Tiô tối tơbleăng dêi Tíu xiâm hbrâ mơdât châi tamo kong pơlê Dak Lak (CDC Dak Lak), riân troh nôkố, tung lâp kong pơlê hiăng ai 8.433 ngế tro pơreăng tơngê lo mơheăm, tâk 25% tâng vâ pơchông ƀă khế kố hơnăm nah. Krê mâu hâi achê kố, rêm hâi ai lối 100 ngế tro. Hiăng ai 2 ngế hlâ a bêng Tân An ƀă cheăm Quảng Phú. Mâu cheăm bêng ki mơni kô tâ pơreăng hên, mê cho mâu bêng Buôn Ma Thuột, Tân Lập, Tân An, Ea Kao ƀă mâu cheăm Ea H’Leo, Hòa Phú, Tân Tiến, Krông Pač, Ea Tul, Čư̆ Mgar. Bêng Thành Nhất ƀă mâu cheăm Ea Knuêč, Pơng Drăng, Ea Drông, Ea Na, Ea Drăng ối tung khu ki ai pơreăng tâ tú hên.

Kơxô̆ ngế tâ pơreăng tâk rĕng tung mâu hâi achê kố châ ngăn cho tơdjâk troh kong mêi ton, tơ’lêi ăm tri trôu kiâ ngu ngĕng kơtâ ai kuăn ƀă pâk ‘mot trếo pơreăng. Tung pơla mê, cheăng hbrâ mơdât pơreăng a mâu tíu ki ‘nâ tá hâi tơƀrê, kuăn pơlê ối ôh tá vâ tơmâng.

Ƀok thái pơkeăng Hoàng Hải Phúc, Kăn pơkuâ CDC Dak Lak ăm 'nâi, kơxô̆ mơngế tâk hên pro Cấp cứu Nhi ƀă Nhi sơ sinh, Hngêi pơkeăng kân kơpong Tây Nguyên đi đo ai hên ngế lăm troh pơlât; hên tíu khăm pơlât tơnêi têa ƀă pa kong tơnêi têa a peăng mâ hâi luô kong pơlê Dak Lak xuân hâ ho môi tiah mê. CDC Dak Lak dế thâ pêi pro mâu troăng kơdroh mơngế tâ tú nếo, hbrâ mơdât mâu tíu ki tơ’lêi tro, pôi tá ăm pơreăng châ tâ tú troh lâp lu.

“Tíu xiâm Hbrâ mơdât châi tamo kong pơlê Dak Lak tí tăng ‘nâi plĕng ăm Khu ngăn pơkeăng ƀă khăm pơlât, Vi ƀan hnê ngăn kong pơlê Dak Lak pơtroh hlá mơ-éa hnê mơhno Vi ƀan hnê ngăn mâu cheăm, bêng athế mơdêk rơdêi hnoăng cheăng hbrâ mơdât pơreăng ƀă túa ki tơbleăng pêi mâu rôh mơgrúa lĕm kong prâi tơnêi tơníu; ƀă kuăn pơlê athế rak vế xêh tơná. Krê ƀă kơvâ ngăn pơkeăng ƀă khăm pơlât, ngin kô pơtroh kăn ƀô̆ chu troh a mâu kơpong ki ai pơreăng lăm ngăn, mơnhên tối chih kơxô̆ vectơr, kơlo kơxô̆ mâu kiâ ngu ngĕng vâ pơtroh mâu rơxế, kơmăi kơmok, xôh pơkeăng ƀă rơxế ô tô vâ kơdê pơreăng, kiâ ngu ngĕng”.

Tiô Tíu xiâm hbrâ mơdât châi tamo, sap apoăng hơnăm troh nôkố, lâp kong pơlê Gia Lai ai lối lối 7.600 ngế tơngê lo mơheăm ƀă 1 ngế hlâ. Tâng vâ pơchông ƀă khế kố hơnăm 2025, kơxô̆ ngế tơngê tâk 5.059 ngế. Lâp kong pơlê ai 393 tíu tâ tú, tâk 28 tíu tâng vâ pơchông ƀă khế kố hơnăm 2025. Kơvâ ngăn pơkeăng ƀă khăm pơlât hnê tối hbrâ mơdât pơreăng tơngê lo mơheăm cho hnoăng cheăng ki kal châ pêi pro đi đo, pơtối, malối tung rơnó mêi, cho rôh ki tơ'lêi ăm tri trôu ai kuăn ƀă xông kân. Tơdroăng tơrŭm krá tơniăn pơla kơvâ ngăn pơkeăng ƀă khăm pơlât, khu râ kăn pơkuâ ƀă kuăn pơlê, ki rơhêng vâ tối cho tơdroăng pêi pro kơdê kiâ ngu ngĕng tung rơpŏng hngêi kô veăng gum mơdât kiâ ngu ngĕng, kơdroh kơxô̆ mơngế tro tâ pơreăng ƀă mơdât pơreăng xông tâ tú, ing mê rak vế ivá kuăn pơlê.