Troh tơdế khế 9/2026, kơvâ ngăn pơkeăng ƀă khăm pơlât kong pơlê Lâm Đồng ai lối 4.200 ngế tro pơreăng thĕn kŏng chêng rơkong, tung mê ai 2 ngế hlâ a kơpong Đức Trọng. Pơreăng tơngê lo mơheăm xuân ai lối 4.500 ngế ƀă ai 1 ngế hlâ. Tung lối 1 măng tĭng hdrối kố nah kơvâ ngăn pơkeăng ƀă khăm pơlât kong pơlê Lâm Đồng ai tơ’nôm 5 tíu ki ai pơreăng thĕn kŏng chêng rơkong tung tâi tâng kơxô̆ tíu tâ sap ing apoăng hơnăm troh nôkố tâk troh 75 tíu. Mâu tíu ki ai pơreăng châ ‘nâi tung pơlê pơla ƀă tung hngêi trung hriâm.

Tâng vâ pơchông ƀă khế kố hơnăm hdrối, kơxô̆ ngế tro pơreăng thĕn kŏng chêng rơkong tâ tú hên ƀă 4.040 ngế ƀă pơreăng tơngê lo mơheăm xuân tâk 240 ngế.

Xiâm kối châ mơnhên pro pơreăng thĕn kŏng chêng rơkong ƀă tơngê lo mơheăm tung kong pơlê Lâm Đồng tâk hên xua kong mêi hên, ki hngiâm kơchoh tâk cho tơdroăng ki tơ'lêi ăm tri trôu ai kuăn ƀă pâk ‘mot pro tâ tú pơreăng. Khế 9 xuân cho pơla hok tro vêh hriâm a hngêi trung pro pơreăng thĕn kŏng chêng rơkong tâ tú malối cho a râ mầm non ƀă râ má môi.

Khu ngăn pơkeăng ƀă khăm pơlât kong pơlê Lâm Đồng dế pơtối pêi pro hên troăng hơlâ vâ mơdât pơreăng thĕn kŏng chêng rơkong ƀă tơngê lo mơheăm, tung mê tơkŭm tung tơdroăng mơdât xiâm ki tâ tú; mơdêk ivá hbrâ mơdât pơreăng ăm mâu kăn ƀô̆, thái cô ƀă mâu ngế cheăng khăm pơlât hngêi trung hriâm; tơkŭm pêi pro tơdroăng mơgrúa lĕm hyôh kong prâi, kơdê kiâ ngu ngĕng; tíu khăm pơlât 'mâi mơnhông tơdroăng klâ xoăng, tơkŭm, pơlât; tơtrŏng rĕng châ 'nâi tơdroăng ki rế râ dêi pơreăng tơhĕn kŏng chêng rơkong ƀă tơngê lo mơheăm vâ pơlât tơdrêng, kơdroh tơdroăng ki hrá châ pơlât a hngê râ kơpêng.

Khu ngăn pơkeăng ƀă khăm pơlât kong pơlê Lâm Đồng xuân hiăng pơcháu ăm Tíu xiâm séa ngăn mơdât pơreăng kong pơlê rĕng mơnhên nhên túa virus ki pro chiâng pơreăng thĕn kŏng chêng rơkong ƀă tơngê lo mơheăm vâ mơnhên ki rơ-iô, tối hdrối tơdroăng pơreăng xông tâ tú xuân môi tiah mơjiâng túa pơkâ hbrâ mơdât tơtro.