Pôa Y Tong Ƀkrông, 47 hơnăm, hdroâng kuăn ngo Rơđế, ối a cheăm Ea Na, troh a Tíu xiâm khăm pơlât Krông Ana vâ khăm, séa ngăn ivá. A (ki-ôs) Kiosk ki rơkê plĕng, pôa châ hnê mơhno chêh 'mot dêi inâi chêh inâi khăm, séa ngăn tơdroăng ƀă xo kơxô̆ pơkâ tung to lâi phut. Sap ing chêh inâi troh drêng châ khăm ôh tá hluâ 20 phut. Pôa Y Tong tối ăm 'nâi:

 “Lăm khăm akố nôkố á hlo tơ'lêi hlâu khât. Hdrối nah, lăm khăm athế hbrâ rơnáu hên tơmeăm, la nôkố bu kal căn cước công dân, kuet mah klêi mê chêh tơdroăng châi tamo 'mot tung kơmăi mê hiăng klêi. Tơ'lêi hlâu khât. Kố cho tơdroăng châ tơƀrê dêi tơdroăng pơhlêh kơxô̆ tung kơvâ khăm pơlât ƀă mâu tơdroăng rêh ối dêi kuăn pơlê tung lâp tơnêi têa”.

Ôh tá xê to tơbleăng Kiosk ki rơkê plĕng, Hngêi pơkeăng cheăm Krông Ana hiăng chêh ‘mot tơdroăng châi tamo ‘mot tung hồ sơ điê̆n tưh sap ing khế 9/2025, chôa 'lâng pơhlêh hồ sơ ki chêh ƀă hlá mơ-éa. Kơmăi pơkuâ râk tâi tâng mâu tơdroăng ing tơdroăng cheăng kal kí, tơdroăng chêh hâi khế ‘na châi tamo drêng khăm pơlât, tơdroăng pơlât, séa ngăn, um troh đơn pơkeăng ƀă tơdroăng pơlât.

Ngế ki châi tamo kô chêh inâi khăm ƀă CCCD, VNeID lơ VssID, kum kơdroh chôu pro hlá mơ éa, kơdroh chôu tơkôm ton ƀă mơdêk ki tơƀrê tung pơkuâ ngăn. Ƀok thái pơkeăng Hồ Văn Lập, Phŏ kăn pơkuâ Hngêi pơkeăng pơlât Krông Ana tối ăm 'nâi, tíu cheăng dế pơ'lêh kơxô̆ tiô troăng rơhlâ dêi Khu xiâm ngăn pơkeăng ƀă khăm pơlât tơnêi têa ƀă tiô tối hdrối kô chêh ‘mot klêi a khế 11/2026.

"Tung tơdroăng pá puât, tíu pêi cheăng hiăng xúa pơlê pơla ƀă châ tŏng kum môi to Kiosk ki rơkê plĕng, ing mê khoh chiâng xúa hồ sơ điê̆n tưh vâ chêh ‘măn tung điê̆n tưh. Tiô troăng tơdroăng pêi pro troh khế 11/2026 dêi Khu xiâm ngăn pơkeăng ƀă khăm pơlât, Tíu xiâm kô hbrâ rơnáu lôi tâi tâng hồ sơ ki chêh ƀă hlá mơ-éa hdrối nah''.

Môi tiah a khu ngăn pơkeăng ƀă khăm pơlât, pơhlêh xúa kŏng ngê̆ dế châ mơdêk a khu ngăn pơkeăng ƀă khăm pơlât krê kong pơlê Dak Lak. Môi tiah Hngêi pơkeăng Đại học Y dược Buôn Ma Thuột, hiăng tơbleăng ai 100% kơmăi Kiosk chêh inâi khăm, kơmăi tĭnh ăm kơvâ ngăn pơkeăng ƀă khăm pơlât, tơdjêp tơdrêng pơla mâu kơvâ khăm, veăng khăm, bơrô, kum 'măn rak, pơtroh ƀă vêh pơtroh mâu um xup tối ‘na tơdroăng châi tamo.

Pakĭng mê, kơmăi nội soi châ tơkŭm AI ƀă kơbong xét nghiệm séa ngăn tơdroăng châi chiâng xup xo chêh xêh ƀă kơmăi, veăng kum mơdêk ki dâi lĕm ƀă tơƀrê tung khăm pơlât. Ƀok thái pơkeăng Võ Minh Thành, Ngế pơkuâ Hngêi pơkeăng ăm 'nâi, ƀă tơdroăng pơ'lêh kơxô̆ trâu rơdâ, ôh tá xê to tơdroăng tơdah ƀă pơlât tơniăn, mê mơngế tamo châi xuân tơ'lêi séa ngăn ivá dêi tơná.

