Tung pơla tơdroăng rêh kâ ối dêi pơlê pơla, pa ngiâ plông kuât kuăn dêi ƀuôn Ia Mrơn, cheăm Ia Pa, kong pơlê Gia Lai, toăng kâng ki xŏn châ rơnuâ pro lế lĕm mơnâ mâ ngăn, pơkrâ, kơtúa hên um mơngiơk. Tâ tá toăng kâng cho mâu tơmeăm ki pleăng, vâi krâ nhŏng o hiăng hbrâ rơnáu dêi tŭm têk; ai pŭn xiâm drôu, môi to chu prăng ƀă péa pong báu nếo. Pôa Rô Bhak, cho pôa pơchâu xâp kơpĕn ếo tiô khôi hmâ vâi krâ roh nah, teăng mâ ăm vâi krâ nhŏng o tung pơlê pêi pro tơdroăng rơkâu xối kâ báu nếo.

"Ô mâu xeăng a kong, a tơnêi, xeăng ngo, xeăng têa, xeăng báu dêi mơngế Jarai! Hâi kố, pơlê cheăm ngin hiăng châ xuâ dêi báu ki apoăng rơnó. Kơnôm ai kong mêi tro, tôu 'ló, kơnôm xeăng tŏng kum, báu hiăng kân, báu xiu, ai têa tôu, ai kơpâu, ai ‘noăng, djâ pơtroh báu phái păn roăng, chĕm mơ’drêh ăm pơlê cheăm. Nôkố pơlê cheăm hiăng hbrâ dêi hmê nếo, drôu xiâm ƀă tơmeăm hdroăng, pleăng ăm mâu xeăng, pâ mơnê xua hiăng kring vế, rak ngăn ăm chiâk deăng".

Klêi kơ'nâi môi rơnó pêi cheăng tơbrêi tơbrêh, tĭng "Kâ báu nếo" cho roh ki mơngế jarai vâ mơhno tối hiâm mơno mơnê kơ plêng tơnêi, khu xeăng ƀă jâ pôa hiăng tŏng kum ăm báu phái chiâng dâi lĕm. Jâ Nay H'Luir ối a ƀuôn Chơma, cheăm Ia Pa veăng ai mâ a hâi mơdĭng ăm 'nâi, kố cho roh ki vâi krâ-nhŏng o rơtế vêh ngăn dêi hnoăng cheăng pêi, pói rơhêng vâ troh mâu rơnó kơ'nâi ah pơtối châ ai báu hên nếo.

“Cheăm Ia Pa tơkŭm po hâi mơdĭng tiô khôi hmâ vâi krâ nah ƀă vêh po Tĭng Kâ báu nếo dêi mơngế Jarai á hlo ro khât. Tŏn chêng, kơhnhon xuăng ôh tá păng lôi tung khôi túa lĕm tro ton nah dêi mơngế Jarai. Ki malối vâi nâ o xâp ếo pơtâk tiô khôi vâi krâ nah, rơnuâ ếo pơtâk ki tơná mơngế Jarai tĕn mơjiâng xêh ro hâk tơngăm khât. Tĭng kâ báu nếo, kâ hmê nếo dế kố rế vâ hía lôi, la châ Tơnêi têa tơmâng, tŏng kum pơtối vêh pro nếo tiah mê ro khât. Kố cho khôi túa lĕm tro sap ing chal vâi krâ ton nah; drêng xuâ xo dêi báu, kâ hmê nếo athế rơkâu xối xeăng, 'nâi mơnê kơ xeăng hiăng tŏng kum, rơkâu pâ tŭm tơdroăng lĕm tro tâ".

