Tơdroăng ki xiâm dêi Măng Mơhno túa lĕm tro kô po sap ing hâi lơ 18 troh 24/11, tro ƀă rôh tơkŭm po tơbâ: Hâi Tơrŭm tâi tâng hdrông kuăn ngo lơ 18/11. Hâi tơdroăng kơnía Việt Nam 23/11 ƀă Hâi Mơhno túa lĕm tro Việt Nam 24/11. Tơdroăng kố pơxiâm po ai inâi ‘Quảng Ngãi – Tơdroăng hơdruê tơrŭm” kô po a kong măng hâi lơ 18/11 a Tíu xiâm po hneăng hôp – mơđah tơbleăng um kong pơlê, bêng Cẩm Thành.

Tơdroăng kal dêi tơdroăng tơkŭm po hơnăm kố cho tơdjâk trâu rơdâ sap ing pơlê, cheăm. Tâi tâng 96 to cheăm, bêng, kơpong tíu pêi cheăng ƀă 1.098 kơpong tíu kuăn pơlê ối a kong pơlê pơrá chêh inâi tơkŭm po Hâi mơdĭng. Tung pơla mê, kơpong peăng mâ hâi Luô a bêng Kon Tum po rôh tŏn chêng koăng, kơhnhon xuăng ƀă mơhno túa lĕm tro tơmeăm OCOP a kơphô̆ kong măng Đăk Bla.