Tơdroăng tơkŭm trâm mâ mâu ngế ki châ hlo ƀă mâ tơdroăng tơplâ ton nah ai péa tơdroăng "Xiâm ki tơplâ troh hlâ" ƀă "Pơtối chêh ƀài hơdruê”.  Tơdroăng tơkŭm po hiăng vêh tơbâ tơdroăng tơplâ ó rơdêi dế Pơlê kong xiâm sap ing mâu hâi lâp tơnêi têa xông tơplâ xâ hơnăm 1946, khu lêng ƀă kuăn pơlê Hà Nội khên tơnôu tơplâ tung plâ 60 hâi măng khŏm plâ hnâp ki hriăn vâ “plâ rĕng, hlối rĕng ƀlêi" dêi khu xâ Pơhlăng, rak vế tơniăn ăm kơ koan dêi Đảng, Chin phuh lăm troh a kơpong tơplâ, pro tơ'lêi hlâu vâ tâi tâng hdroâng mơngế veăng tơplâ xâ ton hơnăm.

Chêh ‘măn mâu tơdroăng ki kơnía git tơplâ khên tơnôu mê, cho mâu kuăn pơlê Hà Nội, mâu lêng mố đô̆i "Khŏm tơplâ troh hlâ vâ tơnêi têa châ tơleăng lĕm”.

Veăng tơplâ xâ sap ối kŭn nah, pôa Phạm Đình Luận mô đô̆i hneăng hdrối nah, cho mô đô̆i tung Trung đoân Pơlê kong xiâm, chôu vế tơdroăng tơplâ nah:

"Drêng mê nah á ối a kơphô̆ Hàng Bông. Pơhlăng ‘mêi ‘nâng pro hên tơdroăng xôi. Drêng lâp tơnêi têa xông lăm pơplâ tiô rơkong krếo thế dêi Pôa Hồ, tâi tâng kuăn pơlê ƀă mô đô̆i, vâi krâ vâi hdrêng vâi droh rơtăm pơrá veăng tơplâ a Hà Nội... Drêng mê nah á nếo 9 hơnăm tê, ƀă tung Trung đoân Pơlê kong xiâm ôh tá xê to môi ngế á cho o kŭn, mê ối hên hĭn tơdroăng tơpui tơno ăm mâu đông ki ê há”.

Tung tơdroăng trâm mâ tơpui tơno, tơdroăng chêh xo mơnhên rơdâ châ mơđah tung um tơvi tơbleăng mâu tơdroăng ki ai khât dêi mâu ngế ki châ hlo nah, mâu kăn ƀô̆, mâu lêng Khu xiâm pơkuâ ngăn lêng Pơlê kong xiâm hiăng vêh mơhno mâu tíu tơplâ ki bâ eăng a hbo plêng Hà Nội tung 12 hâi măng pro chiâng "Rôh tơplâ Điện Biên Phủ a hbo plêng" hơnăm 1972.

Pơtối mê cho um mâu hvêa chêng prôk djâ troăng ahdrối tung pêi cheăng a rơxông hơniâp lĕm dêi kăn ƀô̆ mâu lêng mố đô̆i tung hbrâ ví xía vâ kong prâi pro ôh tá tơniăn, tŏng xo mơngế hliăng tiâ, kring vế tơniăn ăm rêm kơphô̆, troăng prôk. Ing mê hiăng tơbleăng tơdroăng ki hâk tơngăm, mơhnhôk tơdroăng ki rơhêng vâ pleăng hnoăng cheăng dêi rơxông nôkố pơtối prôk tiô troăng hơlâ "Khŏm tơplâ troh hlâ vâ tơnêi têa châ tơleăng lĕm” pơtối chêh ƀai hơdruê ƀă tơdroăng pêi ki nhên, rơtế tơdjuôm ivá rak vế hơniâp lĕm, mơjiâng Pơlê kong xiâm Hà Nội khôi túa lĕm, rơkê plĕng, tiô rơxông nếo nôkố. Veăng tơdroăng trâm mâ, Nguyễn Viết Thịnh ngế rơtăm ối a bêng Ô Chợ Dừa, tối:

"Rơxông tơplâ kring vế hơnăm ki mê nah hiăng xúa mơheăm chá dêi tơná vâ rak tơrêm kơphô̆, rêm toăng hngêi. Tiah mê rơxông ối nếo ngin o hâi kố khŏm xúa ivá dêi hơnăm ối nếo, hiâm mơno khên tơnôu ƀă tuăn ngôa rơkê dêi tơná vâ rak vế ƀă kring gak Pơlê kong xiâm Hà Nội rế hía rế xông rơdêi kro mơdrŏng, rơkê ƀă hơniâp lĕm.