Rơtế hâi kố, tơ’noăng ‘’Gia Lai City Trail – Tơdroăng pốu kơpong kân rơdâ’’ tơdjêp tơdroăng tơ’noăng ivá ƀă ngăn reăng mâ hâi kong dêi kong pơlê.

Sap ing hâi lơ 6 troh lơ 8/11, mâu tơdroăng tơkŭm po a bêng Pleiku, mê cho leh mơdĭng troăng kơphô̆, trâm mâ mơhno túa lĕm tro, tơbleăng kế kâ, tơmeăm pêi lo ing chiâk deăng ƀă kơphế Gia Lai. Tơdroăng ngê̆ thuât "Kơmăng mơdĭng chêng koăng" po a kơmăng lơ 7/11 a Plông kân Đại Đoàn Kết, vêh mơhno tíu mơhno túa lĕm tro rơtế ƀă tơdroăng rêh ối pơlê pơla, vâ tơmối 'nâi tơ'nôm 'na tơmeăm khoăng ing leh mơdĭng, tơdroăng cheăng ƀă tơdroăng rêh ối dêi kuăn pơlê.

Rôh kố, Gia Lai tơkŭm po leh tơbleăng pơkâ mơnhên tơmeăm khoăng kơnía tơnêi têa ƀă kơtum chêng koăng Kơ Đơ dêi mơngế Jarai. Kơtum chêng ton nah ai 8 kơtâ, nôkố châ 'măn rak a Tíu chôu 'măn rak vế tơmeăm khoăng ton nah Pleiku.