Sap ing hâi lơ 30/9 troh lơ 6/10, ing tơdroăng tối tơbleăng dêi kuăn pơlê, Khu K52 hiăng tơkŭm khu lêng séa ngăn, chiâ xo ƀă tơkŭm châ 5 to kơxêng kiâ mố đô̆i a kong têa Kul. Tung mê, 1 kơxêng kiâ a kong pơlê Rattanakiri, 2 kơxêng kiâ a kong pơlê Stung Treng ƀă 2 kơxêng kiâ a kong pơlê Preah Vihear. A mâu tíu ki tơkŭm, khu ki ai tơdjâk troh châ xo hên tơmeăm dêi mô đô̆i, môi tiah camel, on drêi, kơ'lo pơkeăng Penicillin,  mơngeăn meăm B52, kơdjiăn ếo lêng, ning nong, kơtong tâ liăn, hdrui xâk, nhĕng… Đô̆i K52 hiăng tơkŭm xo kơxêng, xâk, hnĕng ƀă mâu kơxêng ki u ối vâ kum ăm tơdroăng ki séa ngăn ADN mơnhên inâi mô đô̆i hlâ ki u ối nếo.

Ƀă tơdroăng ti tăng chiâ rôu xo, tơkŭm ‘măn môi tíu tung tơnêi têa, Đô̆i K52 hiăng ti tăng chiâ rôu xo tơkŭm châ tơ’nôm 3 kơxêng kiâ mô đô̆i a pơlê Bi, cheăm Ia Dom, kong pơlê Gia Lai. Ing tơdroăng tơbleăng dêi pôa Siu Bích (kot mâ hơnăm 1952, ối a cheăm) ‘na mâu tơnâp tơnêi tung kơdrum hngêi, tíu cheăng hiăng séa ngăn ƀă rôu xo châ 2 kơxêng kiâ mô đô̆i a hâi lơ 5/10 ƀă 1 kơxêng kiâ a kơxê lơ 7/10.