A hngêi trung 3, phân hiê̆u 1, Hngêi trung Râ má môi Tây Nha Trang, kong pơlê Khánh Hòa, hok tro ối kâ kơhâi dế xuân thế vêh a hngêi a kơhâi dế hâi Pái rêm măng tĭng, kơ’nâi mê nôu pâ chiân mâu vâi o troh a hngêi trung ki xiâm vâ hriâm môn Tin hok. Hngêi trung ki pakĭng dêi phân hiê̆u 1 tá hâi ai kơbong kơmăi tĭnh, pro tơdroăng tơkŭm po hnê hriâm pơla mâu hngêi trung tá hâi tơdâng tơ’mô.

Hok tro akố xuân ôh tá ai liăn vâ veăng mot hriâm mâu tơdroăng môi tiah hok tro a phân hiê̆u ki xiâm lơ a hngêi trung ki xiâm. Jâ Nguyễn Thị Dung, nôu pâ hok tro lâm 4, phân hiê̆u 1, Hngêi trung râ má Môi Tây Nha Trang tối ki tơdroăng ối pá:

“Thế prôk ing hngêi trung tơ’nôm pakĭng kố troh hngêi trung ki xiâm nếo ai kơbong kơmăi vi tĭnh vâ hriâm. Ai nôu pâ hok tro ki lâi tôh chô lâi há vâ kơhâi dế chiên klêi mê troh 1 chô 30 phut kơxê pơto lăm peăng mê vâ hriâm. Tơdrêng amê hiăng hriâm tung hngêi trung laga hâi Pái rêm măng tĭng thế tơdah kuăn vêh môi tiah mê. Tối tơdjuôm tơdroăng kô ôh tá châ ƀăng mâu muăn a mâu hngêi trung ki xiâm, tơmeăm khoăng xuân tiah mê’’.

Tơmot chiâng môi gum kơdroh tíu pơkuâ laga tá hâi tơdâng tơ’mô ƀă tơdroăng hnê hriâm pơla mâu hngêi trung châ tơniăn tơdâng. Drêng kế tơmeăm khoăng tá hâi tơxâng tiô pơkâ, hok tro xuân tá hâi ai tŭm tơmeăm khoăng vâ hriâm, ƀă nôu pâ mê thế pôu râng tơ’nôm tơdroăng chiân dêi kuăn. Hngêi trung râ má môi Tây Nha Trang châ mơjiâng ing tơdroăng tơmot chiâng môi 7 toăng hngêi trung, mê cho hngêi trung xiâm ƀă 6 phân hiê̆u, ƀă 198 lâm, dâng 7.400 hok tro. Hngêi trung râ má péa Tây Nha Trang châ mơjiâng ing 6 hngêi trung, ƀă dâng 5.400 hok tro.

Tơdroăng tơmot chiâng gum môi tuăn pơkâ pêi, pơkâ ƀă xing xoăng hnoăng cheăng. Laga, troăng pêi hrĭng lâm, mâu phân hiê̆u ối kơtăn hơngế rơtế tơdroăng ki phá tơ-ê ‘na kế tơmeăm khoăng, ki má môi hok tro pro tơdroăng pơkuâ trâm hên pá puât. Khu pơkuâ hngêi trung thế mơdoh hên cho hnê mơhno tơdroăng pêi cheăng pơla mâu tíu cheăng, tơdrêng amê tơdroăng séa ngăn tơdroăng cheăng, thái cô ki ê veăng ngăn cô hnê hok tro hriâm ƀă ‘nâi tơdroăng thái cô, hok tro ki tá hâi chiâng. Pơkuâ ing mơ-éa, tối tơbleăng tơdrêng ôh tá chiâng teăng tâi tâng tơdroăng ki tơdrêng tiô tơtro tơdroăng pêi cheăng a rêm hngêi trung, ki má lối cho tơdroăng châ hlo ƀă tŏng gum teăm tơdrêng mâu hok tro kal tơmâng.

Ing tơdroăng ai khât kố, Vi ƀan bêng Tây Nha Trang pơkâ klâ Hngêi trung râ má môi ƀă râ má péa Tây Nha Trang, rêm  râ hriâm chiâng 2 hngêi trung krê. Pôa Nguyễn Công Danh, Phŏ Kăn hnê ngăn Vi ƀan bêng Tây Nha Trang, tối:

“Mâu vâi o hok tro Râ má péa dế pơxiâm vâ kân, thái cô séa ngăn kơtăng khât tơdroăng hriâm a hngêi trung. Sap ing 70 – 80 lâm, hên tiah mê, pơkuâ ngăn tơ’lêi hlâu tâ. Ƀă Râ má môi, môi ngế phŏ pơkuâ hngêi trung dế pơkuâ 1 phân hiê̆u, athế pơkuâ ngăn 4 tíu hngêi trung, 4 to hngêi trung mê ôh tá achê dêi rơpó, kơtăn hngế ing dêi rơpó. Tiah akố, a Hòn Nghê ối athế prôk luâ 1 to kroăng. Ôh tá kâi ngăn tâi tâng ôh, ‘na ki ton la ngiâ cho ôh tá tơniăn”.

Khế 8/2026, kong pơlê Khánh Hòa mơjiâng pro túa pơkâ klâ xoăng hngêi trung hriâm, tối tơbleăng ƀă pâ rơkong ing Khu pơkuâ hnê ngăn Đảng kong pơlê. Klêi kơ’nâi ‘mot tơkŭm môi tíu kơdroh troh 60%. Laga, tung lâp kong pơlê xuân ối ai 18 to hngêi trung lối 100 to lâm, ki hên cho a mâu kơphô̆ ki ai hên kơdrâm kuăn mơngế. Klêi kơ’nâi péa khế xúa, ối ai mâu cheăm bêng hiăng pơkâ mơ’no klâ lo ing hngêi trung. Nôkố Khu pơkuâ Hnê hriâm ƀă Hnê mơjiâng tuăn ngôa rơkê kong pơlê Khánh Hòa dế tơmâng xo tâi tâng rơkong tơpui, pơkâ dêi pơlê vâ séa ngăn mâu troăng pêi kân, ai hên phân hiê̆u, tíu hngêi trung ƀă pơlê pơkuâ rơdâ, ing mê tơbleăng troăng pêi ki tơtro.