Mơgêi Tơdroăng 67 dêi Khu xiâm pơkuâ tơdroăng kal kí, Pơkâ 72/2022/QH15 dêi Kuô̆k hô̆i mơhno tơdroăng tơmâng, tŏng gum khât dêi Tíu xiâm, mơjiâng pro troăng hơlâ pêi pro ƀă kơxô̆ liăn vâ mơjiâng Ƀuôn Ma Thuột chiâng kơphô̆ xiâm kơpong Tây Nguyên. Mâu troăng hơlâ kố hiăng pro xiâm kối kal kí, luât pơkâ ki kal vâ Dak Lak kơjo kơxô̆ liăn 'no pêi cheăng, mơnhông Ƀuôn Ma Thuột. Ki rơhêng vâ tối, Tơdroăng Pơkâ 72 hiăng mơjiâng 5 khu troăng hơlâ ki phá tơ-ê 'na liăn ngân, kế tơmeăm, pơkâ hdró, tơ'mot 'no liăn cheăng ƀă mơngế pêi cheăng rơkê. Tung mê, troăng hơlâ tơ'nôm 45% kơxô̆ liăn pêi cheăng tiah hmâ hiăng châ tơƀrê nhên.

Hneăng hơnăm 2021–2025, tâi tâng kơxô̆ liăn 'no mơjiâng tơmeăm khoăng tung lâp pơlê pơla a Ƀuôn Ma Thuột châ lối 125.000 rơtal liăn. Hngêi trăng, troăng klông, khăm pơlât, hnê hriâm châ tơmâng ngăn khât; mâu kơpong, mâu hngêi kơmăi kơmok hiăng tơ'mot tơ'nôm hên tơdroăng tơkêa bro, veăng 'mâi mơnhông hnoăng tíu xiâm dêi kơphô̆.

Laga, pôa Cao Đình Huy, Kăn pơkuâ Khu râng liăn ngân kong pơlê Dak Lak tối tiah kố, tơdroăng châ tơƀrê mơnhông tá hâi tơxâng ƀă tơmeăm khoăng ai hlâu. Tung 10 tơdroăng pơkâ xiâm, ai 5 tơdroăng pơkâ tá hâi pêi pro klêi. Cheăng kâ kơphô̆ tá hâi ai kơvâ ki djâ troăng ahdrối, tá hâi châ tơ'mot khu 'no liăn cheăng ton xŏn ƀă tơdroăng tơkêa bro kân. Kơmăi kơmok têng, uâ pơliê, logistics, ôm hyô ki dâi lĕm ƀă tơrŭm kơpong ối ‘ro, tá hâi kâi châ mơnhông.

"Ai 3 tơdroăng pơkâ tá hâi châ tơƀrê. Má môi cho pơkâ mơdêk kơxô̆ liăn mung tá hâi pêi pro châ tơƀrê kơxô̆ liăn mung, má péa kơdroh nâp hnoăng liăn mơhá tá hâi ai tơdroăng tơkêa bro tŭm tơdroăng ƀă má pái pơkâ mơhnhôk mơngế rơkê, ngế cheăng khoa hok tá hâi mơhnhôk châ tơ’mot hên."

Ing tơdroăng mơgêi Pơkâ 67 ƀă Pơkâ 72, Dak Lak pơkâ thế Tíu xiâm pơtối rak vế, 'mâi rơnêu mâu troăng hơlâ hiăng châ tơƀrê; hriăn plĕng tơ'nôm troăng hơlâ 'na hngêi trăng, troăng klông, khoa hok kŏng ngê̆, logistics ƀă tơrŭm cheăng tung kơpong. Dak Lak xuân pơkâ thế po rơdâ troăng hơlâ tơ'nôm 45% kơxô̆ liăn pêi cheăng tiah hmâ, tơtro ƀă kơpong mơnhông nếo, tơdjêp ƀă mâu tíu xiâm ki hiăng mơnhông dêi Buôn Ma Thuột – Buôn Hồ ƀă Tuy Hòa – Đông Hòa.

