâng pro kô mơhá tơ’nôm liăn a chôu pêi kơmăng:

“Nôkố, mâu tơdroăng cheăng ki u ối kal mơngế rơkê pêi cheăng kơvâ ki mê, môi tiah pơkrâ, pơklêp gât, pro mâu tíu kal klêi hlối. Ngin dế tơkŭm pro ƀă mơhnhôk tơ’nôm mơngế pêi vâ pêi tá kơmăng, pêi tơ’nôm chôu vâ teăm klêi. Nôkố, tâi tâng mâu kăn ƀô̆, kih sư xuân môi tiah mơngế pêi cheăng xuân mơ-eăm pêi vâ rĕng klêi, hlối pơcháu hngêi trung mê hdrối vâ mot hơnăm mơhriâm nếo”.

Troh tơdế khế 8, hên tơdroăng cheăng pêi krâ ‘măn meăn pro tâi tâng 7 toăng hngêi trung hnê ai tíu kâ koi ối pơtê râ má môi ƀă râ má péa a mâu cheăm tơkăng kong dêi kong pơlê Gia Lai pêi châ dâng 85%. Mâu lâm hriâm, tíu koi pơtê ƀă hngêi ki xúa hên tơdroăng cheăng tâng vâ tối hiăng kêi ‘na tơdroăng mơjiâng pro, la mâu tíu ki hâi klêi cho hngêi kâ hmê, hngêi pêi cheăng, bơrô hngêi trung, hngêi  thái cô ối xuân pêi hrá sap 5 hâi troh tơdế khế.

Vâ kơjo kum mâu khu mơjiâng pro rĕng klêi tiô pơkâ, vâ chê 780 ngế kăn ƀô̆, mâu lêng pơtối lăm ngăn vâ pêi a tíu mơjiâng pro mơhé hiăng klêi mâu tơdroăng pơcháu. Đăi tă Nguyễn Công Ngân - Phŏ Chính ủi Sư đoân 320, Kuân đoân 34, pơkuâ lêng kơjo kum a tíu cheăng dêi cheăm Ia O ăm ‘nâi:

“Krê to Kuân đoân 34,  ngin kơjo kum a cheăm Ia O, hiăng mơjiâng pro tâi tâng lối 300m2 mơnât rơtâ tá hngêi trung. Pêi luâ pơcháu sap lơ 18/7. Nôkố, mâu lêng ngin pơtối kum khu mơjiâng pro mâu kơpong peăng dế tung hngêi trung hriâm”.

Hên măng tĭng hdrối, Khu Kăn pơkuâ hnê mơhno Vi ƀan kong pơlê Gia Lai đi đo séa ngăn a mâu tíu pêi cheăng, ngế pơkuâ ‘no liăn cheăng ƀă khu mơjiâng pro vâ gum mâu tơdroăng pá, tơvâ tơvân ki nếo ai. Pôa Lâm Hải Giang, Phŏ kăn hnê ngăn Vi ƀan kuăn pơlê kong pơlê Gia Lai tối, kong pơlê ôh tá ‘mâi hơ‘lêh, hâi pê klêi tơdroăng tơkêa bro; pơkâ thế mâu tíu pê cheăng mơhnhôk hên ngế pêi, hbrâ tơmeăm, tơkŭm pêi tro khoa hok ƀă pêi ti lâi vâ rĕng klêi mâu tơmeăm khoăng ki pơcháu vâ rĕng xúa tung hơnăm mơhriâm nếo.  

"Mâu tíu pêi cheăng, khu mơjiâng pro thế ‘nâi nhên, athế teăm kêi tung hâi leh mot hơnăm hriâm nếo a 7 to hngêi trung hnê ai tíu kâ koi râ má môi ƀă râ má péa, cho tơdroăng pơklât thế pê khŏm klêi, cho tơdroăng thế ing plâi nuih dêi mâu ngế ki pêi. Ƀă hên túa, pin thế tơkâ luâ xơpá, mơ-eăm ƀă mơ-eăm pêi khŏm thế klêi mâu tíu ki kal vâ xúa tung hriâm tâp dêi vâi muăn, vâ hơnăm hriâm nếo, mâu vâi muăn ai hngêi trung nếo vâ mot mơhriâm”.

Bú ối lối pa môi măng tĭng hdrối hâi vâ mot hơnăm hriâm nếo, a mâu tíu dế mơjiâng pro Hngêi trung Phôh thong râ má môi ƀă râ má péa a mâu cheăm tơkăng kong dêi kong pơlê Gia Lai, mâu tíu mơjiâng pro dế thâ pêi rĕng tơ’noăng ƀă hâi chôu vâ teăm pro klêi tơdah rơpâu ngế hok tro mot tung hơnăm mơhriâm nếo tung hngêi trung ki lĕm mê.