Tơdroăng vêh po "Tĭng kâ báu nếo" a cheăm Ia Pa, kong pơlê Gia Lai tơ'mot tơdroăng ki veăng dêi pơlê pơla, malối cho mâu krâ pơlê, ngê̆ nhân ƀă mơngế ki rơkê 'na khôi túa, vêa vong. Pôa Ksor Ther, Ngế xiâm pơkuâ Ƀơrô Hnê hriâm ƀă Hnê mơjiâng tuăn ngôa rơkê Ia Pa, kong pơlê Gia Lai tối ăm ngin 'nâi, hdrối vâ vêh po "Tĭng kâ báu nếo" dêi mơngế Jarai, kơvâ cheăng túa lĕm tro hiăng tí tăng 'nâi plĕng, kơ-êng mâu krâ pơlê ƀă mơngế rơkê plĕng a pơlê cheăm.

“Kố cho hơnăm ki apoăng cheăm tơkŭm po tâ hơniâp ro khât. Hdrối vâ tơkŭm po, khu kăn pơkuâ pơlê tơmâng ngăn rơkong tơpui tối dêi kuăn pơlê, cheăm ai rôe kơtum chêng koăng hbru ăm mâu pơlê, hbrâ ếo, pơtâk, kơpĕn ăm mâu vâi muăn xâp ƀă pơtâp tŏn chêng, kơhnhon xuăng. Tơnêi têa ai tŏng kum ƀă hbrâ rơnáu nhên, tơtro khât. Tĭng kâ báu nếo, tĭng pơkoăng ŏng mế ƀă tĭng kleăng kơneăng têa pơrá châ vêh po tung rôh kố, ngin tâ hơniâp ro khât vâ ăm rêm ngế 'nâi troh khôi túa lĕm tro dêi hdrông kuăn ngo tơná".

Tơdroăng vêh po "Tĭng kâ báu nếo" a Ia Pa, kong pơlê Gia Lai tơdjêp ƀă tơdroăng pơkâ rak vế, mơnhông ki kơnâ khôi túa lĕm tro tung Tơdroăng pơkâ xiâm dêi tơnêi têa 'na mơnhông mơdêk khôi túa lĕm tro hơnăm 2026. Pôa Nguyễn Thái Sơn - Kăn pơkuâ Tíu xiâm mơhno khôi túa lĕm tro, Tơbleăng tơdroăng kal ƀă Tơ'noăng ivá cheăm Ia Pa tối ăm ngin 'nâi, tung la ngiâ, cheăm pơtối vêh po mâu leh mơdĭng tiô khôi vâi krâ nah vâ rak vế ƀă mơnhông mơdêk khôi túa lĕm tro mâu hdroâng kuăn ngo.

“Kố cho tĭng kâ báu nếo châ tơkŭm po a ƀuôn Ia Mrơn, cho khôi túa lĕm tro, ki má môi, ki ai phá xêh dêi mơngế Jarai. Tơdroăng cheăng kal châ rak vế đi đo vâ rak vế ƀă mơnhông mâu tơdroăng ki kơnía git túa lĕm tro. Tơdroăng ki pơtối mê cho mơđah tŏn chêng tơgôu koăng, mơnhông po mâu leh mơdĭng ki hiăng vâ hía lôi, mê Tíu xiâm mơhno túa lĕm tro kô vêh mơnhông vâ khu rơxông nếo pơtối rak vế, hriâm ƀối, mơnúa ngăn".

Klêi kơ'nâi leh mơdĭng, po hâi tĭng kố, tơdroăng phiu ro a hâi mơdĭng dêi ƀuôn Ia Mrơn, cheăm Ia Pa chiâng hơniâp ro tung idrâp chêng koăng ƀă mâu túa kơhnhon xuăng. Mâu khu tŏn chêng koăng ing mâu pơlê tung cheăm trâm mâ, tơpui tơno; kuăn pơlê ƀă tơmối rơtế veăng tơhrot kơxái, truâ kơxâk tơdúa, pâng mâ rup peâp. Mâu tíu mơđah tơbleăng kế tơmeăm pêi lo ing chiâk deăng, tơmeăm ki pro ing loăng pơlái kong kế ƀă kơchâi kâ dêi pơlê veăng kum tơ'nôm mơngiơk ăm hâi mơdĭng, hâi tĭng mê.