“Klêi rôh khăm, pơlât châi tamo, ngế ki châi tamo châ ăm môi mah QR ki ai tơkŭm troăng link, ƀă drêng xup a mah, po ngăn kô hlo kơtâ ki chêh tŭm tơdroăng khăm, xét nghiệm, tối ăm ‘nâi mâu tơdroăng châi ki klâi ing um xup ƀă CT, MRI ƀă chiâng vâ tải ngăn ‘măn a kơmăi tính lơ tải ƀă phôn râng kŏng tơná. Tơ’lêi hlâu xua ngế ki khăm pơlât ôh tá êa râng hlá mơ-éa ki klâi ôh môi tiah hdrối nah”.

Tiô Khu xiâm ngăn pơkeăng ƀă khăm pơlât kong pơlê Dak Lak riân ngăn, 100% tíu khăm, pơlât tung kong pơlê hiăng xúa Căn cước công dân, Căn cước công dân điê̆n tưh (VneID) ƀă Ƀaoh hiêm Xah hội điê̆n tưh (VssID) vâ séa ngăn mâu tơdroăng khăm, pơlât, teăng ăm theh ƀaoh hiêm khăm pơlât ƀă hlá mơ-éa; hlối tơbleăng tơdroăng ki nâp liăn ôh tá xúa liăn mâ. Lối 771.000 ngế kuăn pơlê hiăng ai Hlá mơ-éa khăm pơlât ƀă điê̆n tưh.

Hên tíu pêi cheăng khăm pơlât hiăng tơbleăng chêh tơdroăng khăm ƀă điê̆n tưh, tung mê 8 tíu pêi cheăng khăm pơlât pơhlêh tâi tâng tơdroăng chêh khăm, tơdroăng châi tamo ƀă hlá mơ-éa. Pôa Phạm Minh Hữu, Phŏ pơkuâ ngăn pơkeăng ƀă khăm pơlât kong pơlê Dak Lak, ăm 'nâi tiô troăng hơlâ dêi Khu xiâm ngăn pơkeăng ƀă khăm pơlât, troh tâi khế 11/2026, tâi tâng tíu pêi cheăng Khăm pơlât a Dak Lak thế tơbleăng chêh inâi khăm ƀă Kiosk, xúa mơ-éa hla mơ-éa điê̆n tưh pơhlêh mơ-éa chêh ƀă ki hdrối nah tơkŭm mâu tơdroăng chêh 'na kuăn pơlê.

“Ngin dế tơkŭm séa ngăn tâi tâng mâu hngêi pơkeăng 'na kŏng ngê̆ thong tin, troăng hyôh vâ 'nâi tâi tâng hồ sơ khăm pơlât điê̆n tưh dêi kuăn pơlê. Nôkố 12 tơdroăng chêh tung kơmăi ‘na kuăn pơlê tơdjâk troh khăm pơlât dế châ tơbleăng pêi kơtăng tung tơdroăng pêi cheăng 90 hâi tiô hnê mơhno dêi Khu xiâm ngăn pơkeăng ƀă khăm pơlât ƀă kô klêi tung la ngiâ. Ing mê, ai tŭm tơdroăng chêh 'na kuăn pơlê khăm pơlât dêi kong pơlê Dak Lak…”.

Hơ'lêh kơxô̆ tiô hlá mơ-éa pơkâ 57 dêi Khu xiâm kal kí dế chôa 'lâng hơ'lêh túa pêi cheăng dêi kơvâ ngăn pơkeăng ƀă khăm pơlât Dak Lak, ing chêh inâi khăm, rak ngăn hồ sơ, tối tơdroăng châi tamo troh nâp liăn khăm pơlât. Tơdroăng tơdâng tơ'mô tung kơmăi ƀă mơdêk xúa ứng dụng kŏng ngê̆ ôh tá xê to mơdêk châ tơƀrê tơdroăng pơkuâ rak ngăn, mê ki kal tâ cho kơdroh hâi chôu, kơdroh pro mơ-éa ƀă pro tơ'lêi hlâu ăm mơngế châi tamo. Kố xuân cho xiâm kối vâ kơvâ ngăn pơkeăng ƀă khăm pơlât Dak Lak pơtối mơjiâng kơvâ ngăn pơkeăng ƀă khăm pơlât tro tiô túa nếo, xo kuăn pơlê pro xiâm.