Pôa Lương Nguyễn Minh Triết, Kăn pơkuâ hnê ngăn cheăng Đảng kong pơlê Dak Lak tối tiah kố, mâu troăng hơlâ ki phá krê ki Tíu xiâm tơnêi têa ăm Ƀuôn Ma Thuột cho ki pơxúa ƀă hnoăng cheăng ki kân dêi kong pơlê. Tung pơla kong pơlê Dak Lak nếo ai tíu ki vâ mơnhông rơdâ tâ, tơdroăng ki pơtối rak vế mâu troăng hơlâ kố athế rơtế ƀă tơdroăng pơkâ tơdjuôm dêi pơlê kong kơdrâm Ƀuôn Ma Thuột troh hơnăm 2050, mơdêk tơdjêp ƀă mơnhông hnoăng cheăng ki xiâm dêi pơlê kong kơdrâm ƀă lâp kơpong.

“Troăng hơlâ hiăng ai, túa pơkâ hiăng châ tơbleăng, mâu tơdroăng cheăng ki xiâm mê xuân hiăng châ mơnhên, ki kal má môi cho tơdroăng ki tơkŭm pêi pro. Ki lâi hiăng pêi châ chiâng mê xuân athế mơnhên xiâm kối, xua ti lâi chiâng châ, rơkê; ki lâi tá hâi châ xuân athế mơnhên inhên, xua ti lâi tá hâi chiâng, xiâm kối ing lâi."

Pôa Nguyễn Đức Trung, Phŏ kăn Khu pơkâ Troăng hơlâ ƀă Mơnhông mơdêk Tơnêi têa tối nhên troăng hơlâ ki phá tơ-ê bu pơxúa khât drêng prôk tơdrêng ƀă ivá tơkŭm pêi pro ƀă ivá mơhnhôk, xúa châ tơƀrê kơxô̆ liăn. Tơnêi têa tơmâng xo, môi tuăn mâu tơdroăng pâ thế dêi kong pơlê, la pơkâ thế rah xo troăng hơlâ ai xiâm kối, tơleăng mơnhên tíu ki kreăng, ai tơdroăng mơnhên tơdjâk ƀă tơdroăng ki chiâng pêi pro.

“Troăng hơlâ pơkâ ki phá tơ-ê bu ai pơxúa drêng châ mơjiâng pro tơtro ƀă tơdroăng ki ai khât ƀă hlối tơrŭm ƀă ivá tơkŭm pêi pro ƀă ivá mơhnhôk xúa châ tơƀrê mâu kơxô̆ liăn. Troăng hơlâ pơkâ cho tơdroăng ki kal, la tơdroăng tơkŭm pêi pro nếo cho tơdroăng ki pơkâ”.

Tơdroăng ki pơtối pê klêi mâu troăng hơlâ ki phá tơ-ê vâ mơnhông Ƀuôn Ma Thuột ôh tá xê to vâ tah lôi mâu tơdroăng ki xơpá a ngiâ, mê ối pro ivá vâ pơlê kong kơdrâm mơnhông mơdêk hnoăng cheăng tíu xiâm, tíu ki tơdjêp ƀă djâ troăng mơnhông cheăng kâ - rêh ối pơlê pơla dêi kong pơlê Dak Lak nếo ƀă tá kơpong Tây Nguyên. Maluâ, ing troăng hơlâ, troăng pơkâ troh tơdroăng ki ai khât ối kal môi tơdroăng ki khŏm mơ-eăm ó rơdêi, tơdroăng ki hbrâ rơnáu ƀă kơtăng tung tơkŭm pêi pro.

Kố kô cho tơdroăng ki kal vâ pơhlêh mâu tơdroăng ki ai hlâu 'na troăng hơlâ, liăn ngân chiâng mâu tơdroăng ki pơhlêh khât, djâ Ƀuôn Ma Thuột mơnhông tơxâng ƀă hnoăng cheăng tíu xiâm kơpong.