Cheăm Vụ Bổn, kong pơlê Dak Lak ai 8 toăng hngêi trung ƀă rêm râ hriâm sap ing mầm non troh râ má péa. Tiô pơkâ ‘mot tơkŭm, cheăm bu ối 3 to hngêi trung, mê cho 2 hngêi trung péa râ râ má môi – râ má péa ƀă 1 hngêi trung mầm non. Pôa Nguyễn Huy Hoàng, Kăn hnê ngăn Vi ƀan cheăm Vụ Bổn ăm ‘nâi, túa pơkâ châ chêh pro tung tơdroăng séa ngăn rêm toăng hngêi trung, xo rơkong tơpui tối dêi Đảng ủi, kăn pơkuâ mâu hngêi trung ƀă tơmiât nhên tơdroăng ki ai khât dêi cheăm.

“Tung pơla chêh pro túa pơkâ, ngin hiăng pâ rơkong tơpui dêi Đảng ủi, tâi tâng mâu kăn pơkuâ dêi mâu hngêi trung, tung túa pơkâ xo ngế ki hriâm pro ngế ki xiâm. Ƀă môi to cheăm kơpong hngế hngo xơpá, ngin xuân ối rak vế tơniăn tŭm troăng hơlâ dêi Đảng, Tơnêi têa ƀă tơtro ƀă tơdroăng ki ai khât”.

Rơtế ƀă tơdroăng chêh pro klêi túa pơkâ, mâu hngêi trung hriâm mơdêk rơdêi hnê tối, ‘nâi nhên tuăn tơmiât vâ dêi kăn ƀô̆, thái cô ƀă nôu pâ dêi mâu vâi hok tro. Mâu tơdroăng ki ai tơdjâk troh khu tơrŭm hngêi trung lâm hriâm, mâu kăn ƀô̆ ƀă tơdroăng ki hriâm tâp châ tơpui tơno nhên, tơpui tối leăng vâ pro tơdroăng ki môi tuăn hdrối vâ tơbleăng pêi. Jâ Võ Thị Cẩm Hoa, Ngế pơkuâ hngêi trung Mauh yăo Hoa Ban Trắng, cheăm Dliê Ya, kong pơlê Dak Lak ăm ‘nâi:

“Ngin hnê tối tro tâi tâng kăn ƀô̆, thái cô, mâu ngế cheăng: Hmiân tuăn, tơniăn hiâm mơno, hbrâ hiâm mơno vâ pêi pro troăng hơlâ ‘mot tơkŭm tíu pêi cheăng dêi Tơnêi têa. Má péa, hnê tối tung mâu Zalo troh mâu nôu pâ vâ mâu nôu pâ hmiân tuăn; maluâ ‘mot tơkŭm la kuăn ‘nĕng pin xuân ối hriâm a mâu hngêi trung ki achê má môi, tơ’lêi hlâu má môi”.

Ƀă a hngêi trung Râ má môi Nguyễn Trãi, cheăm Vụ Bổn, mâu tơdroăng ki tôu tuăn apoăng ‘na túa tơrŭm mâu hngêi trung xuân châ hngêi trung tơpui tơno, tơpui tối leăng nhên. Ing ‘nâi nhên tơdroăng, hên kăn ƀô̆, thái cô ƀă nôu pâ mâu hok tro rơtế môi tuăn ƀă túa pơkâ. Pôa Trần Hải Đường, Ngế pơkuâ hngêi hngêi trung tối:

"Kố cho troăng hơlâ ki tơtro vâ kơdroh tíu pêi cheăng hnê hriâm ƀă thăm tâk kơxô̆ ngế thái cô hnê. Xua nôkố, kơxô̆ ngế hok tro tíu ki rơlối tíu ki ối kal. ‘Na hiâm mơno, klêi kơ’nâi ‘nâi nhên tơdroăng mê mâu kăn ƀô̆, thái cô ƀă nôu pâ dêi mâu vâi hok tro pơrá môi tuăn. Rế hía rế vâ mơjiâng hngêi trung châ tiô pơkâ dêi tơnêi têa, xuân môi tiah djâ ki hlê plĕng dêi kuăn pơlê rế hía rế mơnhông”.

Tung lâp kong pơlê Dak Lak nôkố ai 1.267 to tíu hnê hriâm kông lâp. Klêi kơ’nâi hên rôh séa ngăn, túa pơkâ nếo má môi tiô tối kô kơdroh 646 to hngêi trung tơ’mô ƀă 50% hngêi trung. A rôh pêi cheăng ƀă mâu khu râ kơvâ cheăng, pôa Lương Nguyễn Minh Triết, Ngế cheăng tung khu xiâm Đảng, Kăn pơkuâ hnê ngăn Đảng kong pơlê Dak Lak pơkâ thế tơdroăng ki ‘mot tơkŭm athế tro ƀă troăng hơlâ pơkâ dêi Tơnêi têa, pro lê lê̆m tíu pêi cheăng pơkuâ ngăn tro ƀă tơdroăng pơkâ mâu ngế cheăng tiô troăng kơdroh ƀiên chê̆ pơkuâ ngăn hnê hriâm, tơ’nôm ƀiên chê̆ vâ hnê:

“Thái cô pêi cheăng pơkuâ ngăn hnê hriâm mê chiâng lăm troh tơdrêng lăm hnê, lơ lăm troh a cheăm pơtroh tơ’nôm ăm mâu kăn ƀô̆ pơkuâ hnê hriâm a cheăm bêng. Rak vế tơniăn túa pơkâ hok tro a mâu hngêi trung hriâm, hngêi trung ki pro a thôn pơlê, ‘mot tơkŭm xing xoăng tơƀrê mâu thái cô vâ mơdêk ivá pơkuâ ngăn, tơƀrê tung tơdroăng ki mơdêk ƀă mơdêk ki rơkê plĕng tung hnê ƀă hriâm. Pôi tá pro tơdjâk troh cheăng hriâm, tơdroăng ki vâ xúa hnê hriâm dêi hok tro”.

‘Mot tơkŭm hngêi trung hriâm a Dak Lak dế châ pêi pro tiô troăng ki pro lế lê̆m tíu hnê hriâm. Tơdroăng ki hbrâ rơnáu dêi kăn pơkuâ, kơvâ hnê hriâm ƀă hnê mơjiâng tuăn ngoâ rơkê rơtế ƀă mâu hngêi trung, dế pro chiâng tơdroăng ki môi tuăn dêi kăn ƀô̆, thái cô ƀă nôu pâ hok tro, mơjiâng tơdroăng vâ tung pơla vêh tơkŭm hngêi trung lâm hriâm châ tơniăn, ôh tá tơdjâk troh hok tro, malối cho a kơpong hngế hngo, kơpong tíu tơkăng kong.